ქართველი ჩოგბურთელები: წყვილებში უკეთ, ვიდრე ერთეულებში

ჩინურ ჩენჟოუში დასასრულს უახლოვდება ჩოგბურთელ ქალთა 25.000-იანი საერთაშორისო ტურნირი, რომელშიც სოფიო შაფათავაც მონაწილეობს.

3 ნოემბერს, ერთეულებში მე-2 ნომრად განთესილი ჩვენებური მასპინძელ ფენ იინ სუნთან დამარცხდა - 6:7, 2:6, სამაგიეროდ, წყვილებში იყოჩაღა - რუს ანგელინა გაბუევასთან შეამხანაგებულს განთესვით მე-4 ნომერი აქვს.

ზედიზედ ორი მოგების შემდეგ გუშინ ნახევარფინალში ასპარეზობის მეორე ნომერ ტაივანელებს - ჩინ-ვენ ჰსუსა და პეი-ჩი ლიის დაუპირისპირდა. ქართულ-რუსულმა დუეტმა ორ სეტში გაიმარჯვა - 6:4, 6:3 და ფინალში გავიდა.

შაფათავა და გაბუევა გადამწყვეტ პაექრობაში ასპარეზობის რეიტინგფავორიტებთან - ჟაკლინ საკოსა (აშშ) და ალექსანდრინა ნაიდენოვასთან (ბულგარეთი) გაარკვევენ ურთიერთობას. ამერიკულ-ბულგარულმა ტანდემმა კამილა კერიმბაიევასა (ყაზახეთი) და ვერონიკა კუდერმეტოვას (რუსეთი) აჯობა - 3:6, 7:6, 10:8.

თბილისელი ოქსანა კალაშნიკოვაც ჩინეთში იმყოფება და იქაურ პრესტიჟულ ტურნირში - ჟუჰაის ელიტტროფში (საპრიზო ფონდი 2.214.500 დოლარი) ასპარეზობს.

გერმანელ ტატიანა მარიასთან ერთად ჩვენებური "ლოტოსის" გუნდშია, სადაც კიდევ ორი დუეტი გამოდის: ანდრეა კლეპაჩი (სლოვენია)-არანტხა პარა-სანტონია (ესპანეთი) და ჟაოქსუან იანი-ქსიაოდი იოუ (ორივე-ჩინეთი).

როგორც ვწერდით, ოქსანა და ტატიანა პირველ ტურში კლეპაჩსა და პარა სანტონიასთან დამარცხდნენ - 1:6, 6:7, გუშინ კი სლოვენიურ-ესპანურმა ტანდემმა მასპინძლებთან - იანსა და იოუსთან წააგო - 3:6, 3:6. კალაშნიკოვა და მარია ჯგუფის ბოლო შეხვედრას ჩინელებთან ხვალ გამართავენ.

მეორე გუნდ "ორქიდეაშიც" სამი წყვილია გაერთიანებული: იპეკ სოილუ (თურქეთი)-იიფან ქსუ (ჩინეთი), ანასტასია როდიონოვა (ავსტრალია)-ოლგა სავჩუკი (უკრაინა) და ჩენ ლიანი-იიფან ვანი (ორივე-ჩინეთი). აქ მხოლოდ ერთი ორთაბრძოლა გაიმართა - სოილუმ და ქსუმ როდიონოვასა და სავჩუკს აჯობეს - 6:3, 6:4.

დღეს თურქულ-ჩინური დუეტი ლიანსა და ვანს გაუწევს მეტოქეობას, ხვალ კი როდიონოვა-სავჩუკი და მასპინძლები ითამაშებენ. "ლოტოსისა" და "ორქიდეას" ჯგუფებში გამარჯვებულები ჩემპიონობისთვის იბრძოლებენ.

ინგლისური შეფილდის 10.000-იან ტურნირში ზედიზედ მეორე შეხვედრა მოიგო მესამე ნომრად განთესილმა მარიამ ბოლქვაძემ.

ფინელი მაია ნიკოლ ეკლუნდის ძლევის შემდეგ გუშინ მან ოლივია ნიკოლსი (დიდი ბრიტანეთი) დაამარცხა - 7:5, 6:1.

მეოთხედფინალში ქართველი ჩოგბურთელის მეტოქე იქნება ასპარეზობის მე-6 ნომერი ჩეხი პეტრა კრეიშოვა, რომელმაც მასპინძელი ელა ტეილორი იოლად დაჯაბნა - 6:1, 6:1. .

საქართველოს ვაჟთა ნაკრების წევრი გიორგი ცივაძე შარმ ელ შეიხის (ეგვიპტე) 10.000-იან საერთაშორისო ტურნირში მონაწილეობს.

გუშინ იგი ერთეულთა პაექრობას გამოეთიშა, რადგან რუს რომან საფიულინთან სამ სეტში დამარცხდა - 7:6, 3:6, 2:6.

წყვილებში ჩვენებურმა რომან ხასანოვთან (ყაზახეთი) ერთად სტარტზე შვეიცარიელებს - ლურუა მარტინესსა და სიმეონ როსიერს მოუგო - 3:6, 6:3, 10:7, მეოთხედფინალში კი ინდოელებს - არმაან ბჰატიასა და დრუვ სუნიშს სძლია - 6:4, 6:3.

ნახევარფინალში ქართულ-ყაზახურ დუეტს მეტოქეობას გაუწევს იური ჯავაკიანისა (უკრაინა) და დენის ევსეევის (ყაზახეთი) ტანდემი, რომელმაც მიხალ შმიდი (ჩეხეთი) და დანიილ ზარიჩანსკი (ბელორუსი) ჩამოიშორა გზიდან - 7:5, 6:1.

მეორე ნახევარფინალში ისამ ალ ტაველი (ეგვიპტე), მათეუშ ტერჟინსკი (პოლონეთი) და კარიმ-მოაჰამედ მაამუნი (ეგვიპტე), ვლადისლავ მანაფოვი (უკრაინა) გაარკვევენ ერთმანეთთან ურთიერთობას.

არაბთა გაერთიანებულ საემიროებში ახალგაზრდა ჩოგბურთელთა ფუჯაირახის თასის გათამაშებას ქართველთაგან მხოლოდ ზურა ტყემალაძე შემორჩა, ისიც წყვილებში, რადგან გუშინ ერთეულთა მეოთხედფინალში ესპანელ ალვარო ბუენო გილთან წააგო - 3:6, 3:6.

წყვილებში ის ეგვიპტელ ადამ გაბერთან ერთად ასპარეზობის რეიტინგფავორიტებს - ანდრეუ პაულსონსა და დალიბორ სვრჩინას (ორივე-ჩეხეთი) აჯობა - 6:3, 6:7, 11:9 და ფინალში გავიდა, სადაც მეორე ნომრებს - მერთ ალქაიას და ბორა სენგულს (ორივე-თურქეთი) შეხვდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"