ლეგენდარული ავსტრალიელი მოცურავე, ხუთგზის ოლიმპიური ჩემპიონი იან ტორპი ხუთწლიანი პაუზის შემდეგ დიდ სპორტს უბრუნდება. "ტორპედო" დღეს, სინგაპურში მსოფლიოს თასის ეტაპზე აიღებს სტარტს. ბოლოს ავსტრალიელი ოფიციალურ ტურნირზე 2006 წელს გამოდიოდა. მან დიდ სპორტში დაბრუნება შარშან გადაწყვიტა, შვეიცარიაში გადაბარგდა და იქ ვარჯიშობდა რუსი მწვრთნელის გენადი ტურეცკის ხელმძღვანელობით. სინგაპურში ტორპი მაღალმთიანი საწვრთნელი შეკრებიდან ჩაფრინდა, რომელიც შვეიცარიის ალპებში ჩაატარა.
ტორპი მსოფლიოს თასის სამივე აზიურ ეტაპზე აპირებს მონაწილეობის მიღებას: სინგაპურიდან ავსტრალიელი პეკინში გამოვა, ბოლოს - ტოკიოში. ვარჯიშების განახლების მომენტიდან დღემდე ტორპმა ცხრა კილოგრამი დაიგდო და
"ბუნებრივია, ვნერვიულობ, - განაცხადა მოცურავემ მნიშვნელოვანი სტარტის წინ. - ჩემს მწვრთნელთან ერთად ძალიან დიდი და კარგი სამუშაო გავწიეთ, მაგრამ წარმოდგენა არ მაქვს, რას უნდა ველოდო საკუთარი თავისგან. ასე რომ, მკაცრად ნუ განმსჯით".
რაც შეეხება დისტანციებს, რომლებზეც ტორპი აიღებს სტარტს, ამ მხრივ მოულოდნელობასთან გვაქვს საქმე: სამივე ეტაპზე "ტორპედომ" განაცხადი შეიტანა 100 მეტრზე ბატერფლაიში და 100 მეტრზე კომპლექსურ ცურვაში. შესაძლოა, ტოკიოში მან 100 მეტრი კროლიც დაუმატოს, მაგრამ ამ საკითხთან დაკავშირებით სპორტსმენსა და მის მწვრთნელს საბოლოო გადაწყვეტილება ჯერ არ მიუღიათ.
"ვიცი, რომ ყველა ელოდება გამოსვლას ჩემს საყვარელ დისტანციებზე - 100 და 200 მეტრზე თავისუფალში, მაგრამ ეს ის შემთხვევა არ არის, როცა უნდა ვიჩქარო. ოლიმპიადაზე სწორედ ამ დისტანციებზე ვაპირებ გამოსვლას, - ამბობს ტორპი. - შესაბამისად, თავად გადავწყვეტ, როდის სად გაიმართება პირველი სტრატი ამ დისციპლინებში".
ყოველდღიური სპორტული გაზეთი "ლელო"
