უკვე ვწერდით, რომ "ოლიმპიკის" აუზში ვეტერანი მოცურავის დავით გაჩეჩილაძის სახელობის თასი გათამაშდა, რომელშიც თბილისის, ქუთაისის, რუსთავის, საჩხერისა და ჭორვილას წარმომადგენლები მონაწილეობდნენ. - გულსატკენია, რომ შეჯიბრებაში ქუთაისისა და ბათუმის წარმომადგენლებმა ვერ იასპარეზეს, თუმცა დიდი ხანი არ არის, რაც ამ ქალაქებში აუზები ამუშავდა, ამიტომ მათ არ ჰყავთ ისეთი სპორტსმენები, რომლებიც თუნდაც ქვეყნის მასშტაბით გამართულ ტურნირებში გამოვლენ, - გვითხრა საქართველოს მოცურავეთა ნაკრების მთავარმა მწვრთნელმა ზურაბ ხომასურიძემ. - არადა, წლების განმავლობაში ამ ქალაქებიდან ქვეყნის ნაკრები ღირსეულ შევსებას იღებდა.
მართალია, ბოლო დროს თბილისში მომრავლდა საცურაო
სამაგიეროდ, ამ ტურნირზე უწინდებურად იყოჩაღეს "ლაგუნა ვერეს" წარმომადგენლებმა. ურიგო შედეგები არ ჰქონიათ, მაგრამ მეტს ველით სპორტკლუბ "ტონუსის" მოცურავეებისა და დიღმელებისგან. მით უმეტეს ახლა, რადგან 2015 წლის ევროპის ახალგაზრდობის ოლიმპიური ფესტივალისთვის აქედანვე უნდა მოვემზადოთ, რათა სტუმრებს კონკურენტუნარიანი გუნდით დავხვდეთ.
სპორტის სამინისტრო, ეროვნული ოლიმპიური კომიტეტი და თბილისის მერია დახმარებას გვპირდება. სახელმწიფო, ალბათ, ყველაფერს ვერ გასწვდება, ამიტომ დამატებითი სახსრები უნდა მოვიძიოთ. ხშირი სტარტებია საჭირო როგორიც შინ, ისე უცხოეთში.
უამრავი პრობლემაა მოსაგვარებელი, რასაც რამდენიმე თვეა, კოლეგების დახმარებით ვცდილობ. უპირველესად, კონტაქტების გაფართოებას ვაქცევ ურადღებას.
უკვე დავუკავშირდი ყოფილ მოცურავეებს, რომლებიც ბიზნესში მოღვაწეობენ. ერთ-ერთი პირველი დავით გაჩეჩილაძე გამოგვეხმაურა, რომელმაც შესანიშნავი შეჯიბრება დაგვიფინანსა. ახალი სეზონისთვის სექტემბრიდან დავიწყეთ მზადება, თუმცა მარტო წვრთნით შორს ვერ წავალთ. სპორტსმენებს სტარტები სჭირდებათ.
წლევანდელი მსოფლიოს ჩემპიონატის მონაწილეები - ირაკლი რევიშვილი და ირაკლი ბოლქვაძე, თურქეთში ევროპის ახალგაზრდობის ოლიმპიური ფესტივალის ნახევარფინალისტი თემურ კობახიძე, ასევე, დავით სიხარულიძე და გიგი მთვრალაშვილი ლონდონის ოლიმპიადის საგზურების მოსაპოვებლად მოსინჯავენ ძალებს - რამდენიმე სალიცენზიო ტურნირში მიიღებენ მონაწილეობას.
თურქეთში კოლეგებს შევეხმიანე. ისინი საწვრთნელ შეკრებაზე გვეპატიჟებიან თავიანთი ხარჯებით, მხოლოდ გზის ფული იქნება ჩვენი. ეს შეკრება, სავარაუდოდ, იანვარ-თებერვალში მოეწყობა და მხოლოდ ის მოცურავეები გაემგზავრებიან, რომლებსაც ლონდონის საგზურების მოპოვების შანსი აქვთ. გაცვლითი პროგრამა დავგეგმეთ ესპანელ მოცურავეებთან - პირენელეები ზამთარში გვეწვევიან ერთობლივ საწვრთნელ შეკრებაზე, მაისში კი ჩვენ გავემგზავრებით ესპანეთში. საგულისხმოა, რომ შევიგულეთ სპონსორი, რომელიც ჩვენს მოცურავეებს სამ საშინაო შეჯიბრებას და ამდენივე საერთაშორისო ტურნირზე გამგზავრებას დაუფინანსებს.
მართალია, წლეულს ჩვენი მწვრთნელებისა და მსაჯებისთვის ეროვნული ოლიმპიური კომიტეტის თანადგომით საერთაშორისო სემინარი მოვაწყვეთ, მაგრამ კვალიფიკაციის ასამაღლებლად კიდევ ბევრის გაკეთება გვმართებს, რის აუცილებლობაშიც დავით გაჩეჩილაძის სახელობის თასის გათამაშებამაც დაგვარწმუნა. გიორგი აბზიანიძე ამას წინათ ოთხკვირიან სწავლებაზე იმყოფებოდა ამერიკაში და იქიდან საინტერესო მასალებით დაბრუნდა. იგი ინფორმაციას სხვა მწვრთნელებსაც გაუზიარებს. ვეცდებით, მწვრთნელთა კვალიფიკაციის ამაღლების პროცესი არ შევანელოთ.
ყოველდღიური სპორტული გაზეთი "ლელო"
