გორის მუნიციპალიტეტის საცურაო აუზზე მოვარჯიშე სპორტსმენები აშკარა პროგრესს განიცდიან. დეკემბერში აუზის დირექტორი შეიცვალა და ხელმძღვანელად მოქმედი სპორტსმენი, ყველაზე წარმატებული ადგილობრივი მოცურავე, 22 წლის გიორგი ბუხრიკიძე დაინიშნა.
იგი თავისუფალი სტილით 50 და 100 მეტრზე ცურვაში ჩვენი ქვეყნის მრავალგზის ჩემპიონია და ბოლო წლებში საქართველოს საუკეთესო სპრინტერია.
ახალ დირექტორს კიევის ფიზიკური აღზრდისა და სპორტის ეროვნულ უნივერსიტეტში აქვს განათლება მიღებული. იგი მიიჩნევს, რომ აქტიური სპორტული კარიერისა და ხელმძღვანელ თანამდებობაზე მუშაობას ნაყოფიერად შეძლებს.
- რა შეცვალეთ აუზის მუშაობაში?
- პირველ ყოვლისა, დისციპლინა, რომელიც აქამდე ძალიან
მთავარი გამოსასწორებელი საკითხი კი აუზის რემონტია. მართალია, წყალი სუფთაა და პრობლემა არ გვაქვს, მაგრამ უშუალოდ შენობის რემონტია საჭირო. პირველ ეტაპზე მუნიციპალიტეტისგან უკვე მიღებული თანხით სახურავს განვაახლებთ.
- მოვარჯიშეთა და მწვრთნელთა კონტინგენტზე, შედეგებზე რას იტყვით?
- ოცდაათზე მეტ მოცურავეს ხუთი მწვრთნელი ავარჯიშებს. შარშან 18 პირველი, 17 მეორე და 24 მესამე ადგილი მოვიპოვეთ. ჩემ გარდა, უფროსებში შედეგებით გამოირჩეოდნენ გვანცა ხინჩეგაშვილი, ნინი მეზვრიშვილი, გიგა აფციაური, ვაჟა ჭიოტაშვილი, გიორგი დუდაშვილი, ლადო ტერლეცკი და სხვები.
წლეულს პირველი სტარტი თებერვალში თბილისში, საქართველოს ღია პირველობაზე გვექნება. მარტში უკვე უმცროსი ასაკის მოცურავეთა ქვეყნის ჩემპიონატია, ხოლო შემდეგ "მაქსიმალის" თასზე ასპარეზობა გველის. სულ სეზონში 10 შეჯიბრებაში მონაწილეობა გვაქვს დაგეგმილი.
- შარშანდელი საკუთარი შედეგებით თუ ხართ კმაყოფილი?
- რადგან პირადი შედეგების მხოლოდ გამეორების და 50 მეტრზე გაუმჯობესება შევძელი - კმაყოფილი ვერ ვიქნები. 100 მეტრზე ოლიმპიადის ლიცენზიის მოსაპოვებლადაც 1,7 წამი დამაკლდა. მიზეზი მხრის ტრავმა იყო.
ახლა საქართველოს ღია პირველობისთვის ვემზადები, სადაც ქართველების გარდა, უკრაინელი და ბელორუსი მოცურავეებიც გამოვლენ. სეზონის მთავარი შეჯიბრება კი ზაფხულში ბარსელონას საერთაშორისო ტურნირია.
- ადრე მუნიციპალიტეტიდან დაუფინანსებლობას უჩიოდით გორელი მოცურავეები...
- შარშან უკეთესი ვითარება იყო. ვიმედოვნებთ, წლეულს უფრო უკეთესი იქნება. მუნიციპალიტეტის ხელშეწყობით, მეცადინეობა სპორტულ ჯგუფებში უფასოა, შეჯიბრებებზე გვაფინანსებენ.
საახალწლოდ წარმატებულმა სპორტსმენებმა და მწვრთნელებმა გარკვეული პრემიაც მიიღეს.
ზაფხულისთვის, აუზზე მომსვლელთა რიცხვისა და შემოსავლის ზრდის ხარჯზე ვგეგმავთ, რომ წარმატებული სპორტსმენები პრემიებით კიდევ წავახალისოთ.
ყოველდღიური სპორტული გაზეთი "ლელო"
