უკვე გაუწყეთ, რომ საქართველოს ძალოსნებმა ორი სალიცენზიო მსოფლიოს ჩემპიონატის ქულებით ლონდონის 2012 წლის ოლიმპიური თამაშების 3 საგზური დაიმსახურეს. სწორედ ამ წარმატებას მიეძღვნა ქართველ ათლეტებთან შეხვედრა ეროვნულ ოლიმპიურ კომიტეტში, სადაც პარიზში გამართული მსოფლიოს ჩემპიონატის შედეგები შეჯამდა.
გია ნაცვლიშვილი, სეოკ-ის პრეზიდენტი:"ახალი ოლიმპიური ციკლის დასაწყისში ძალოსანთა ლონდონის ორ ლიცენზიაზეც, ალბათ, ყაბულს ვიქნებოდით, მაგრამ ნათქვამია, მადა ჭამაში მოდისო. მას შემდეგ, რაც შარშან ანტალიაში ჩვენმა სპორტსმენებმა სამი საგზურისთვის საკმაო ქულები მოაგროვეს, საფრანგეთის დედაქალაქში მე-4 ლიცენზიაზეც დავიწყეთ ფიქრი. მცირედი დაგვაკლდა ოცნება რეალობად გვექცია: მე-15 ადგილზე გასულ
ნაკრების თითოეულ წევრს შესაძლებლობის მაქსიმუმი რომ ეჩვენებინა, ამ სხვაობის დაძლევა სრულიად შესაძლებელი იყო. თუმცა, აქვე გვინდა შევნიშნოთ, რომ გუნდის ექვსივე წარმომადგენელი ნაკრების საერთო ინტერესებიდან გამომდინარე მოქმედებდა. რომ არა ეს მნიშვნელოვანი ამოცანა, დარწმუნებული ვარ, რომ გია მაჭავარიანი ორჭიდში უმედლოდ არ დარჩებოდა. ყოველივეს მიუხედავად, პარიზში ქართველი ძალოსნების გამოსვლა წარმატებულად მიმაჩნია.
მინდა სპორტსმენებს, მათ მწვრთნელებსა და ფედერაციის მესვეურებს მადლობა გადავუხადო თავდადებული გარჯისთვის და სამი ლიცენზიის მოპოვება მივულოცო. დარწმუნებული ვარ, რომ, საფრანგეთში ნაჩვენები შედეგებიდან გამომდინარე, გია მაჭავარიანს ბრიტანეთის დედაქალაქში მედლის მოპოვება შეუძლია. ასე რომ, ძალოსანთა ოლიმპიურ ჯილდოზე ოცნება სულაც არ არის უტოპიური".
გიორგი ასანიძე, პარლამენტის სპორტისა და ახალგაზრდობის საქმეთა კომიტეტის თავმჯდომარე, ოლიმპიური ჩემპიონი: "ბოლო ოლიმპიადებზე ქართველ ძალოსნებს სტაბილურად ჰყავთ ორი-სამი წარმომადგენელი. ეს ნაკრების მთავარი მწვრთნელის - ვანო გრიქუროვის დამსახურებაა, რომელიც მცირე პაუზის შემდეგ კვლავ დაუბრუნდა ჩვენს გუნდს და ბიჭებიც აგერ წელიწადზე მეტია, მისი მეთვალყურეობით მონდომებით ემზადებიან. შედეგებით ჩვენც კმაყოფილი ვართ და ეს ძალოსნობის ფედერაციის ძალისხმევასთან ერთად ეროვნული ოლიმპიური კომიტეტისა და სპორტის სამინისტროს დახმარებისა და თანადგომის შედეგია. ფედერაცია მიღწეულზე გაჩერებას არ აპირებს.
რაც გაკეთდა, ეს პროგრამა მინიმუმია, ახლა პროგრამა მაქსიმუმზე უნდა ვიფიქროთ, რაც ძალოსნობაში ოლიმპიური მედლის მოპოვებას გულისხმობს. საამისოდ რეალური შანსი და საფუძველი გვაქვს და ისინი უნდა გამოვიყენოთ".
შეხვედრის დასასრულს, ტრადიციისამებრ, ძალოსნებმა "ლონდონი 2012"-ის ლიცენზიატთა დაფაზე საკუთარი ხელმოწერები დააფიქსირეს.
შეგახსენებთ, რომ პარიზში ძალოსანთა მსოფლიოს ჩემპიონატზე მოპოვებული სამი საგზურის გარდა, დიდ ბრიტანეთში გამგზავრება უკვე დაბევებული აქვთ ტყვიის მსროლელ ოლიმპიურ ჩემპიონ ნინო სალუქვაძეს, მშვილდოსნობაში მსოფლიოს ჩემპიონატის ვერცხლის პრიზიორ ქრისტინე ესებუას, მოჭიდავეებს - მანუჩარ ცხადაიას, დავით მოძმანაშვილს, დავით მარსაგიშვილს, დავით ხინჩეგაშვილსა და მალხაზ ზარქუას. წლეულს სალიცენზიო ტურნირების ლიმიტი ამოიწურა. იგი 2012 წლის იანვრიდან განახლდება და, იმედია, ჩვენი ოლიმპიური გუნდის შემადგენლობაც საგრძნობლად გაიზრდება.
კახა ბერიძის ფოტო
ყოველდღიური სპორტული გაზეთი "ლელო"
