ქართველებს ჩინეთში გრანდ-ოსტატები იწვევენ

საქართველოს გოჯუ-რიუ კარატეს ახალმა ნაკრებმა 2-12 ივლისს საზაფხულო საწვრთნელი შეკრება გაიარა ურეკში. ნაკრებში ძველების გვერდით ახალებიც გამოჩნდნენ, რაც მისასალმებელია და იმის დასტურია, რომ კარატეს ეს მიმართულება საქართველოში ვითარდება და ახალ წარმატებებსაც უნდა ველოდეთ.

სხვადასხვა ასაკის და წონითი კატეგორიის 25 წევრისგან შემდგარმა კონტაქტური კარატეს ნაკრებმა უკვე დაიწყო სექტემბერის საქართველოს ჩემპიონატისთვის მზადება.

აღსანიშნავია, რომ კონტაქტური კარატეს ქართველი ოსტატები ყოველთვის კარგ შედეგს აღწევენ ევროპა-მსოფლიო ტატამზე და ამჯერადაც კიდევ ერთი გრანდიოზული ჩემიონატისთვის ემზადებიან, რომელსაც შემოდგომაზე ჩინეთი უმაპინძლებს.

"ჩვენთვის ყველაზე პრინციპული და მნიშვნელოვანია ოქტომბრში ჩინეთში გამგზავრება, სადაც მსოფლიოს ყველა უძლიერესი ოსტატები ჩავლენ. ჩვენთვისაც დიდი დაფასებაა ასეთი მიწვევა. მსოფლიო ჩემპიონატის დღეებშივე გაიმართება სემინარები კონტაქტურ კარატეში.

საწვრთნელი შეკრება ურეკში ცოტა ადრე ჩავატარეთ. გვინდა ეროვნულ ჩემპიონატში ჯეროვნად ვიასპარეზოთ. დავაკომპლექტებთ საქართველოს ნაკრებს, რომელიც უპრესტიჟულეს მსოფლიოს ჩემპიოანტზე და სემინარებზე კარატეს გრანდ-ოსტატების წინაშე წარსდგება ჩინეთში. ეს საშუალებას მოგვცემს ოსტატობის დონე ავიმაღლოთ.

საქართველოს ჩემპიონატამდე კი სექტემბერშივე უკრაინის საერთაშორისო ტურნირი გევლოდება. ასე რომ, მოდუნების დრო არ გვაქვს, ფორმაში უნდა ვიყოთ", - განაცხადა შეკრებიდან დაბრუნებულმა მსოფლიოს ორგზის ჩემპიონმა კონტაქტურ კარატეში, საქართველოს საბრძოლო ხელოვნებათა ცენტრის პრეზიდენტმა, მესამე დანის მფლობელმა, ლევან როგავამ.

ნუგზარ ჭიაბერაშვილი,
საქართველოს კარატეს ეროვნული ფედერაცია