კრივში ავსტრალიის ყოფილი ჩემპიონი ჯონ მარსეტა დანით მიყენებული ჭრილობისგან გარდაიცვალა. ჩხუბი სიდნეის გარეუბანში მოკრივის სახლის დერეფანში მოხდა. მარსეტა 2 აგვისტოს გარდაიცვალა, თუმცა ამ სამწუხარო ინციდენტის შესახებ ინფორმაცია მხოლოდ ახლა გავრცელდა. მოკრივე 38 წლის იყო.მარსეტა პროფესიულ რინგზე 1991-96 წლებში გამოდიოდა და 76.2-კილოგრამამდე წონით კატეგორიაში იყო ქვეყნის ჩემპიონი. სულ მან 22 ბრძოლა ჩაატარა, 14 მოიგო (12 - ნოკაუტით), ექვსჯერ დამარცხდა და ორი ბრძოლა ფრედ დასრულდა.
მისი მწვრთნელი ჯორჯ რინო მიიჩნევს, რომ მარსეტა ნიჭიერი მოკრივე იყო, მაგრამ ვერ შეძლო თავისი შესაძლებლობების რეალიზაცია.
* * *
სამ წონით კატეგორიაში მსოფლიოს ყოფილ ჩემპიონს ანტონიო მარგარიტოს შეუძლია მშვიდად მოემზადოს მიგელ კოტოსთან შესახვედრად.
მარგარიტომ აშშ-ის ერთ-ერთ კლინიკაში სამედიცინო შემოწმება გაიარა და ექიმებისგან საწვრთნელი შეკრების გავლის ნებართვა მიიღო. მექსიკელს 3 დეკემბერს ნიუ იორკის "მედისონ სკვერ გარდენში" უწევს კოტოსთან ჩხუბი.
შეგახსენებთ, რომ მარგარიტომ ბოლო ბრძოლა ფილიპინელი მენი პაკიაოს წინააღმდეგ გამართა და ნოკაუტით წაგების შემდეგ ხანგრძლივი მკურნალობა მოუწია.
ყოველდღიური სპორტული გაზეთი "ლელო"
