ფილიპინელი მოკრივე მენი პაკიაო თავის მომდევნო ბრძოლას ამერიკელი ტიმოტი ბრედლის წინააღმდეგ გამართავს. ამის შესახებ გვამცნო "პაკმენის" პრომოუტერმა ბობ არუმმა. ოფიციალურად პაკიაოსა და ბრედლის ბრძოლის შესახებ უახლოეს დღეებში გამოცხადდება. შეხვედრა 9 ივნისს ლას ვეგასში გაიმართება.ბოლო თვეებში მსოფლიოს საუკეთესო მოკრივედ აღიარებული მენი პაკიაო მოლაპარაკებებს აწარმოებდა ფლოიდ მეივეზერთან, მაგრამ მოკრივეები ბრძოლის ფინანსურ მხარეზე ვერ შეთანხმდნენ, ამიტომაც მათ შორის 5 მაისს შეხვედრა არ დაინიშნა. პაკიაო ითხოვდა საერთო ჰონორარის თანაბრად გაყოფას, მეივეზერი კი ფილიპინელს ან 40 მილიონ დოლარს ან საერთო შემოსავლის 40 პროცენტს სთავაზობდა.
გარდა ამისა, ფილიპინელთან ბრძოლის კანდიდატებად მიიჩნეოდნენ: ხუან მანუელ მარკესი, ლემონტ პიტერსონი და მიგელ კოტო. დღეისთვის პაკიაო WBO-ის ვერსიით 66.7-კილოგრამამდე წონით კატეგორიაში მსოფლიოს ჩემპიონია.
რაც შეეხება ბრედლის, ის ასევე WBO-ის ტიტულს ფლობს 63 კილოგრამში. პაკიაოსა და ბრედლის ბრძოლა 66-კილოგრამამდე წონით კატეგორიაში გაიმართება, ასე რომ, ამერიკელის ტიტული 9 ივნისს არ გათამაშდება.
ყოველდღიური სპორტული გაზეთი "ლელო"
