მექსიკელმა მოკრივემ ორლანდო სალიდომ 57.2-კილოგრამამდე წონით კატეგორიაში WBO-ის ტიტული დაიცვა. 10 მარტს მან ნოკაუტით დაამარცხა პუერტორიკოელი ხუან მანუელ ლოპესი. მექსიკელმა მეტოქე მეათე რაუნდის დასაწყისში დასცა რინგზე.
ბრძოლას პუერტო რიკოს დედაქალაქი სან ხუანი მასპინძლობდა. მეხუთე რაუნდში ლოპესმა სალიდო ნოკდაუნში გაგზავნა, მაგრამ მექსიკელი "მეათე" თვლაზე წამოდგა, მალე კი მას რაუნდის დასრულების მაუწყებელმა გონგმა მოუსწრო.
მეათე რაუნდის დასაწყისში ლოპესი სალიდოს დარტყმების სერიის შემდეგ ნოკდაუნში აღმოჩნდა. მასპინძელმა მოკრივემ შეძლო ფეხზე წამოდგომა, მაგრამ რეფერი რობერტო რამირესმა ბრძოლა შეაჩერა. მსაჯის აზრით, ლოპესს არ შეეძლო ბრძოლის გაგრძელება.
სალიდო და ლოპესი პირველად 2011 წლის აპრილში დაუპირისპირდნენ ერთმანეთს. მაშინ ტექნიკური ნოკაუტით სალიდომ გაიმარჯვა. სულ პროფესიულ რინგზე 31 წლის მექსიკელმა 52 ბრძოლა გამართა, 38 გამარჯვება მოიპოვა (26 - ნოკაუტით), 11-ჯერ დამარცხდა და ორი ბრძოლა ფრედ დაასრულა. კიდევ ერთი ბრძოლა გაუქმებულად გამოცხადდა.
ყოველდღიური სპორტული გაზეთი "ლელო"
