როგორც მოსალოდნელი იყო, უკრაინელმა ვლადიმერ კლიჩკომ იოლად შეინარჩუნა სუპერმძიმე წონაში სამი საჩემპიონო ქამარი. ის კარიერაში მეორედ ხვდებოდა ტონი ტომპსონს და ამერიკელის თამამი დაპირებები ბრძოლის წინ მხოლოდ დაპირებად დარჩა.შვეიცარიის ქალაქ ბერნში გამართული ბრძოლა უკრაინელმა თავის სტილში დაიწყო - ის არ აპირებდა მოვლენების ფორსირებას და დაზვერვას ატარებდა. თუმცა იყო ერთი განსხვავება: ვლადიმერი უკვე პირველ რაუნდში იყენებდა მარჯვენა კროსს, რომელსაც, როგორც წესი, უფრო გვიანი რაუნდებისთვის ინახავს ხოლმე.
მეორე რაუნდიდან ცხადი გახდა, რომ ბრძოლისწინა პრესკონფერენციაზე ვლადიმერი სიტყვებს ჰაერში არ ისროდა, როცა ამბობდა -
ამაზე მეტყველებდა მისი შემართება მეორე რაუნდიდან მოყოლებული; აგრეთვე - "კლინჩზე" უარის თქმა, რასაც ადრე უკრაინელი ხშირად იყენებდა.
მეორე რაუნდში ტომპსონი ორჯერ დაეცა რინგზე. პირველ შემთხვევაში მან, უბრალოდ, წონასწორობა ვერ შეინარჩუნა, მეორე ჯერზე კი მას ჩემპიონმა "გადაუარა". სწორედ აქ ჩანდა კოლოსალური განსხვავება სისწრაფეში. 41 წლის ამერიკელის დარტყმები სრულიად უხიფათო იყო და ისეთი შთაბეჭდილება იქმნებოდა, რომ ტომპსონი, უბრალოდ, მოვალეობას იხდიდა.
მესამე რაუნდიდან მოყოლებული, რეგულარულად აღწევდა მიზანს კლიჩკოს პირდაპირი დარტყმები.
შესაძლოა, ეს შეტევები სიხშირით არ გამოირჩეოდა, მაგრამ ეფექტურობა ნამდვილად არ აკლდა.
მეოთხე რაუნდის წინ ამერიკელის გუნდი მაქსიმალურად ცდილობდა, დაერწმუნებინა პრეტენდენტი, რომ მას შეეძლო ღირსეულად ბრძოლა.
შესაძლოა, ემოციათა ამგვარი გამოვლენა მესამე რაუნდის ბოლოს ტონის ლოკალური წარმატებით იყო გამოწვეული, როცა ამერიკელმა მარცხენათი "დაიჭირა" ჩემპიონი. დარტყმის ძალა კლიჩკოს ხელთათმანმა შეანელა. ამიტომაც არ იყო გამანადგურებელი ძალის. თუმცა ერთგვარი სიგნალი აღმოჩნდა უკრაინელისთვის.
მეხუთე რაუნდმა ვლადიმერის კარნახით ჩაიარა, რომელმაც სერიოზული უპირატესობა მოიპოვა. კლიჩკოს ჯები მოსვენებას არ აძლევდა ტომპსონს, რომელიც რაუნდის დასრულებამდე 19 წამით ადრე ნოკდაუნში აღმოჩნდა - მიზანს მიაღწია მარჯვენა პირდაპირმა დარტყმამ.
რაუნდის დარჩენილი ნაწილი ამერიკელმა კლინჩში გაატარა, უკვე შემდეგ რაუნდში კი ტონი ნოკაუტში აღმოჩნდა. ჩემპიონი აღარ აპირებდა ბრძოლის გაწელვას და პირველივე წამებიდან შეუტია. ბრძოლა ცალმხრივ ჩაგვრას დაემსგავსა, რამაც დააჩქარა შეხვედრის დასასრული.
ვლადიმერს არ დასჭირვებია ბევრი აქცენტირებული დარტყმის შესრულება - ორივე ხელით რამდენიმე მოქნევაც საკმარისი აღმოჩნდა იმისთვის, რომ ამერიკელი ნოკაუტში გაეშვა. ტომპსონმა ათ თვლამდე წამოდგომა შეძლო, მაგრამ ბრძოლის გაგრძელების სურვილი არ ჰქონდა. თანაც, წონასწორობას ძლივს იკავებდა და მსაჯმაც ამ ცალმხრივი ბრძოლის შეწყვეტა ბრძანა.
ასე რომ, რევანში არ შედგა. ტომპსონს 2008 წელს გამართული ბრძოლის შემდეგ ბევრი არაფერი შეუძენია. კლიჩკომ კი თავისი საქმე უმაღლეს დონეზე შეასრულა და ახლა 14 ნოემბერს გამოჩნდება რინგზე, ოღონდ ჯერ მეტოქის ვინაობაა გასარკვევი.
ყოველდღიური სპორტული გაზეთი "ლელო"
