31 წლის დევიდ ჰეიმ (26-2, 24KO) აასრულა ბრძოლისწინა დანაპირები და ნაადრევი გამარჯვება მოიპოვა 29 წლის დერეკ ჩისორასთან (15-4-0, 9KO). თუმცა "ჰეიმეიკერმა" ბოლომდე ვერ გამოიცნო პროგნოზი, რადგან პირველი სამი რაუნდის შემდეგ ჰქონდა დაგეგმილი ბრძოლის დასრულება, მაგრამ წარმოშობით ზიმბაბველმა ჩისორამ მეხუთე რაუნდამდე გაძლო. იმას, რაც "აპტონ პარკზე" სახელდახელოდ დაგებულ რინგზე მოხდა, ჰეის მხრიდან სრული დომინირება ჰქვია.
ვიდეო ტრადიციულად, პირველივე წუთებიდან ჰეიმ ინიციატივა დაუთმო მეტოქეს და მეორე ნომრად მუშაობა. თუმცა უკვე რამდენიმე წამის შემდეგ დევიდისთვის საგანგაშო სიგნალი გაისმა - მან ჩისორას გვერდითი ძლიერი დარტყმა
დევიდს სისწრაფეში კოლოსალური უპირატესობა ჰქონდა და ამის ხარჯზე იცილებდა მეტოქის ძლიერ, მაგრამ ერთფეროვან დარტყმებს. ამასთან, ჰეი კონტრშეტევების შესრულებასაც ასწრებდა. მან კარგად იცოდა, რომ ჩისორას "ყბის ჩამოღება" იოლი არ იქნებოდა. ამიტომაც დარტყმებში დიდ ძალას არ აქსოვდა და რაუნდს რაუნდზე დამაჯერებლად იგებდა.
მაგრამ მეხუთე რაუნდში ჰეიმეიკერმა დარტყმების შესანიშნავი სერია ჩაატარა, რამაც ჩისორა შეაზანზარა - დერეკი პირველად კარიერაში რინგზე დაეცა.
იმის ნაცვლად, რომ წამოდგომის შემდეგ კლინჩში შესულიყო, მან კონტრშეტევაზე წასვლა გადაწყვიტა და ამის გამო მომენტალურად დაისაჯა. დევიდმა კვლავ გვიჩვენა "მკვლელის ინსტინქტი" და "გატეხილ" მეტოქეს ბოლო მოუღო. რამდენიმე უძლიერესი დარტყმის შემდეგ "ჰეიმეიკერმა" ისევ გაგზავნა მოწინააღმდეგე ნოკდაუნში. დერეკი ისევ წამოდგა, მაგრამ მსაჯმა ბრძოლის შეწყვეტა ბრძანა, რასაც ჩისორა დიდად არ შეწინააღმდეგებია.
გასაკვირია, რომ გუშინ დაუძინებელი მტრები რინგზე ხელგადახვეულები იდგნენ და რაღაცას ღიმილით განიხილავდნენ. შემდეგ ჰეიმ თბილი სიტყვები მონახა ჩისორას მწვრთნელის, დონ ჩარლზის მისამართით, რომელსაც 18 თებერვალს, მიუნხენის ცნობილ პრესკონფერენციაზე ყბა გაუტეხა.
ბრძოლის შემდეგ მინი-ინტერვიუში ჰეიმ შეაქო მეტოქე სიმამაცისთვის, მადლობა გადაუხადა თავის ფანებს და განაცხადა, რომ მას შემდეგ, რაც მან ამ ბრძოლაში აჩვენა, ვიტალი კლიჩკო აღარ მოისურვებს მასთან შეხვედრას.
დევიდმა დარწმუნებით განაცხადა, რომ WBC-ის ჩემპიონი ისეთ მეტოქეს აირჩევს, რომლის შესახებაც არავის არაფერი ეცოდინება. შემდეგ წავა კრივიდან და პოლიტიკოსი გახდება. "მაგრამ, თუ ვიტალი მზად არის ჩემთან საჩხუბრად, მეც ვისურვებდი მასთან ბრძოლას", - განაცხადა ჰეიმ.
ჩისორამ კი აღნიშნა, რომ არ აპირებს პაუზის აღებას და რინგზე მალე დაბრუნდება: "მომეწონა ბრძოლა, წამოვდექი და მზად ვიყავი გასაგრძელებლად, მაგრამ ეს კრივია - ვიღაც გამარჯვებული უნდა იყოს და ვიღაც - დამარცხებული. მაგრამ მე დავბრუნდები".
მთავარი, რაც ამ ბრძოლამ გვიჩვენა, ის არის, რომ ჰეის არ დასტყობია ერთწლიანი პაუზა და ის მზად არის, ნებისმიერ თანამედროვე სუპერმძიმეწონოსანს გაუმართოს ღირსეული ბრძოლა.
ყოველდღიური სპორტული გაზეთი "ლელო"
