საშუალო წონაში WBC-ის ჩემპიონმა სერხიო მარტინესმა ესპანური ტელეარხისთვის მიცემულ ინტერვიუში ბრძოლაში გამოიწვია მსოფლიოს ერთ-ერთი საუკეთესო მოკრივე, პირველ საშუალო წონაში მსოფლიოს ჩემპიონი ფლოიდ მეივეზერი. 37 წლის მარტინესი ამჟამად აღდგენით პროცესს გადის იმ ტრავმებისგან, რომელიც ხულიო სესარ ჩავესთან ბრძოლაში მიიღო, მაგრამ არგენტინელი ირწმუნება, რომ მომავალი წლის ნოემბრამდე შეხვდება დაუმარცხებელ ამერიკელს. რაც შეეხება მენი პაკიაოსთან სავარაუდო ბრძოლას, მარტინესმა განაცხადა, მასთან წონაში დიდი სხვაობაა.
"როგორც კი ხელში ჩაგიგდებ, ისევე დაგიმტვრევ ძვლებს, როგორც ეს ჩავესთან ბრძოლაში გავაკეთე, - ამბობს მარტინესი. - ჩავესს განადგურებას დავპირდი და
მოემზადე, ფლოიდ, 2013 წელს მოგძებნი. ის ცაში დაფრინავს, მაგრამ, როგორც კი ჩემს სიტყვებს გაიგონებს, მიწაზე დაეცემა.
პაკიაოსთან ბრძოლა შეუძლებელია. წონაში დიდი სხვაობაა. მაქსიმალური წონა, რომელიც მან შეიძლება აკრიფოს, 65 კილოგრამია, ჩემი მაქსიმალური წონა კი 70 კილოგრამს შეადგენს".
* * *
ბერლინური პრომოუტერული კომპანია Sauerland Event-ის ხელმძღვანელები - ვილფრიდ და კალე ზაუერლანდები სამ სუპერმძიმეწონოსანს სთავაზობენ WBA-ს, IBF-ისა და WBO-ს ჩემპიონ ვლადიმერ კლიჩკოს.
პირველი ვარიანტია WBA-ს რეგულარულ ჩემპიონთან, ალექსანდრ პოვეტკინთან შეხვედრა. ამ ბრძოლის გამართვის სავარაუდო თარიღი 2013 წლის გაზაფხულია.
მეორე ვარიანტის მიხედვით, Sauerland Event-ის მებრძოლმა კუბრატ პულევმა მიიღო უკრაინელ ჩემპიონთან შეხვედრის შანსი მას შემდეგ, რაც 29 სექტემბერს ჰამბურგში დაამარცხა ალექსანდრ უსტინოვი და IBF International-ის ტიტული მოიპოვა.
მესამე ვარიანტი: რობერტ ჰელენიუსმა უნდა გაიუმჯობესოს საკუთარი პოზიციები IBF-ის რეიტინგში, რათა მიიღოს მსოფლიოს ჩემპიონთან შეხვედრის უფლება.
"ასე რომ, მივიღებთ ჩემპიონის ტიტულის მოგების სამ შანსს და მოვაწყობთ უმაღლესი კლასის ბრძოლებს", - განაცხადა ვილფრიდ ზაუერლანდმა.
* * *
ერთ-ერთ წინა ნომერში ვწერდით იმის შესახებ, რომ ვლადიმერ კლიჩკო 2016 წელს რიო-დე-ჟანეიროს ოლიმპიადაზე გამოსვლას აპირებდა. უკრაინელს სურდა 1996 წლის ზაფხულის თამაშებზე ტრიუმფიდან 20 წლის თავზე, ისევ მოეგო ოლიმპიადის ოქროს მედალი, მაგრამ ჩემპიონის ოცნებებს ასრულება არ უწერია.
გერმანიის კრივის ფედერაციის პრეზიდენტმა იურგენ კიასმა განაცხადა, რომ ოლიმპიადაზე მონაწილეობა შეუძლიათ 40 წლამდე ასაკის მოკრივეებს. გარდა ამისა, მათ პროფესიულ რინგზე არ უნდა ჰქონდეთ ჩატარებული 15 ბრძოლაზე მეტი.
ამჟამად ვლადიმერ კლიჩკოს ანგარიშზეა 61 ბრძოლა და თან, 2016 წლის ოლიმპიადის დაწყებამდე ოთხი თვით ადრე ის 40 წლის გახდება.
ყოველდღიური სპორტული გაზეთი "ლელო"
