ახალ(ი)კაცი ფურგონის ამალაში

ყაზახეთის ყოფილმა დედაქალაქმა მსოფლიო კრივის წარმომადგენელთა თავყრილობას უმასპინძლა. ალმათიში ორი მნიშვნელოვანი ღონისძიება გაიმართა - AIBA-ს (კრივის საერთაშორისო ასოციაცია) კონგრესი და კონტინენტური ასოციაციების გენერალური ასამბლეა. დელეგატთა შორის გახლდათ საქართველოს კრივის ეროვნული ფედერაციის გენერალური მდივანი ვლადიმერ ახალკაცი.

კრივის საერთაშორისო ასოციაციის კონგრესმა AIBA-ს პრეზიდენტად მომავალი ოთხწლიანი ვადით ისევ ტაივანელი ჩინგ კუ ვუ აირჩია, რომელმაც ორგანიზაციის აღმასკომის წევრად ვლადიმერ ახალკაციც დაასახელა. ამ უკანასკნელმა კი თავისი კანდიდატურა აზერბაიჯანელი კოლეგის - სულეიმან მიქაელოვის სასარგებლოდ მოხსნა. როგორც გაირკვა, ევროპის კრივის კონფედერაციის მესაჭეს, ფრანგ ჰუმბერტ ფურგონს თანამდებობაზე ხელმეორედ არჩევის შემთხვევაში ახალკაცი უფრო ადრე ჰყოლია შეგულებული თავისი ორგანიზაციის აღმასკომის წევრად. ჩვენებურიც ყაბულს ყოფილა და სიტყვის ერთგული დარჩა. ევროპელმა კონფედერანტებმა ასამბლეაზე თავკაცად ისევ ფურგონი აირჩიეს, ხოლო 16-კაციან აღმასკომში ბებერი კონტინენტის 46 ქვეყნის წარმომადგენლებმა ფარული კენჭისყრით ერთხმად დაუჭირეს მხარი ახალკაცის კანდიდატურას. იგი პირველი ქართველია, რომელიც ევროპის კრივის კონფედერაციის აღმასკომში მოხვდა.

- სიტყვის გატეხვა არ მჩვევია, ბოლომდე ჩემი პრინციპების ერთგული ვრჩები, ამიტომაც ევროპის კონფედერაციაში მუშაობა ვამჯობინე. ასეთი პრესტიჟული ორგანიზაციის აღმასკომში არჩევა დიდი პატივია და მას იმ დიდი დამსახურების დასტურად მივიჩნევ, რომელიც ჩვენს ფედერაციას მსოფლიო კრივის განვითარებაში მიუძღვის. საერთაშორისო სარბიელზე პატივს გვცემენ, გვაღიარებენ, როგორც დიდი ავტორიტეტის მქონე ორგანიზაციას. ეს კი ჩვენი სახელოვანი სპორტსმენების - ოლიმპიური თამაშების, მსოფლიოს და ევროპის ჩემპიონატების მედალოსნების მონაპოვარია. განსაკუთრებით უნდა აღინიშნოს კრივის ეროვნული ფედერაციის თავკაცის, ევროპარლამენტის ვიცე-პრეზიდენტის პეტრე ცისკარიშვილის ღვაწლი, საქართველოს ეროვნული ოლიმპიური კომიტეტისა და სპორტის სამინისტროს თანადგომა და დახმარება. ვეცდებით, უფრო ავამაღლოთ ფედერაციის ავტორიტეტი, ხელთათმანის ქართველი ოსტატები კი უფროსი თაობის მონაგარს ერთიორად გაამდიდრებენ.

- თქვენ სპორტსმენების დამსახურება ახსენეთ. ორიოდე კვირაში ჩვენს ათლეტებს ეროვნული ჩემპიონატი ელით...
- დიახ, 22-25 ნოემბერს ქუთაისის სპორტის სასახლე მოკრივეთა საქართველოს ჩემპიონატს უმასპინძლებს. რინგზე გამოცდილებთან ერთად ახალგაზრდებსაც ვიხილავთ, რომლებიც ეროვნულ ნაკრებში ადგილის დაბევებას შეეცდებიან, რათა გაისად, 19-30 სექტემბერს, ბაქოში სალიცენზიო მსოფლიოს ჩემპიონატში იასპარეზონ. ყველაფერი უნდა გავაკეთოთ საიმისოდ, რომ 2012 წელს ლონდონის ოლიმპიადაზე სულ მცირე სამი კონკურენტუნარიანი მოკრივით წარვსდგეთ.


ყოველდღიური სპორტული გაზეთი
"ლელო"