ამასწინათ ეროვნულ სტადიონზე საქართველოს მძლეოსნობის ფედერაციის თასის გათამაშებისას ლაშა ღულელაური კვარცხლბეკზე ორჯერ ავიდა: ახმეტელმა ათლეტმა სამხტომში პირველი ადგილი დაიკავა, სიგრძეზე ხტომაში კი მეორე იყო.მძლეოსნობაში ვარჯიში 6 წლისამ დაიწყო, მამის - ქვემო ალვანის საჯარო სკოლის ფიზაღზრდის მასწავლებლის, იუსუფ ღულელაურის ხელმძღვანელობით. თავიდან თანატოლებთან ერთად რბენაში იწაფებოდა. მერე სიგრძეზე ხტომამ გაიტაცა. რაიონულ პირველობაზე დებიუტი 4,6 მეტრის დაძლევით აღნიშნა. ეს იყო ექვსი წლის წინათ. ფედერაციის თასის გათამაშებაზე კი პირადი რეკორდი დაამყარა - 7,56 მეტრი.
- წლეულს ტრავმებს რომ არ გავეწამებინე, უკეთესი შედეგიც მექნებოდა,
- ყველაზე დიდ წარმატებას მაინც ტრაბზონში მიაღწიე.
- დიახ, ევროპის ახალგაზრდობის ოლიმპიურ ფესტივალზე სამხტომში 15,49 მეტრით მეორე ადგილი დავიკავე და ოქროსმედალოსან შვეიცარიელ- რობერტ კლარკს სულ ერთი სანტიმეტრით ჩამოვრჩი. იმ შეჯიბრების მოგებაც შეიძლებოდა, მაგრამ სპორტული ფორმა არ მქონდა სრულად აღდგენილი: წლეულს ისლანდიაში ევროპის გუნდურ ჩემპიონატზე გამოსვლისას კუნთი დამეჭიმა. ტრავმამოუშუშებელმა ლილში ახალგაზრდების მსოფლიოს პირველობაზე მოვსინჯე ძალები, მაგრამ ექვსიდან მხოლოდ 3 ცდის გამოყენება შევძელი და 15.08 მეტრით მერვე ადგილი დავიკავე. მართალია, თურქეთში ეს შედეგი 41 სანტიმეტრით გავაუმჯობესე, მაგრამ გამარჯვებისთვის მაინც არ მეყო.
- ფედერაციის თასზე?
- ამჯერად მეტი ყურადღება სიგრძეზე ხტომას დავუთმე. პირადი რეკორდი 32 სანტიმეტრით გავზარდე. სამხტომისთვის, ეტყობა, ძალები არ მეყო, თუმცა შედეგებით კმაყოფილი ვარ. ორი წლის განმავლობაში ტრავმების გამო ისე ვიყავი იმედგაცრუებული, არც კი მეგონა, წარმატებას თუ მივაღწევდი. ორდღიანმა ასპარეზობამ კი რწმენა დამიბრუნა. მომავალ შეჯიბრებებში ვეცდები, ქომაგები გავახარო.
- მერედა, მოსამზადებლად ალვანში სათანადო პირობები თუ გაქვს?
- სოფლის პირობაზე არა უშავს. გაისად სკოლას დავამთავრებ და თბილისში გადმოვალ საცხოვრებლად. ამის შემდეგ სავარჯიშოდ პირობები უკეთესი მექნება და, ალბათ, შედეგებიც.
- სწავლის გაგრძელებას სად აპირებ?
- სპორტული მედიცინის სპეციალისტი მინდა გავხდე.
- როგორ სწავლობ?
- საწვრთნელი შეკრებები და შეჯიბრებები ბევრ დროს თუ არ წამართმევს, სკოლას, ალბათ, ოქროს მედალზე დავამთავრებ.
- მძლეოსნობის გარდა, რა გიტაცებს?
- კალათბურთი. ძალიან გამიხარდა ჩვენი ნაკრები ლიტვაში ევროპის ჩემპიონატის 12 საუკეთესო გუნდში რომ მოხვდა. განსაკუთრებით ვიქტორ სანიკიძის ლაღი თამაში მხიბლავს. ასე გგონია, დაფრინავსო. უცხოელთაგან ჯორდანი და შაკილ ონილი მომწონს.
- რაზე ოცნებობ?
- შეიძლება, ხმამაღალი ნათქვამი გამომივიდეს, მაგრამ ჩემი უპირველესი მიზანია ოლიმპიურ თამაშებში მონაწილეობა და ოქროს მედლის მოპოვება, ოცნება კი - ვიქტორ სანეევის უნიკალური რეკორდის მოხსნაა. ვერ წარმოიდგენთ, როგორ მინდა ამ ზღაპრულ პიროვნებას შევხვდე და მისი რჩევები მოვისმინო. მჯერა, ეს წარმატებების მიღწევაში დამეხმარება.
ყოველდღიური სპორტული გაზეთი "ლელო"
