სპორტული სიარული, ისიც 50 კილომეტრზე, მძლეოსნობის ერთ-ერთი ურთულესი სახეობაა. ერთ დროს მას საქართველოშიც ჰყავდა მიმდევრები, რომლებიც წარმატებებსაც აღწევდნენ. მაგალითად, ფოთელი ალექსანდრე შჩერბინა და რუსთაველი იგორ დელა-როსა საბჭოთა კავშირის ჩემპიონატების ვერცხლისა და ბრინჯაოს მედალოსნებიც არიან. შჩერბინამ 1965 წელს საბჭოთა კავშირის რეკორდიც კი დაამყარა, მანამდე ხუთი წლით ადრე კი რომის ოლიმპიურ თამაშებში IV ადგილი დაიკავა, ხოლო დელა-როსა მეხიკოს ოლიმპიადაში მონაწილეობდა.
11 აგვისტოს ლონდონის ოლიმპიურ თამაშებში საქართველოს კიდევ ერთი მძლეოსანი მოსინჯავს ძალებს - 50 კილომეტრზე სპორტულ სიარულში მაჩეი როშიევიჩი იასპარეზებს.
34 წლის სპორტსმენი
მაჩეი 12 წელიწადია, სკოლაში ფიზკულტურის მასწავლებლად მუშაობს. ორი წლის წინათ პოლონეთის მძლეოსნობის ფედერაციასთან პრობლემები შეექმნა. დიდი სპორტისთვის თავის დანებებას აპირებდა, მაგრამ მეგობრების რჩევით გადაიფიქრა და ფედერაციის შეცვლა გადაწყვიტა.
- ბევრი არ მიფიქრია და იცით რატომ? - გვითხრა თბილისში ჩამოსულმა როშიევიჩმა. - 2008 წელს რუსებმა ზუსტად პეკინის ოლიმპიადის გახსნის დღეს საქართველო დაბომბეს, რაც ოლიმპიური იდეალების საწინააღმდეგო ქმედება იყო.
ძველ საბერძნეთში, სადაც ოლიმპიური თამაშები ჩაისახა, ოლიმპიელების მსვლელობისას ყველა ელინურ სახელმწიფოს ეკრძალებოდა ომის გაჩაღება.
ამ პრინციპს დღემდე ინარჩუნებს ოლიმპიური ქარტია, თუმცა რუსებმა ის დაარღვიეს, მაგრამ დაუსჯელი დარჩნენ. იმ ომის შემდეგ ჩემი ყურადღება თქვენმა ქვეყანამ კიდევ ერთხელ მიიპყრო, როცა თბილისს პოლონელების საყვარელი პრეზიდენტი ლეხ კაჩინსკი ეწვია. აქ მას დიდი პატივისცემით შეხვდნენ.
ერთი მნიშვნელოვანი ფაქტიც მინდა აღვნიშნო: როცა ლეხ კაჩინსკი ავიაკატასტროფაში დაიღუპა, საქართველოს პრეზიდენტი მიხეილ სააკაშვილი ,ვულკანის ამოფრქვევასთან დაკავშირებული საშიშროების მიუხედავად, დიდი რისკის ფასად ვარშავაში ჩამოფრინდა და ისე მიუსამძიმრა პოლონელ ხალხს.
ყოველივე ზემოაღნიშნულის შემდეგ, საქართველოს გარდა, სხვა ქვეყნის მოქალაქეობაზე შემეძლო მეფიქრა?! რა თქმა უნდა არა. ლონდონში ჩვენი ქვეყნის სპორტული ღირსების დასაცავად არაფერს დავიშურებ...
როგორც ვთქვით, მაჩეი როშიევიჩი 50-კილომეტრიან დისტანციაზე დღეს გავა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
