ქართველ მშვილდოსან ქალთა ნაკრებმა დანიის დედაქალაქ კოპენჰაგენში მიმდინარე მსოფლიოს სალიცენზიო ჩემპიონატზე რიო დე ჟანეიროს ოლიმპიადის საგზური მოიპოვა! ესაა ისტორიაში პირველი შემთხვევა, როცა ჩვენებმა ასე გუნდურში გაინაღდეს ლიცენზია, რაც კომფორტულია იმდენად, რომ ოლიმპიადაზე სრული გუნდით, ანუ სამი მონაწილით წარდგები და თან განაღდებული გაქვს გამოსვლა ორ დისციპლინაში - პირადშიც და გუნდურშიც. ამ ისტორიულ გამარჯვებას ჩვენებმა გუშინ, 28 ივლისს მიაღწიეს, როცა გუნდურ ტურნირზე პლეი ოფის პირველ წრეში იტალიის ძლიერი ნაკრები 5:1 დაამარცხეს და მერვედფინალში გავიდნენ, რაც ავტომატურად იძლევა საგზურს.
ჩვენმა სამეულმა - ხათუნა
ჩვენებმა ახლანდელი შედეგით გუნდურში მსოფლიოს ორგზის ჩემპიონი იტალია ულიცენზიოდ დატოვეს.
ახლა მადლობაც უნდა ვთქვათ, რომ პირველ წრეში კრიზისში მყოფი იტალია შეგვხვდა; მადლობა იმისთვისაც, რომ მეშვიდე ადგილისთვის პაექრობა გადასროლაში გერმანიას არ მოვუგეთ - მეშვიდეზე გასვლის შემთხვევაში ინდოეთი გვერგებოდა, რომელიც ნამდვილად არაა კრიზისში და კოპენჰაგენში ფინალშიც გავიდა.
გუშინვე ჩვენებმა კიდევ ერთხელ დაამარცხეს ვალეევა და იტალიელები - შერეულ წყვილებში, თუმცა მანამდე გუნდურში ისროლეს მეოთხედფინალში, სადაც სამხრეთკორეელთა ძლიერ ნაკრებთან 2:6 დათმეს. ჩვენებმა მხოლოდ მესამე სეტის მოგება შეძლეს - 56:54, დანარჩენები კი 52:53; 56:58 და 54:56 წააგეს.
მათ თავიანთი წილი საქმე ნამდვილად გააკეთეს და ამისთვის საყვედური არ ეთქმით, თუმცა დღევანდელი კორეა ადრინდელივით დაუმარცხებელი რომ არაა, ნახევარფინალში რუსებმა გვაჩვენეს - ძირითადი სერია 4:4 დასრულდა, დამატებითში კი 28:27 მოუგეს და ფინალში გავიდნენ, სადაც 2 აგვისტოს ინდოეთს შეხვდებიან.
იმავე დღეს ბრინჯაოსთვის კორეა და იაპონია იასპარეზებენ.
ისე, ცოტა არ იყოს, არაპროგნოზირებადი შეჯიბრება გამოვიდა - იაპონიამ ჩინეთს მოუგო, რუსეთმა კორეამდე მექსიკასაც მოუგო, ტაივანი კი, რომლის სპორტსმენმაც შესარჩევი ეტაპი მოიგო და ათეულში ორი მსროლელი ჰყავს, კოლუმბიასთან დამარცხდა... არადა, სამხრეთამერიკელებს მსოფლიოს პრიზიორი ნატალია სანჩესი კი ჰყავდათ, მაგრამ აკლდათ მსოფლიოს ჩემპიონი ასტრიდე ვან ლომეონი.
იტალიელთა გარდა, ულიცენზიოდ დარჩნენ ძლიერი გუნდები: ტაივანი, გერმანია, საფრანგეთი, პოლონეთი, უკრაინა, აშშ...
შერეული სიძლიერე
ჩვენი შერეული წყვილი ისევ ნარიმანიძემ და ლაშა ფხაკაძემ შექმნეს, როგორც ჩვენს ქალთა და ვაჟთა გუნდებში საუკეთესოებმა. მეორე წრეში მათ ღირსეული რევანში აუღეს იტალიელთა ზეტიტულოვან წყვილს - ოლიმპიურ ჩემპიონ მაურო ნესპოლისა და მსოფლიოს ოთხგზის მომგებ ვალეევას ბაქოში, პირველი ევროპული თამაშების ფინალში მარცხისთვის. ქართულმა დუეტმა მათ სამივე სეტი მოუგო და 6:0 დაამარცხა (35:34; 36:35; 38:33). მანამდე ჩვენებმა უკრაინელებსაც მოუგეს - 6:2. მათ ვერონიკა მარჩენკოსა და მარკიან ივაშკოს წყვილს თავიდან 35:32; 36:33 მოუგეს. მესამე 35:37 დათმეს, მაგრამ მეოთხეში ისევ გაისწორეს სამიზნე და სოლიდური უპირატესობით, 38:30 აჯობეს.
ნახევარფინალში ჩვენებმა ტაივანელთა დუეტთან - ში-ჩია ლინთან და ჩენ-ვეი კუოსთან 0:6 წააგეს (31:36; 33:36; 31:36). 2 აგვისტოს ქართველები ბრინჯაოს მედლისთვის ჩინეთს გაეჯიბრებიან.
დღეს კოპენჰაგენში პირადი პირველობის პლეი ოფები დაიწყება ვაჟებშიც და ქალებშიც. კიდევ ერთხელ შეგახსენებთ ჩვენებურთა მეტოქეებს: ესებუა პირველ წრეში პოლონელ მილენა ბარაკონსკას ხვდება, ნარიმანიძე - შვეიცარიელ ცელინ შობინგერს, ლობჟანიძე - ამერიკელ არიელ გიბილაროს, ვაჟებში ფხაკაძე კი ეგვიპტელი აჰმედ ელ-ნემრის დამარცხებას ეცდება.
თუმცა ფხაკაძეს მთავარი ბრძოლა 31 ივლისს ელოდება, როცა სალიცენზიო ტურნირი ჩატარდება და იქ უნდა იასპარეზოს. წარმატების მისაღწევად აუცილებელია მეოთხედფინალში გავიდეს, ანუ 8 საუკეთესოს შორის მოხვდეს.
ყოველდღიური სპორტული გაზეთი "ლელო"
