შოთა ბეთლემიძემ MMA-ს შეჯიბრებაში ირანელი მეტოქე 14 წამში გალახა [VIDEO]

ამ დღეებში წარმატებით დაასრულეს ქართველმა სპორტსმენებმა კიდევ ერთი შეჯიბრება შერეულ ორთაბრძოლებში (MMA).

მათ ერევანში ARM FC-ს ეგიდით გამართულ შეჯიბრებაში იასპარეზეს. სომხეთის არენაზე სულ 16 წყვილი დადგა ერთმანეთის წინააღმდეგ. მასპინძლების და ქართველთა გარდა, ბრძოლებში ირანელმა და ყაზახმა სპორტსმენებმაც მიიღეს მონაწილეობა.

ყველაზე შთამბეჭდავი აბსოლუტური წონითი კატეგორიის გორელი წარმომადგენლის, შოთა ბეთლემიძის ბრძოლა აღმოჩნდა. იგი ირანელ მოჰსენ მოჰტარის ორთაბრძოლის დაწყების მაუწყებელი გონგისთანავე ეკვეთა და მაშინვე იმდენი და ისე ძლიერად ურტყა, რომ სულ რაღაც 14 წამში დანებება აიძულა.

ერთი წუთი ეყო კიდევ ერთი ირანელი მოწინააღმდეგის დასამარცხებლად თამაზ ბოჭორიშვილს (70 კგ). სამ-სამი რაუნდი დასჭირდათ აგრეთვე ირანელებთან წარმატების მოსაპოვებლად გიორგი ლობჟანიძეს (84) და გიორგი ქველაძეს (93). კიდევ ერთ ქართველს, გიორგი ტაბატაძეს 93 კგ-ში სომეხ მეტოქესთან უწევდა დაპირისპირება, მაგრამ ვიზავი ბოლო წუთს აღარ გამოუცხადდა ჩვენებურს.

ეს ARM FC-ს მიმდინარე შეჯიბრების (დაიწყო გასული წლის 15 ნოემბერს) მორიგი ეტაპი გახლდათ. მომდევნო ეტაპი ფინალური იქნება ბეთლემიძისა და ლობჟანიძისთვის.

ბეთლემიძის მეტოქე უკვე ცნობილია, 9 ოქტომბერს ის ყაზახ აშხან დალილაზაროვს დაუპირისპირდება. ფინალში გასასვლელად თითო შეხვედრის მოგება რჩებათ ქველაძეს, ლობჟანიძეს და ტაბატაძეს.

(იბეჭდება მცირე ცვლილებით)
ყოველდღიური სპორტული გაზეთი "ლელო"