ძიუდოისტ ლაშა შავდათუაშვილის დამსახურებით, ლონდონის ოლიმპიადის მეორე დღე ჩვენთვის პირველზე წარმატებული კი აღმოჩნდა, თუმცა გორელი ფალავანის კვარცხლბეკზე ასვლამდე ქართველი ქომაგისთვის გუშინდელი დღეც მძიმე მარცხით დაიწყო. თან, ამჯერად ის ჩვენი დელეგაციის ყველაზე ტიტულოვან წევრ ნინო სალუქვაძეს შეემთხვა. ტყვიის სროლაში ევროპის სამგზის, მსოფლიოსა და ოლიმპიურმა ჩემპიონმა თავის მეშვიდე ოლიმპიადაზე გუშინ პნევმატური იარაღიდან ისროლა და არათუ ფინალში ვერ მოხვდა, ძალიან დაბალი შედეგი ჰქონდა - 376 ქულა, რითაც 49 მონაწილეს შორის 33-ე ადგილი დაიკავა.
ვერ გეტყვით, რა იყო ასეთი მარცხის მიზეზი - იარაღის პრობლემა,
ფაქტი ერთია, რომ მან ძალიან დაბალი შედეგი აჩვენა. თავად შეადარეთ - ამ სახეობაში მისი რეკორდი 391 ქულაა, ახლანდელ მაჩვენებელს კი უკვე ჩვენი ახალგაზრდები უახლოვდებიან და აქა-იქ ამაზე უკეთესსაც აგროვებენ. ცხადია, ზედმეტია ლაპარაკი სალუქვაძის ოსტატობაზე - ამ მხრივ შეუდარებელია, მაგრამ ფაქტია, რომ ასეთი მარცხი მოუვიდა.
აქ ერთი საინტერესო მომენტიც უნდა შევნიშნოთ - რატომღაც სალუქვაძეს წლეულს ამ სახეობაში ბევრად უფრო უჭირდა ასპარეზობა, ვიდრე - სპორტულში. წლეულს სამჯერ გამოვიდა ამ სახეობაში - ევროპის პირველობაზე (აქ სპორტული არც თამაშდებოდა), მილანისა და მიუნხენის მსოფლიოს თასებზე და ვერცერთხელ პნევმატურში ფინალში ვერ გავიდა, სპორტულში კი ორივეჯერ შევიდა. თან, მილანში პნევმატურში ასე ცუდად იასპარეზა - 375 ქულა და მეორმოცე ადგილი!
ლონდონში ოლიმპიადაზე გამოსვლა სალუქვაძემ გუშინ საკმაოდ ცუდად დაიწყო - 93 ქულა დააგროვა და მთელ ტურნირზე ერთადერთი 8-იანიც აქ გაარტყა. ამის შემდეგ 8-იანს აღარ გაჰკარებია, მაგრამ მისი ნასროლი უმეტესად 9-იანის ზონაში ხვდებოდა, 10-იანები კი შედარებით ნაკლებად ჰქონდა.
მესამე სერიაში სულაც ორი 10-იანი გაარტყა, დანარჩენები კი 9-იანში დასვა. ყველაზე მაღალი მაჩვენებელი ბოლო, მეოთხე სერიაში დააგროვა - 96 ქულა, მაგრამ ადრე დაკარგული ვერაფრით აინაზღაურა და ტურნირსაც გამოეთიშა.
თავად ტურნირი ცოტა უცნაურად წარიმართა - ლიდერთა სამეული საკვალიფიკაციოდან ფინალის ბოლომდე არ შეცვლილა, მხოლოდ ერთმანეთში გაცვალეს ადგილები, თუმცა ესეც მეორე-მესამე ნომრებმა, თორემ პეკინის ოლიმპიადის ჩინელმა ჩემპიონმა ვენჯუნ გუომ ორივე ეტაპზე შესანიშნავად იასპარეზა. მან შესარჩევი 388 ქულით მოიგო, უკრაინელი მსოფლიოსა და ოლიმპიური ჩემპიონი ოლენა კოსტევიჩი და ფრანგი ევროპის ჩემპიონი სელინ გობერვილი კი თითო ქულით ჩამორჩნენ.
ფინალში 386-ით შევიდა ჩინელი იულინგ სუ, ფინალურ ოქტეტს კი 385-ქულიანთა კვარტეტი აგვირგვინებდა, რომელშიც სერბი მსოფლიოს ჩემპიონი ზორანა არუნოვიჩი, ჩეხი ოლიმპიადის ვერცხლისმედალოსანი ლენკა ჰიკოვა-მარუსკოვა, ბელარუსი ევროპის ჩემპიონი, მსოფლიოს ორგზის ბრინჯაოს პრიზიორი ვიქტორია ჩაიკა და ახალგაზრდა რუსი, ევროპის მედალოსანი ლიუბოვ იასკევიჩი შედიოდნენ.
ფინალი მომავალმა ჩემპიონმა, ჩინელმა გუომ ისეთი შედეგით დაიწყო, მის ადგილას ბევრს ხელი აუკანკალდებოდა - 8.0, მაგრამ აზიელები ხომ მყარი ფსიქოლოგიით გამოირჩევიან?! ჰოდა, გუოც ვაჟკაცურად წავიდა მეორე ოლიმპიური მწვერვალისკენ, სამიზნე გაისწორა და საბოლოოდ მაინც მშვენიერი მაჩვენებელი დადო - 100.1 ქულა.
თუმცა ფინალში მას ჩაიკამ "გადაუფრინა" - 100.2 დააგროვა, მაგრამ კოსტევიჩმა და გობერვილმა ბევრად ცუდად ისროლეს. საინტერესოა, რომ მათ აქაც ერთნაირი მაჩვენებელი აღმოაჩნდათ - 99.6 ქულა, რითაც ჩინელს ვერ გაუთანაბრდნენ.
გუომ ჯამში 488.1 ქულა დააგროვა და მეორედ გახდა ოლიმპიური ჩემპიონი. ვერცხლის მედლის მფლობელის გამოსავლენად კი დამატებითი გასროლა გახდა საჭირო, რადგან ორივემ ჯამში 486.6 დააგროვა. იმ დამატებით სროლაში უფრო ზუსტი ფრანგი აღმოჩნდა - 10.6 გაარტყა, კოსტევიჩის ნასროლი კი 9.7 იყო. ამიტომ ვერცხლის მედალი გობერვილმა მოიპოვა, უკრაინელს კი ბრინჯაო დარჩა.
ახლა დაველოდოთ 1 აგვისტოს, როცა სალუქვაძე სპორტული პისტოლეტიდან ისვრის.
ყოველდღიური სპორტული გაზეთი "ლელო"
