ამ დღეებში ნინო სალუქვაძის სახელობის ტირში დამთავრდა თბილისის თასის ღია გათამაშება პნევმატური პისტოლეტიდან სროლაში, რომელშიც დედაქალაქელ სპორტსმენებთან ერთად, ქუთაისელებიც გამოდიოდნენ. შეჯიბრებაში თვითონ სალუქვაძეს მონაწილეობა არ მიუღია, რადგან მსოფლიოს თასისთვის ემზადება. ტურნირში არც ასაკობრივი ზღვარი ყოფილა დაწესებული - ახალგაზრდებმაც და უფროსებმაც ერთად ისროლეს. ერთადერთი, მხოლოდ ქალები და ვაჟები იყვნენ გაყოფილნი.
ვაჟთა შორის გვარიანი უპირატესობით გაიმარჯვა თბილისელმა ლევან ქადაგიძემ - 658.3 ქულა.
მეორეზე ქუთაისელი შოთა გირგვლიანი გავიდა - 653.5, მესამეზე - ისევ თბილისელი ბესარიონ სირაძე 654.7-ით.
ქალთა ოქროს მედალი ქუთაისელმა მოიგო -
რაც შეეხება ნინო სალუქვაძეს, ის და ლევან ქადაგიძე 1-10 აპრილს კორეულ ჩანჯოუში გამოვლენ მსოფლიოს თასის პირველ ეტაპზე. სალუქვაძე ამ რანგის ოთხი შეჯიბრებიდან ერთს - მაისში ამერიკულ ფორტ ბენინგში გასამართს გამოტოვებს და სამში გამოვა: კორეის შემდეგ ამ რანგის შეჯიბრებებზე 23-30 მაისს მიუნხენში და 3-12 ივლისს ესპანურ გრანადაში ისვრის.
ამერიკულ ტურნეზე უარი იმ მოტივით თქვეს, რომ ძალიან ბევრი გადაფრენ-გადმოფრენა უწევდა ლამის მთელი დედამიწის ირგვლივ.
სალუქვაძე კიდევ ერთხელ დააფასა და აღიარა სროლის საერთაშორისო ფედერაციამ - მის ყოველწლიურ ჟურნალში სოლიდური ადგილი ეთმობა ჩვენებურს.
კერძოდ, კიდევ ერთხელაა ხაზგასმული, რომ ის რეკორდსმენია მსოფლიოს თასების მხრივ; მოპოვებული მედლების მიხედვით ასევე საუკეთესოა ქალთა შორის სროლის უკლებლივ ყველა სახეობაში - თოფი, პისტოლეტი თუ სასტენდო სროლა. მათ, ასევე, დაუთვლიათ, რომ დამოუკიდებლობის მოპოვების შემდეგ, ანუ 1993 წლიდან 2011-მდე სალუქვაძის მედლებით საქართველო მსოფლიოში მე-15 ადგილზეა.
ყოველდღიური სპორტული გაზეთი "ლელო"
