საქართველოს ტყვიის მსროლელთა ნაკრებმა დაასრულა მორიგი შეკრება ერევანში და 26 ივნისს სამშობლოში დაბრუნდა. ჩვენები იქ ნაცნობ მისამართზე - საპრეზიდენტო ფონდის დაფინანსებით აგებულ და უახლესი ტექნიკით აღჭურვილ სუპერთანამედროვე ბაზაზე ვარჯიშობდნენ, სადაც სპორტსმენებს ყველა პირობას უქმნიან ვარჯიშისთვის.
ერევანში ოთხი ჩვენებური გადიოდა წვრთნას, რომელთა ნაწილიც სულ მალე ესპანურ გრანადაში იასპარეზებს.
იქ 4-11 ივლისს ტყვიის მსროლელთა და მესტენდურთა მსოფლიოს თასის მორიგი ეტაპი იმართება, სადაც ორივე სასროლ სახეობაში მივიღებთ მონაწილეობას.
ესპანეთში თავდაპირველად ტყვიის მსროლელები გაემგზავრებიან - 2 ივლისის დილას, სადაც ქალთა შორის კვლავაც ჩვენი უცვლელი
მესტენდურები ესპანეთში ოდნავ მოგვიანებით - 7 ივლისს გაფრინდებიან ასეთი შემადგენლობით: ნატალია პანასი, დავით და გივი ქვათაძეები, მამუკა ზარაფიშვილი და პავლე ლაკია.
ამათგან საქართველოს სპორტისა და ახალგაზრდობის საქმეთა სამინისტრო მხოლოდ პანასს აფინანსებს, ვაჟები კი საკუთარი ხარჯებით მიდიან. კიდევ ერთხელ შეგახსენებთ, რომ ყველა მათგანი მრგვალ სტენდზე ისვრის.
გრანადაში ჯერ ტყვიის მსროლელთა შეჯიბრება გაიმართება. 6 ივლისს ქალები - 25, ვაჟები კი 50-მეტრიან დისტანციებზე შესარჩევი ციკლის პირველ ნახევარს მოიმთავრებენ, ანუ სამივე ჩვენებური ერთად გავა სტარტზე.
ისინი ამავე დისტანციებზე მეორე ნაწილსა და ფინალს კი (იქ გასვლის შემთხვევაში) 7-ში ისვრიან. 8-ში სალუქვაძე პნევმატური პისტოლეტიდან იასპარეზებს, ქადაგიძე და მაჭავარიანი კი იმავე დისტანციაზე 10 ივლისს ისვრიან.
ასევე 10-ში იასპარეზებს ნატალია პანასი, ვაჟები კი მეორე და ტურნირის ბოლო დღეს, 11 ივლისს დადგებიან სტარტზე.
ყოველდღიური სპორტული გაზეთი "ლელო"
