საყოველთაოდ ცნობილი დიზაინერი, მოდის 77 წლის კლასიკოსი ჯორჯო არმანი ჩააცმევს ლონდონის ოლიმპიადისთვის იტალიის ოლიმპიურ ნაკრებს.როგორც იტალური პრესა წერს, არმანი შეიმუშავებს სპორტსმენებისთვის აბსოლუტურად ყველა ტანსაცმელსა და სპორტულ ფორმას. ეს პირველი შემთხვევაა იტალიის ოლიმპიური კომიტეტის ისტორიაში, როცა სპორტსმენების ეკიპირებას მაღალის მოდის სახლის ემბლემა დაამშვენებს.
თუმცა, თავად ჯორჯო არმანი პირველად არ ქმნის სპორტულ ტანსაცმელს. მან შეკერა კოსტუმები ლონდონის "ჩელსისა" და მილანის "ინტერისთვის", აგრეთვე იყო ინგლისის ნაკრების დიზაინერი.
ლონდონელები ლონდონიდან გარბიან
რა თქმა უნდა, ოლიმპიადა - უდიდესი და ნანატრი მოვლენაა, რომელსაც ბევრი ბრიტანელი
ბრიტანელები სხვადასხვა მიზეზს ასახელებენ: დიდ ნაწილს სურს აირიდოს თავიდან ტურისტთა ბრბოსთან შეხვედრა, რომელიც ოლიმპიადაზე დასასწრებად ჩავა ბრიტანეთში; სხვები ამბობენ, რომ ყოველთვის ამ დროს მიდიან დასასვენებლად; ზოგიერთებს იმედი აქვთ, რომ ფულის ეკონომიას შეძლებენ და უფრო მშვიდად გაატარებენ დროს უცხოეთის კურორტებზე, რადგან, მათი აზრით, ოლიმპიადის დროს იქ დროებით ფასები დაეცემა.
გამოკითხვის ორგანიზატორები გაოცებულნი დარჩნენ შედეგებით, რადგან არ ელოდნენ, რომ ასე ბევრი ბრიტანელი გაექცეოდა ოლიმპიადას. და მიუხედავად იმისა, რომ თამაშების მთავარი სარბიელი ლონდონი იქნება, ხალხი ბრიტანეთის სხვა ქალაქებიდანაც აპირებს ქვეყნის ფარგლებს გარეთ გაქცევას.
არანაირი შეღავათი ფიფას
ინგლისი უკმაყოფილო დარჩა იმის გამო, რომ არ მიანიჭეს მსოფლიოს 2018 წლის საფეხბურთო ჩემპიონატის მასპინძლობის უფლება. ამის გამო ბრიტანულმა მხარემ ფიფასთვის სამაგიეროს გადახდა გადაწყვიტა. ბრიტანეთის დედაქალაქის მერმა უარი განაცხადა ლონდონის ოლიმპიადის მსვლელობისას ფეშენებელურ სასტუმრო Dorchester-ში ფეხბურთის საერთაშორისო ფედერაციის ჩინოვნიკთა უფასოდ განთავსებაზე.
ხუთვარსკვლავიანი სასტუმრო Dorchester, რომელიც ჰაიდ-პართან ახლოს მდებარეობს, საყოველთაოდ არის ცნობილი. "ლუქსის" კლასის უზარმაზარი ნომრები, რომელთა ფართობი სამოთახიანი ბინის ტოლფასია, ყოველთვის ფასობდა ცნობილ ადამიანებს შორის, აგრეთვე ფიფას ჩინოვნიკებშიც. მაგრამ 2012 წელს, ფედერაციის VIP-სტუმრებს ამ სასტუმროში არ დაასახლებენ. ინგლისელი ჟურნალისტები ხუმრობენ, რომ მათ მოუწევთ დამოუკიდებლად ეძებონ საცხოვრებელი და საუზმეც თავად მოიმზადონ.
მსოფლიოს 2018 წლის ჩემპიონატის მასპინძლობაზე ინგლისის განაცხადი ყველაზე მომგებიანი ჩანდა ეკონომიკური და ტექნიკური თვალსაზრისით, მაგრამ ფიფამ არჩევანი რუსეთის სასარგებლოდ გააკეთა. არჩევნების შედეგების გამოცხადების შემდეგ, ინგლისელმა საფეხბურთო ფუნქციონერებმა ერთხმად აღნიშნეს, რომ აუცილებელია ფიფა-ს სასწრაფო რეორგანიზაცია.
დაქორწინება მავნებელია
ბრიტანელი სასულიერო პირები არ ურჩევენ ქვეყნის მოქალაქეებს ლონდონის ოლიმპიადის დღეებში დაქორწინებას.
ისინი პრაქტიკულად ყოველდღიურად უჩიჩინებენ საკუთარ მრევლს: "არ დაგეგმოთ შეუღლება ოლიმპიადის ჩატარების დღეებში". როგორც ირკევა, ბევრ მღვდელს მიაჩნია, რომ ზაფხულის თამაშების დროს ლონდონში სრული ქაოსი იქნება, შესაბამისად, ასეთ დროს ქორწინება არარეკომენდირებულია, რადგან საყოველთაო გაუგებრობამ, შესაძლოა, შეყვარებულების ურთიერთობას ავნოს.
კიდევ უფრო შორს წავიდა წმინდა იოანეს ეკლესიის მსახური კეროლ რიჩარდსი. მისი რეკომენდაცია იმაში მდგომარეობს, რომ ის არ ურჩევს ბრიტანელებს ოჯახის გარდაცვლილი წევრის ოლიმპიადის დღეებში დაკრძალვას. ყოველ შემთხვევაში, არ უნდა დაამთხვიონ დასაფლავების თარიღი იმ დღეს, როცა ოლიმპიადაზე გადატვირთული სპორტული გრაფიკია და ბევრი მედალი თამაშდება. ამ ქაოსმა, შესაძლოა ზიანი მიაყენოს გარდაცვლილის სულს.
BBC-ის დიდი გეგმები
BBC აპირებს გახსნას დროებითი რადიოსადგური, რომელიც ლონდონის ოლიმპიადის მსვლელობის დროს 20 დღის განმავლობაში იმუშავებს. როგორც ექსპერტები მიიჩნევენ, მედიაჰოლდინგს რადიოსადგურის შექმნა 200 ათასი ფუნტი სტერლინგი დაუჯდება.
საგულისხმოა ისიც, რომ მაუწყებლობა განხორციელდება არა მხოლოდ რადიოსიხშირეზე, არამედ სპეციალური ვებგვერდის მეშვეობით.
BBC-ის ხელმძღვანელობამ გადაწყვიტა ახალგაზრდული არხი - BBC3 ტურნირის მთავარ არხად გადააქციოს. დღეს ეს არხი მხოლოდ საღამოობით მუშაობს: ამ დროს ეთერშია საღამოს ტელეშოუ, მაგრამ ამ ზაფხულში არხი, შესაძლოა, 24-საათიან მაუწყებლობაზე გადავიდეს.
დღისით BBC3 გადასცემს სპორტული ტურნირების ახალ ამბებს. ტრანსლიაციები ჰოლდინგს დაახლოებით 4.5 მილიონი ფუნტი დაუჯდება.
თეატრალური მარათონი
ლონდონის ცნობილი თეატრის - "გლობუსის" მსახიობები წლევანდელ გაზაფხულზე ექვსკვირიანი მარათონის მოწყობას აპირებენ. ისინი მსოფლიოს 38 ენაზე გადათარგმნილ უილიამ შექსპირის 38 პიესას ითამაშებენ. მარათონი 2012 წლის ოლიმპიადის გახსნას ეძღვნება.
მარათონის სტარტი 2012 წლის 23 აპრილს - უილიამ შექსპირის დაბადების დღეს არის დაგეგმილი. მაგალითად, პიესებს უჩვენებენ ჩინეთის ერთ-ერთ დიალექტზე, ან კიდეთ ურდუსა და შონას დიალექტებზე. ურდუ - პაკისტანის ერთ-ერთი სახელმწიფო ენაა, შონა კი ზამბაბვეში გამოიყენება.
ადრე "გლობუსში" პიესები ზულუსების დიალექტზე და პორტუგალიერ ენაზეც დაუდგამთ.
თან მარათონი, თან ექსკურსია
ოლიმპიური მარათონის განახლებული მარშრუტი ლონდონის მთავარი ღირსშესანიშნაობების - ბუკინგემის სასახლის, წმინდა პავლეს ტაძრის, პარლამენტის რეზიდენციის გასწვრივ ჩაივლის. სტარტი და ფინიში ქალაქის ცენტრშია დაგეგმილი.
"ეს მარშრუტი სპეციალურად არის შერჩეული სპორტსმენებისთვისა და გულშემატკივრებისთვის. ის დაგვეხმარება დედაქალაქის მთელი სილამაზის დემონსტრირებაში", - ამბობს ლონდონის ოლიმპიადის საორგანიზაციო კომიტეტის თავმჯდომარე სებასტიან კოე.
ყოველდღიური სპორტული გაზეთი "ლელო"
