TimeLine: გორის "დილა" და "ბარსელონა"

"ტაიმლაინში" ხშირად ვაქვეყნებთ "პარალელურ ფოტოებს", თუმცა ბოლო დროს იმდენად იმატა სხვადასხვა სივრცის, სხვადასხვა განზომილების ერთმანეთთან მიმსგავსებულმა სურათებმა, რომ სხვა გზა არ არის, დღევანდელი "ტაიმლაინი" მთლიანად ფოტოპარალელებს უნდა დავუთმოთ.

დილა და ბარსელონა
ყველას გვინახავს ფეხბურთელთა პრეზენტაციის ფოტოები, რომლებსაც ბევრი საერთო აქვს: ჩანს გუნდის ემბლემის ფონზე როგორ გადასცემს პრეზიდენტი მაისურს ახალწვეულს.

საზეიმო ცერემონიალი ძირითადად სტადიონის ფონზე მიმდინარეობს და მასმედიის წარმომადგენლებთან ერთად ქომაგებიც ადევნებენ თვალს. დაახლოებით ისე, როგორც ეს მცირე ხნის წინათ ბარსელონაში, ნეიმარის პრეზენტაციისას მოხდა.

გორის "დილას" ოფიციალურ საიტზე გამოქვეყნდა ახალწვეულის წარდგენის საინტერესო ფოტო.

შეგიძლიათ დააკვირდეთ და იპოვოთ განსხვავებები "დილას" და "ბარსას" პრეზენტაციებს შორის (უკანა პლანზე სატვირთო არ გამოგრჩეთ)...

სულაქველიძე და მარადონა
1988 წელს სსრ კავშირი ამხანაგურად გაეჯიბრა არგენტინას და 4:2 მოუგო. იმ შეხვედრის შემდეგ ისტორიას ერთი ფოტო შემორჩა - როგორ "ერჩოლება" მარადონა თენგიზ სულაქველიძეს.



გავიდა სამი ათეული წელიწადი და სულაქველიძე-მარადონას დუელი მეორედ შედგა. აი, ძველი ფოტოს თანამედროვე ვერსიაც...

ფელაინი და ლომია
ამ ფოტოპარალელს ზედმეტი გაფორმება არ სჭირდება. მარცხნივ გამოსახულია ევერტონელი მარუან ფელაინი, მარჯვნივ - ზუგდიდელი შოთა ლომია.



თუ მარუანს ერთ ასო-ბგერას მივამატებთ, მივიღებთ ლომიას შესატყვისს ინგლისურად - ფელაი(ო)ნი (ინგლისურად ლომი).

კალათბურთი და ჭიდაობა
ოთხშაბათს საქართველოს ნაკრების წევრმა ვიქტორ სანიკიძემ იტალიაში დუბლი შეასრულა - თებერვალში მოგებულ თასს სკუდეტო მიაყოლა. ფინალურ სერიაში ვიქტორის "მონტეპასკი" "რომას" "დაეჭიდა"...

სიტყვა დაეჭიდა საკალათბურთო მიმოხილვებში არაერთხელ გამომიყენებია, მაგრამ ამჯერად ბრჭყალებში ჩასმაზე დავფიქრდი, რადგან ფინალის ამსახველ ერთ-ერთ ფოტოზე თავისუფალი ჭიდაობის ილეთია გამოსახული, რომელსაც მონტეპასკელი ბობი ბრაუნი ასრულებს.



ასეთი გდება ხომ თავისუფალში არცთუ იშვიათია.

ვლადიმერი და ბრაიანტი
ნამდვილად ვერ გეტყვით, რომელ ქალაქშია გადაღებული ლენინის ძეგლის სურათი, თუმცა საინტერესო მიგნებაა.

სხვათა შორის, სამქულიანის ტყორცნის შემდეგ კობი ბრაიანტიც "ხელს ტოვებს" (საკალათბურთო გამოთქმაა ასეთი)... გამარჯვების აღნიშვნა მთლად ლენინისეული სცოდნია.



(იბეჭდება მცირე ცვლილებით)
ყოველდღიური სპორტული გაზეთი "ლელო"