ამერიკის ელჩმა სპორტი შეგვიქო

30 ივლისს დიდი სტუმრიანობა იყო საქართველოს ეროვნულ ოლიმპიურ კომიტეტში - ჯერ ევროპის ახალგაზრდული ოლიმპიური ფესტივალის მედალოსნებს უმასპინძლა, მერე - ამერიკის შეერთებული შტატების ელჩს საქართველოში რიჩარდ ნორლანდს.

ელჩის პირველი ნაცნობობა სეოკ-თან 23 ივნისს, ოლიმპიური გარბენისას შედგა, რომელშიც ამერიკელმა დიპლომატმა პირადად მიიღო მონაწილეობა.

სტუმარმა მეგობრული სიცილით მიიღო მადლობა, რომელიც ამისთვის ოლიმპიური კომიტეტის პრეზიდენტმა ლერი ხაბელოვმა გადაუხადა.

ოლიმპიურმა ჩემპიონმა ამერიკელ სტუმარს ისიც უთხრა, რომ თავისი პირველი დიდი გამარჯვება - 1982 წელს ჭაბუკთა შორის მსოფლიოს ჩემპიონობა მის მშობლიურ კოლორადოს შტატში, ქალაქ კოლორადო სპრინგსში მოიპოვა.

შეახსენა ასევე, რომ საქართველოს ოლიმპიური დებიუტიც დამოუკიდებელი ქვეყნის რანგში აშშ-ში, ატლანტაში შედგა 1996 წელს.

ხაბელოვმა ელჩს ისიც განუმარტა, რომ სეოკი მრავალი ქვეყნის ანალოგიურ ორგანიზაციასთან თანამშრომლობს და გამოთქვა სურვილი, გაღრმავდეს ურთიერთობა აშშ-სა და საქართველოს ეოკებს შორის.

"ჩვენი და თქვენი ქვეყნის სპორტის ბიუჯეტი ერთმანეთს ვერც შეედრება, მაგრამ სპორტული ტრადიციებით მართლაც მდიდრები ვართ" - უთხრა სტუმარს ხაბელოვმა.

"ვიცი, რომ საქართველო დიდი სპორტული ტრადიციების ქვეყანაა. ისიც ვიცი, რომ 2015 წელს მნიშვნელოვან სპორტულ ღონისძიებას უნდა უმასპინძლოთ, რომელიც საყურადღებო შეჯიბრებაა.

ოლიმპიურ გარბენში მონაწილეობამ დამარწმუნა, რომ საქართველოში ოლიმპიურ სულისკვეთებას ბევრი ადამიანი იზიარებს.

მიხარია, რომ დღეს თქვენი კომიტეტის სტუმარი ვარ. ჩვენს ქვეყნებს ერთმანეთთან ახლო ურთიერთობა აკავშირებს და სპორტშიც გგულშემატკივრობთ, გისურვებთ წარმატებებს" - ეს უკვე რიჩარდ ნორლანდის სამადლობელი სიტყვებია.

შეხვედრის დასასრულს ელჩს ოლიმპიური მუზეუმიც დაათვალიერებინეს და "თბილისი-2015"-ის ემბლემით დამშვენებული სუვენირებით დაასაჩუქრეს.

ყოველდღიური სპორტული გაზეთი "ლელო"