ევროკომისიის ინიციატივით, "კონრად ადენაუერის ფონდი" ატარებს არასამთავრობო ორგანიზაციების ტრადიციულ საერთაშორისო შეხვედრა-სემინარს თემაზე: "სამოქალაქო საზოგადოების დიალოგი - პროგრესისთვის". წლეულს ამ ღონისძიებას თბილისმა უმასპინძლა.
სემინარზე პირველად იქნა წარმოდგენილი ევროკავშირის მიერ დაფინანსებული ერთადერთი სპორტული პროექტი: "სკოლა+სპორტი+პოლიცია" - სპორტის მეშვეობით ბავშვთა და მოზარდთა დანაშაულის პრევენცია.
პროექტი, რომელსაც ასეთი აღიარება ხვდა წილად, "სახალისო ფეხბურთის ღია სკოლების" საქართველოს ფილიალმა შეიმუშავა.
გვესაუბრება "სახალისო ფეხბურთის ღია სკოლების" კოორდინატორი აღმოსავლეთ ევროპაში ვალერი ჩოლარია.
- ხსენებულ პროექტს საქართველოში წლეულს 10 წელი უსრულდება. დონორები სრული პასუხისმგებლობით ეკიდებიან პროგრამის რეალიზებას საწესდებო მოთხოვნების
- რას წარმოადგენს პროექტი "სახალისო ფეხბურთის ღია სკოლები" და ვინ არიან ძირითადი დონორები?
- ეს არის არაპოლიტიკური, დამოუკიდებელი, არაკომერციული, ჰუმანიტარული პროექტი, რომლის მიზანია, ხელი შეუწყოს სოციალურ ჯგუფებს შორის მშვიდობიან თანაარსებობას, თანამშრომლობას და სოციალურ ინტეგრაციას, პრინციპით "სპორტი ყველასათვის". უპირველესად, წინა პლანზე წამოწეულია ბავშვთა ინტერესები. საერთაშორისო დონორები არიან: დანიის, ნორვეგიის და შვედეთის საგარეო საქმეთა სამინისტროები, მსხვილი კომპანიები, უეფა; საქართველოში - სფფ და სპორტის სამინისტრო.
- რა მოიტანა პროექტის რეალიზაციამ საქართველოში?
- პროგრამით ორგანიზებულ 144 სკოლაში მონაწილეობდა 29 000-მდე გოგონა და ჭაბუკი, 1900-ზე მეტი მოხალისე ლიდერი და მწვრთნელი, 5000-მდე მშობელი, 79 საფეხბურთო კლუბი და სასპორტო სკოლა.
ამ სკოლებს უსასყიდლოდ გადაეცათ 22 000-ზე მეტი ბურთი, 35 000 მაისურა, 35 000 კეპი უეფას სიმბოლიკით, 30 200 წყლის სასმელი ბოთლი, 14 000-ზე მეტი პატარა და დიდი ნიშნულა, სავარჯიშო გადასაცმელი, 10 ბატუტი, 20 მინი-კარების კომპლექტი და სხვა.
პროგრამით მომზადებული მწვრთნელები ნაყოფიერად განაგრძობენ საქმიანობას. პროექტის წამყვანი ინსტრუქტორები წარმატებით ანხორციელებენ სფფ-ის მწვრთნელთა განათლების C-ლიცენზიის პროგრამას.
- რა სიახლეებია მოსალოდნელი მომავალში?
- მიზნებს ემატება სპორტის მეშვეობით მოზარდთა დანაშაულის პრევენცია და პროფილაქტიკა. შარშან და წლეულს, საქართველოს შს სამინისტროსთან შეთანხმებით, "სახალისო ფეხბურთის ღია სკოლების" მუშაობაში ჩაერთნენ საპატრულო პოლიციის ეკიპაჟები.
ეს სიახლე ჩვენ დავნერგეთ და ევროკავშირის გრანტიც მივიღეთ. 1 ოქტომბრიდან ბათუმში, ზუგდიდში, ქუთაისში, გორში, რუსთავში ვიწყებთ ახალი პროექტის "სკოლა+სპორტი+პოლიცია" რეალიზებას. პარტნიორები არიან: შინაგან საქმეთა, სპორტის, განათლების სამინისტროები, სფფ და მუნიციპალიტეტები.
პროექტში ჩაერთვება 2000-ზე მეტი ბავშვი, მწვრთნელები, ლიდერები, მშობლები და მოხალისეები. ჩატარდება ოთხი სემინარი, იმუშავებს 5-დღიანი სკოლა, გაიმართება 40-ზე მეტი ტურნირი. ეჭვიც არ გვეპარება, რომ პარტნიორებსა და დონორებთან ერთად ამოცანას წარმატებით გავართმევთ თავს.
- რატომ არ ხორციელდება პროექტი თბილისში?
- ცენტრალურ ოფისთან საგრანტო განაცხადის მომზადებისას ზემოხსენებულ ქალაქებზე შევთანხმდით. ახლა მივიღეთ ევროკავშირისა და ცენტრალური ოფისის ერთობლივი წინადადება, მეორე გრანტის მისაღებად მოვამზადოთ შუამდგომლობა თბილისის 3 რაიონისთვის. პასუხს დეკემბერში ველოდებით.
თენგიზ თომაშვილი
ყოველდღიური სპორტული გაზეთი "ლელო"
