ცნობილი პოლონელი საჭადრაკო მოღვაწის, აკიბა რუბინშტეინის 110 წლის იუბილეს მიეძღვნა ქართველი და პოლონელი დიდოსტატების - ბაადურ ჯობავას და პოლონელი დიდოსტატის, რადოსლავ ვოიტაშეკის ამხანაგური მატჩი, რომელიც პოზნანში გაიმართა.მეტოქეებმა თავიდან ოთხი კლასიკური პარტია გაითამაშეს. 2,5:1,5 გაიმარჯვა ქართველმა დიდოსტატმა, რომლის რეიტინგია 2730. სწრაფ ჭადრაკშიც მსგავსი ანგარიშით ჩვენებურმა მიაღწია წარმატებას.
საბოლოოდ ჯობავამ 5:3 აჯობა პოლონელ მოწინააღმდეგეს, რომელსაც ქართველი შემთხვევით არ გამოუწვევია დუელში: შარშან ხანტი-მანსიისკში, მსოფლიოს თასის გათამაშების მე-2 წრეში ბაადურმა სძლია პოლონელს და ამ უკანასკნელს, ცხადია, რევანში ეწადა, მაგრამ არაფერი გამოუვიდა.
იაზიჩი შვიდეულის
თურქეთის ჭადრაკის ფედერაციის პრეზიდენტი, ფიდეს ვიცე-პრეზიდენტი ალი ნიჰათ იაზიჩიმ წერილით მიმართა ჭადრაკის საერთაშორისო ფედერაციის აღმასრულებელ დირექტორ ნაიჯელ ფრიმანს, რომელშიც ნათქვამია, რომ "2010 წელს კარპოვთან ერთად საფრანგეთის, უკრაინის, გერმანიის, შვეიცარიისა და ამერიკის შეერთებული შტატების ფედერაციებმა ფიდეს სასამართლოში უჩივლეს.
ჩვენმა ორგანიზაციამ თავის დასაცავად მილიონი დოლარი დახარჯა. შემდეგ მსგავსი მოტივით განიხილებოდა სასამართლო საქმე საქართველოს და ინგლისის საჭადრაკო ფედერაციებთან".
იაზიჩი ითხოვს, რომ ფიდეს გენერალურ ასამბლეაზე სტამბულში შვიდივე ორგანიზაციას საერთაშორისო ფედერაციის წევრობის უფლებამოსილება მანამ შეუჩერონ, სანამ ისინი ფიდეს ზარალს არ აუნაზღაურებენ. თურქის წინადადება ფიდეს 83-ე კონგრესის დღის წესრიგში შეიტანეს.
ამას წინათ იაზიჩიმ ზემოთ აღნიშნული ფედერაციების არბიტრებს გზა გადაუკეტა 2012 წლის მსოფლიო საჭადრაკო ოლიმპიადაზე სამსაჯოდ. ამ შეჯიბრებას კი აგვისტო-სექტემბრის მიჯნაზე სტამბული უმასპინძლებს. ბოლოდროინდელი მოვლენებიდან ჩანს, რომ იაზიჩის გამოხდომებს ფიდე კვერს უკრავს და როგორც უნდათ, ისე ექცევიან უმდიდრესი საჭადრაკო ტრადიციების მქონე ქვეყნების ფედერაციებს.
თუ რა გზას დაადგებიან შერისხული ფედერაციები, უახლოეს ხანში გაირკვევა. ეტყობა, შეგულიანებული იაზიჩი უკან დახევას არ აპირებს.
დაიჩოქებს შვიდეული? მოჭადრაკეთა ერთიან ოჯახს ბზარი გაუჩნდა.
ბოლო ადგილს ვერ ასცდა
სომხურ ჯერმუკში დამთავრდა მოჭადრაკე ქალთა ფიდეს გრანპრის მე-4 ეტაპი, რომელშიც 12 დიდოსტატი წრიული სისტემით ხვდებოდა ერთმანეთს. 11 შესაძლებლიდან 7 ქულით პირველი ადგილი და 160 ქულა ორგზის მსოფლიოს ჩემპიონმა ჰოუ იფანმა მოიპოვა.
ოთხიდან სამი შეჯიბრების საუკეთესო ჯამით - 480 ქულით ჩინელმა მოჭადრაკემ გრანპრის მთავარი პრიზიც და გაისად მსოფლიოს ჩემპიონობისთვის ბრძოლის უფლებაც დაიმსახურა. ტიტულის მფლობელი კი წლეულს ნოკაუტსისტემით გაირკვევა.
ჯერმუკში 6,5-6,5 ქულით მეორე-მეოთხე ადგილები ნადეჟდა კოსინცევამ, კატერინა ლაგნომ და ჰამფი კონერუმ გაინაწილეს. ნინო ხურციძემ 3,5 ქულით ბოლო - მეთორმეტე ადგილი დაიკავა.
ყოველდღიური სპორტული გაზეთი "ლელო"
