ვერც ძიუდოში ვივარგეთ - მოჭიდავეთა წარუმატებელი სტუდენტები

მესამე დღეა, რუსეთში, თათრეთის დედაქალაქ ყაზანში მიმდინარეობს მსოფლიოს უნივერსიადა, თუმცა მასში ჩვენი სტუდენტები ჯერჯერობით წარუმატებლად გამოდიან. მათ შორის - საჭიდაო სახეობების წარმომადგენლებიც, რომელთაგანაც შეჯიბრებებში მხოლოდ ძიუდოისტები და ქამრიანი მოჭიდავეები ჩაერთნენ...

ძიუდოში ასპარეზობები უკვე ოთხ წონით კატეგორიაში გაიმართა, თუმცა 100-ში მონაწილე არ გვყოლია. დანარჩენებიდან კი ყველაზე უკეთ საავიაციო უნივერსიტეტის სტუდენტი შალვა ნინიძე (81) გამოვიდა, რომელმაც ერთი შეხვედრის მოგება მაინც შეძლო.

ეს იყო პირველ წრეში, ტაჯიკ ფაროდ რაჰიმოვთან - შალვამ მას სწრაფად მიაღებინა ორი გაფრთხილება და ამის შემდეგაც სრულ უპირატესობას ფლობდა, რაც დასრულებამდე 25 წამით ადრე იპონში გადაზარდა.

ჩვენებური მომდევნო წრეში იაპონელთა მომავალ ჩემპიონ ტაკანორი ნაგასესთან წმინდად დამარცხდა. სამწუხაროდ, აქ უპირატესობა მთლიანად მეტოქის მხარეს იყო და გდებებამდე სამი გაფრთხილებაც მიითვალა.

ამ პერიოდში ნინიძემ მხოლოდ ის შეძლო, რომ ერთხელ გააფრთხილებინა, მაგრამ ბოლო წუთზე, სულ რაღაც 5-წამიანი ინტერვალით იაპონელმა ორჯერ დააგდო ვაზარიზე და სუფთად მოიგო.

ნინიძე სანუგეშოში გადაერთო, მაგრამ მედლის მოპოვების შანსი პირველივე შეხვედრაში დაკარგა - რუსთა ევროპის შარშანდელ ვიცე-ჩემპიონ მურატ ხაბაჩიროვთან სამი გაფრთხილებით წააგო.

ლევან მატიაშვილი (+100) პირველივე წრეში დამარცხდა რუს რენატ საიდოვთან. თავდაპირველად ჩვენებურმა გაფრთხილება მიაღებინა მეტოქეს, თუმცა მსაჯმა ნახევარი წუთის შემდეგ ორივე გააფრთხილა.

მატიაშვილს ამ ანგარიშის შენარჩუნება ხელს აძლევდა, მაგრამ შეხვედრის ზუსტად შუაწელში იპონზე მოჰყვა და გავარდა. პირველივე წრიდან გამოეთიშა ტურნირს დავით კარბელაშვილიც (90) - ყაზახ ისლამ ბოზბაევთან ოთხი გაფრთხილება მიიღო და სუფთად წააგო.

ვერც ქამარი შემოვირტყით
ქართველი სტუდენტები წარუმატებლად გამოდიან ქამრიან ჭიდაობებშიც, სადაც "თავისუფლად" მოჭიდავეებმა იასპარეზეს.

სამწუხაროდ, ჩვენებურთა უმეტესობა პირველივე შეხვედრაში დამარცხდა - იაკობ გაზდელიანმა (68) ლიტველ პოვილას ზუკაუსკასთან 0:6 წააგო, გიორგი ახალკაციშვილმა (62) ფრედ კი დაასრულა შეხვედრა სომეხ გორ მკრტიჩიანთან - 2:2, თუმცა გამარჯვება მაინც მეტოქეს დარჩა.

გიორგი დათუნაშვილი (80) უკრაინელ ერნან სეფეროვთან 5:7 დამარცხდა, გიორგი კობერიძემ (100) უზბეკ ნურიტდინ მაჰამადოვთან წააგო - 3:6.

პირველი წრე მხოლოდ ორმა ჩვენებურმა გადალახა - ომარ ნიაზაშვილმა (75) ტაჯიკ აზიზბეკ ქარობეკოვს 8:5 მოუგო, რუდოლფ ოგანეზოვმა (90) კი თურქ აჰმატ გოკბაიარაკს 7:4 სძლია. მეორე წრიდან ეს დუეტიც დაიშალა, რადგან ოგანეზოვმა მეოთხედფინალში უზბეკ ნოზიმჯონ იბრაჰიმჯონოვთან 0:7 წააგო.

ტურნირში ცალად დარჩენილმა ნიაზაშვილმა ერთი შეხვედრაც მოიგო - მეოთხედფინალში ყირგიზ ბეკნაზერ რუსლანოვს 2:0 სძლია, მაგრამ მერე ზედიზედ ორჯერ დამარცხდა - ნახევარფინალში რუს ალიბეკ ლეპსოკოვთან 0:5 დათმო, ბრინჯაოსთვის პაექრობაში კი უზბეკ ზაილობოდინ არტიკოვთან 3:6 წააგო.

დასასრულ, იმასაც შევნიშნავთ, რომ წლევანდელი უნივერსიადა საჭიდაო სახეობებში ვარსკვლავთა სიმრავლით გამოირჩევა. მაგალითად, რუსებმა უკლებლივ ყველა ნაკრებში ლამის ოპტიმალურ შემადგენლობას უხმეს.

მაგალითად, ბერძნულ-რომაულ ჭიდაობაში გამოვლენ ოლიმპიური ჩემპიონები - რომან ვლასოვი (74) და ალან ხუგაევი (84), ქალთა ნაკრებში გამოვა ევროპისა და ოლიმპიური ჩემპიონი ნატალია ვორობიოვა (78), "თავისუფლებში" კი მიიწვიეს ევროპის ჩემპიონი აბდუსალამ გადისოვი (96), მსოფლიოს ორგზის ჩემპიონი დენის ცარგუში (74) და რუსეთის წლევანდელი ჩემპიონატის გამარჯვებულები, რომლებსაც სექტემბერში მსოფლიოს პირველობაც ელოდებათ. ძიუდოში შედგება ლონდონის ოლიმპიადის გამარჯვებულ არსენ გალსტიანის (60) დაბრუნება...

თუმცა რუსების ამბავი გასაგებია - უნივერსიადა მათთან ტარდება და სპორტული პოლიტიკიდან გამომდინარე, პირველობას ესწრაფვიან, მაგრამ ძიუდოში სხვა ქვეყნებიდანაც არაერთი ძლიერი ფალავანია ჩასული...

ყოველდღიური სპორტული გაზეთი "ლელო"