22 ნოემბერს სპორტკომპლექს "არენაში" მეორედ ჩატარდა ქვეყნის საკლუბო პირველობა ძიუდოში, რომელმაც წარმატებით ჩაიარა. შარშანდელის მსგავსად, ის ახლაც მოზარდებში გაიმართა - ამჯერად მასში 1997-98 წლებში დაბადებულები ჭიდაობდნენ, შეჯიბრებას კი მსოფლიოს ჩემპიონ ავთანდილ ჭრიკიშვილის სახელი მიენიჭა.
თუმცა ნათლობა არ ყოფილა შარშანდელისგან განმასხვავებელი ერთადერთი ნიშანი, გაიზარდა მონაწილეთა რაოდენობაც და საპრიზო ფონდიც: 25 კლუბი ასპარეზობდა, საპრიზო თანხა კი 14 ათას ლარამდე გაიზარდა.
კლუბების უმეტესობა თბილისიდან იყო, თუმცა არც რეგიონები დარჩენილან თამაშგარეთ - იყვნენ ახმეტიდან, გორიდან, ბათუმიდან, მარნეულიდან, ქარელიდან, დუშეთიდან და აკი პრიზიორთა შორის ახმეტელებიც
ბავშვთა შეჯიბრების მიუხედავად, ტურნირი მაინც იმდენად დაძაბული და საინტერესო გამოდგა, რომ თვალნათლივ დავრწმუნდით საკლუბო სისტემის ნათელ მომავალში (მით უფრო, რომ გაისად ანალოგიური ჩემპიონატის გამართვა უფროსებშიც იგეგმება).
არადა, აქამდე ეს ქრისტეს "პერანგის კერვად" მოჩანდა და სხვა სახეობებში არა და არ დაადგა საშველი. რეალურად, კლუბის შენახვა მართლაც არაა იოლი, მაგრამ ძიუდომ დაგვანახვა, რომ მონდომების შემთხვევაში ყველა სიძნელე დაძლევადია.
მაგალითად, შარშანდელმა შეჯიბრებამ დიდი ინტერესი გამოიწვია და წლეულს მასობრიობა გაიზარდა. როგორც გითხარით, ამჯერად გაიზარდა რაიონების წილი.
აღმოსავლეთ საქართველოდან ეს არცაა გასაკვირი, აი, დასავლეთიდან კი ორი კლუბი ჩამოვიდა, რაც ფრიად სასიამოვნოა ქართული ძიუდოსთვის - "ბათუმი" და "ოქროს ვერძი" ზუგდიდიდან. დღეს დასავლეთში ქართული ძიუდოს ცენტრი ძირითადად იმერეთია (ქუთაისი და ზესტაფონი, საიდანაც ეროვნული თუ ასაკობრივი გუნდები იღებენ კანდიდატებს); ასეთი პრეცედენტი კი გვაიმედებს, რომ მალე იმ ორი ქალაქიდანაც მიიღებს შევსებას.
თბილისის მაგალითზე ერთი საინტერესო ფაქტიც მოხდა - "შევარდენმა" სამი კლუბი გამოიყვანა: საკუთრივ "შევარდენი-2005", "შავი ავაზა" და "გლადიატორი".
ყველა დარბაზში რამდენიმე მწვრთნელია, თუმცა საზოგადოება ძირითადად ერთს იცნობს.
"შევარდენის" მაგალითზე ეს გურამ მოდებაძეა, მაგრამ ამჯერად კლუბები იმავე დარბაზის სხვა მწვრთნელებმაც გამოიყვანეს, რაც მათთვის თავის წარმოჩენის კარგი საშუალება იყო. თან ფედერაციამ ერთი კარგი საქმეც გააკეთა - მკაცრად აკრძალა სპორტსმენთა განათხოვრების პრაქტიკა. ამის გამო ზოგიერთ კლუბს მონაწილე აკლდა, მაგრამ სისტემურობა და წესრიგი ყველაფერშია საჭირო. ასეთი სიმკაცრე იმავე მწვრთნელების მუშაობის ბარომეტრიცაა - დეფიციტური წონების შევსებაზე სამომავლოდ უფრო მეტად იზრუნებენ.
წმინდა სპორტული თვალსაზრისით, ტურნირი შარშანდელი სცენარით წარიმართა - ფინალში ისევ "შევარდენი" და "ლიდერი" შეხვდნენ, ჩემპიონი კი კვლავაც "შევარდენი" გახდა. გურამ მოდებაძე ამჯერად ეროვნულ ნაკრებთან ერთადაა შეკრებაზე წასული და შეჯიბრებას არ დასწრებია, კლუბს კი მისი მოსწავლე, მსოფლიოს ორგზის მესამე პრიზიორი ლაშა გუჯეჯიანი ხელმძღვანელობდა.
"შევარდენმა" შეჯიბრება დიდი აღმავლობით ჩაატარა და ფინალამდე სამივე მეტოქე (პირველ წრეში ის და "ლიდერი" ისვენებდნენ, როგორც განთესილები) 5:0 დაამარცხა - "ვარსკვლავი-2024", "შავი ავაზა" და "ოლიმპი". "ლიდერმა" (მწვრთნელი: ალექსანდრე მამუკაშვილი) პირველ პაექრობაში საგარეჯოს "არსენა" 4:1 დაჯაბნა, მაგრამ ფრიად გაუჭირდა "გლადიატორთან" - მხოლოდ მეხუთე პაექრობაში გამარჯვებით აჯობა - 3:2.
ნახევარფინალში ახმეტის "ზეზვა შათირიშვილს" ისევ იოლად, 4:1 მოუგო, ფინალში კი ასეთივე შედეგით "შევარდენმა" იმარჯვა. გამარჯვებულთა ღირსებას გიორგი ლიპარტელიანი (60), ბექა უდესიანი (66), გიგა გიგაური (73), გიორგი გოგოლიძე (81), გიორგი გველესიანი და მათე ბენდელიანი (ორივე - +81) იცავდნენ, "ლიდერში" კი გელა გარაყანიძე (60), გაგა მახნიაშვილი (66), ლაშა დუდაშვილი (73), ნოდარ წამალაიძე (81), ზაურ კენჭაძე, ავთანდილ ტაბატაძე (ორივე - +81) გამოდიოდნენ.
ბრინჯაოს მედლები "ზეზვა შათირიშვილმა" (მწვრთნელი: ტარიელ (ზეზვა) შათირიშვილი) და "ოლიმპმა" (ზვიად წოწკოლაური) მოიპოვეს, რომლებმაც დამამშვიდებლის ფინალში "შევარდენის" მართვეები, შესაბამისად, "შავი ავაზა" და გლადიატორი" ერთნაირი ანგარიშით, 3:2 დაამარცხეს. ახმეტელთა ღირსებას ნიკო ჭიკაიძე, დავით ჩოკოლაშვილი (ორივე - 60), ბექა ფიცხელაური, გიორგი ქიბროწაშვილი (66), ფირუზ ქეთიაშვილი (73), ავთანდილ ჩურჩხელაშვილი (81), დავით რამაზაშვილი და გურამ ქოსმანაშვილი (ორივე - +81) იცავდნენ, "ოლიმპის" შემადგენლობა კი ასეთია: ზაქარია იჩუაიძე (60), გიორგი დიდებაშვილი (66), ვასილ ბალაბანაშვილი, გოგა ქევხიშვილი (ორივე - 73), ნიკა ბურნუჩიანი (81) და ოთარ გურგენიძე (+81).
კვარცხლბეკი
1. შევარდენი-2005
2. ლიდერი
3. ზეზვა შათირიშვილი, ოლიმპი
ყოველდღიური სპორტული გაზეთი "ლელო"
