ძიუდოისტი ავთანდილ ჭრიკიშვილი (81) ამ სპორტული სეზონის ფავორიტად იქცა და არა მხოლოდ ძიუდოში. 23 წლის სპორტსმენმა წლეულს დუბლი შეასრულა - ევროპის ჩემპიონიც გახდა და მსოფლიოსიც.
ჯერ ესაა ერთი მიღწევა, თუმცა ისიც არანაკლებია, რომ ასე ახალგაზრდამ ზედიზედ მეორედ იჭიდავა ამ ზეპრესტიჟული შეჯიბრებების ფინალში.
ჭრიკიშვილს მართლაც იშვიათი სეზონი ჰქონდა, რომელიც ლამის წაუგებლად ჩაატარა და ამ ორი ტიტულის გარდა, კიდევ მოიპოვა რამდენიმე დასამახსოვრებელი გამარჯვება: სეზონის მიწურულს გაიმარჯვა ევროპის საკლუბო პირველობის პირველ ლიგაში და გაისად უკვე "ოქროს ლიგაში" იასპარეზებს. თანაც, მშობლიურ კლუბ "მებრძოლთან" ერთად;
სეზონის განმავლობაში მან მხოლოდ ორი შეჯიბრება წააგო, თუმცა უმედლოდ არც იქ დარჩენილა - მსოფლიოს გუნდურ პირველობაზე და ძიგორო კანოს მემორიალზე მესამეზე გავიდა...
წლის ბოლოს ამ ყველაფერს რამდენიმე საყოველთაო აღიარება დაემატა - გახდა მსოფლიოს საუკეთესო ძიუდოისტი, რადგან რეიტინგში ყველაზე მეტი ქულა ჰქონდა; საქართველოში კი წლის საუკეთესო სპორტსმენად დაასახელეს "ლელომ", და სპორტისა და ახალგაზრდობის საქმეთა სამინისტრომ...
მიღწევაა ისიც, რომ 7-წლიანი პაუზის შემდეგ საქართველოს ისევ დაუბრუნა მსოფლიოს ჩემპიონის ტიტული - ოლიმპიურ სახეობებში სწორედ ამდენი ხანი არ გვყავდა პლანეტის საუკეთესო ათლეტი.
კიდევ ერთი ფაქტორი - სადაც შეხვდა, წლეულს ყველგან გააბითურა ფრანგთა შარშანდელი მსოფლიოს ჩემპიონი ლოიკ პიეტრი. მათ შორის - ევროპის ჩემპიონატის ფინალშიც მისსავე მშობლიურ მონპელიეში. ამით კიდევ ერთხელ დაადასტურა, რომ შარშან მსოფლიოს ფინალში მასთან წაგება მართლაც იმ უიღბლობის ბრალი იყო, რომ დასასვენებლად დრო არ ეყო, თორემ ახლა მსოფლიოს ორგზის ჩემპიონი იქნებოდა.
თითქოს წლეულს მის ჭიდაობას მოაკლდა ის ტექნიკურობა და რომანტიზმის ხიბლი, რომელიც ყოველთვის გამოარჩევდა ქართული ჭიდაობიდან მოსულს, მაგრამ სეზონის განმავლობაში თავისი განთქმული ამოსმულით თუ სხვა ილეთებით მაინც შემოგვთავაზა რამდენიმე ქრესტომათიული გდება - იმავე პიეტრისთან ევროპის ფინალში, კანადელ ანტოინ ვალუა-ფორტიესთან, კანოს მემორიალზე ჩინელ ერისთან და სხვებთან.
ახალგაზრდული ასაკის მიუხედავად, მან უკვე ისწავლა რაციონალური ჭიდაობა და სილამაზეზე მეტად შედეგზე ფიქრობს. ალბათ, ესაა მიზეზი, რომ მსოფლიოზე ბევრი ილეთი არ გაუკეთებია. სამაგიეროდ, შედეგი ჰქონდა შარშანდელზე უკეთესი. თქვა კიდეც იმ შეჯიბრების შემდეგ, გდებები შარშან გავაკეთე ბევრი, მაგრამ სახლში ვერცხლით დავბრუნდი, ახლა კი ოქროთიო...
ტრიუმფატორი და ნაკრების მთავარი მწვრთნელი ირაკლი უზნაძე იქვე გვაიმედებდნენ, რომ ეფექტური ფანდები სხვა ტურნირებზე იქნებოდა - ეს ყველაფერი მართლაც დადასტურდა მსოფლიოს პირველობის შემდეგ ჩატარებულ შეჯიბრებებზე.
ავთანდილ ჭრიკიშვილი ახლა ისვენებს, თუმცა პირობითად - მან 30 დეკემბერსაც ივარჯიშა. ოღონდ ეგაა, მასთან დაკავშირება კვალავაც შეუძლებელია, რადგან პრინციპულად არ ატარებს მობილურ ტელეფონს.
ამის მიუხედავად, მცირე კომენტარს მის უახლოეს გეგმებზე მაინც შემოგთავაზებთ.
- წლეულს რამდენიმე ვერსიით გახდით საუკეთესო - "ლელოს", სპორტის სამინისტროს, სპორტულმა ჟურნალისტთა და ძიუდოს საერთაშორისო ფედერაციის მიხედვით... რას ნიშნავს თქვენთვის ეს აღიარებები და რომელიმეს თუ გამოარჩევთ?
- ყველა ერთნაირად და ძალიან მიხარია. ეს ჩემთვის დიდი სტიმული იქნება. ყველაზე მნიშვნელოვანი ხომ ესაა - იგებ იმიტომ, რომ ხალხს უყვარდე და პატივს გცემდეს. ამიტომ ეს ყველაფერი ერთგვარი სტიმული იქნება და ვეცდები, ყოველწლიურად გავაუმჯობესო შედეგები.
- ალბათ, გააუმჯობესოთ ოლიმპიურ ჩემპიონობამდე?
- ოლიმპიური ჩემპიონობა ჩემი ოცნებაა. 2016 წელს მომეცემა ამის შანსი. იქამდე არც ისე დიდი დროა და ამ ოცნების ასახდენად ყველაფერს გავაკეთებ.
- როგორ მიგაჩნიათ, წლეულს რის ხარჯზე მიაღწიეთ ამხელა წარმატებებს?
- მხოლოდ ვარჯიშის, დიდი შრომის და ყველა მხარის - მწვრთნელების, სპორტსმენის, ფედერაციის ერთობლივი მუშაობის შედეგად. ამ მიღწევებში ყველაფერი ერთადაა ჩაქსოვილი და ამის დამსახურებაა, აქამდე რომ მოვედი.
- მომავალი სეზონი ძალიან მნიშვნელოვანია თქვენთვის, რადგან ოლიმპიადაზე გამოსვლას უნდა ჩაეყაროს საფუძველი. როგორ მოემზადებით ამ სეზონისთვის, სერიოზულ ცვლილებებს ხომ არ გეგმავთ სავარჯიშო პროცესში?
- ნაახალწლევს ავსტრიაში წავალთ შეკრებაზე. საერთოდ, ამ სეზონში ორმაგი და სამმაგი მონდომებით ვიმუშავებთ, შემართებაც მეტია და ფსიქოლოგიურადაც მზად ვარ ამისთვის. ბევრი უნდა ვიწვალოთ, რომ მივაღწიოთ იმას, რაც ჩაფიქრებული გვაქვს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
