ახალგაზრდა ძიუდოისტთა მსოფლიოს ჩემპიონატი: ქართველების წილისყრა

დღეს, 23 ოქტომბერს, აბუ დაბიში ახალგაზრდა ძიუდოისტთა მსოფლიოს ჩემპიონატი იწყება, რომელიც 27 ოქტომბრის ჩათვლით გასტანს.

ტურნირის განრიგი ასეთია: დღეს ბიჭებიდან 55-60, ხოლო გოგონებიდან 44-48-ის წარმომადგენლები იჭიდავებენ, მომდევნო სამი დღის განმავლობაში კი ტატამზე გავლენ, შესაბამისად, 66/73 და 52/57; 81/90 და 63/70; 100/+100 და 78/+78 კილოგრამის სპორტსმენები. სამშაბათს, 27 ოქტომბერს გუნდური პირველობა გაიმართება.

შეგახსენებთ, რომ ჩვენები ამ ასაკში გუნდურში მსოფლიოს მოქმედი ჩემპიონები არიან და არაბეთში ტიტულის შესანარჩუნებლად იბრძოლებენ.

55 კგ
ირაკლი კუპატაძეს ბელგიელ ვლადისლავ ლიმთან რევანშის აღების მშვენიერი შანსი ეძლევა, რადგან პირველ მეტოქედ ისევ ის ერგო და ისევ მეორე წრეში (პირველში ორივე ისვენებს).

ვნახოთ, როგორ გამოიყენებს ამ შესაძლებლობას. შეგახსენებთ, რომ ისინი ავსტრიაში ევროპის ჩემპიონატზეც ასევე პირველივე პაექრობაში და ასევე მეორე წრეში შეხვდნენ ერთმანეთს, რაც ბელგიელის გამარჯვებით დასრულდა.

რუსეთიდან იაგო აბულაძეც ჭიდაობს, ვინც წლევანდელ ევროპირველობაზე მეხუთეზე გავიდა.

60 კგ
ევროპის წლევანდელი მესამეპრიზიორი თორნიკე ნაგლიაშვილი პირველივე წრეში იჭიდავებს ბულგარელ ბოჟიდარ ტემელკოვთან, ამათში მოგებულს კი შემდეგ ეტაპზე ახალგაზრდებში მონღოლთა შარშანდელი ფინალისტი ცოგტბაატარ ცენდოჩირი ელოდება.

ჩვენებურს წილისყრამ არ გაუმართლა, რადგან მონღოლის გარდა, ამ ჯგუფში წლევანდელ ევროპირველობაზე ბრინჯაოსთვის ნაჭიდავები აზერბაიჯანელი დავუდ მამადოვიც ჰყავს, ხოლო ნახევარფინალში გასვლის შემთხვევაში სავარაუდო მეტოქე ფრანგთა ევროპის წლევანდელი გამარჯვებული ვალიდე ხიარიცაა - უფროსთა ნაკრებშიც საკმაოდ გამოცდილი ფალავანი, ვისთანაც წლეულს ევროპირველობის ნახევარფინალი წააგო.

ჰოლანდიის სახელით მოჭიდავე თორნიკე ჭკადუაც ნაგლიაშვილთან მოხვდა ჯგუფში, ვისაც ჩვენებურმა ავსტრიაში, ევროპაზე პირველივე წრეში მოუგო.

66 კგ
გიორგი გუგულაშვილიც პირველივე წრეში იჭიდავებს - მონღოლ მუნკბაიარ ნერგულთან, მოგების შემთხვევაში კი ირანელ მეჰდი ფატიპოორარდალს დაეჭიდება. ამავე ჯგუფშია კორეელი ჰეეჯაე კიმიც.

73 კგ
ჩვენები ფინალამდე არ ხვდებიან ერთმანეთს. ევროპის წლევანდელი ბრინჯაოსმედალოსანი გიორგი კაციაშვილი პირველ ჯგუფშია და დასაწყისშივე იჭიდავებს მოლდოველ იური მოკანუსთან, ამათში მოგებულს კი მეორე წრეში ბელგიელი მათიას გასე ელოდება.

ჩვენებურის გზა მერვედფინალში სლოვენიელ მარტინ ჰოჯაკზე იკვეთება, ვისთანაც ავსტრიაში ნახევარფინალი წააგო, თუმცა ფინალში მისი ჯავრი თამაზ კირაკოზაშვილმა იყარა. ძლიერებიდან ამ ჯგუფშია მსოფლიოს ახალგაზრდული რეიტინგის ბრაზილიელი ლიდერი ლინკოლნ ნევესი.

ევროპის მოქმედი ჩემპიონი კირაკოზაშვილი მესამე ჯგუფშია და პირველ წრეში ისვენებს, მეორეში კი სუსტი მეტოქე ელოდება - პაკისტანელ აკრამ ნადეემსა და ბაჰამის კუნძულელ ჯოშუა მაკფალს შორის გამარჯვებული. აი, ამის იქით ვერ ვიტყვით, რომ ქართველს გაუმართლა - მერვედფინალში ევროპის მეხუთეადგილოსან თურქ მურატ ბეკტაშსა და საქართველოდან წასულ ვასილიოს ბალამპანაშვილიდან (ბალაბანოვი, ვინც ევროპულ ფესტივალზეც და ჭაბუკებში მსოფლიოს პირველობაზეც ბრინჯაო მოიპოვა) ერთ-ერთი ელოდება, ჯგუფში კი იაპონელთა მსოფლიოს შარშანდელი ფინალისტი იუჯი იამამოტოც ჰყავს (ამან ფინალი კორეელ ჩანგრიმ ანთან დათმო, ვინც აგვისტოში უკვე უფროსებში მოიპოვა ბრინჯაო მსოფლიოს პირველობაზე).

გამარჯვების მიუხედავად, კირაკოზაშვილს ევროპის პირველობაზეც ბევრი ხარვეზი გამოაჩნდა, ახლა კი უფრო გაუჭირდება. ვნახოთ, რამდენად წაადგა მზადების ახლებური სისტემა თუ მოუმატა კონტინენტის პირველობის შემდეგ.

81 კგ
ქართულ დუეტს ამ წონაში ევროპაზე შელახული რეპუტაციის აღდგენა მართებს - ორივე ტიტულოვანია, თუმცა უმედლოდ დარჩნენ. ლევან გუგავა ამ ასაკში ევროპისა და მსოფლიოს შარშანდელი ბრინჯაოსმედალოსანია, ამასთან - ერთ-ერთი ყველაზე სტაბილური სპორტსმენი, ვინც ჭაბუკებიდან მოყოლებული, სეზონს არ ტოვებს უმედლოდ, თუმცა ავსტრიაში ხელი სტკიოდა. ეს ტრავმა მას ამ ტურნირისთვის მზადების პერიოდშიც აწუხებდა და სრული დატვირთვით ვერ ივარჯიშა.

კობა მჭედლიშვილი შარშან გადმოვიდა ამ წონაში და მსოფლიოზე ბრინჯაოც მოიპოვა, იქამდე კი ორივე ასაკობრივ გუნდში რამდენჯერმე გახდა ევროპისა და მსოფლიოს ჩემპიონი.

ჩვენები ფინალამდე არც აქ ხვდებიან ერთმანეთს, თუმცა უფრო ცუდი წილისყრა მჭედლიშვილს ერგო - განსაკუთრებით ძლიერ ჯგუფში არაა, მაგრამ ნახევარფინალის სავარაუდო მეტოქედ ჰოლანდიელთა წლევანდელი ევროპის ჩემპიონი, ეროვნულ ნაკრებში გამობრძმედილი ფრანკ დე უაიტიც ელოდება (ავსტრიაშიც მან მოუგო ჩვენებურს). თან ამ ჯგუფში ახალგაზრდული რეიტინგის რამდენიმე ლიდერიცაა.

მჭედლიშვილი პირველ შეხვედრას ალჟირელ უსამა ჰაბრისთან გამართავს, მოგების შემთხვევაში კი ავსტრალიელ ჯორდან კუროსსა და მონღოლ ბატერდენე ბანდიკუუს შორის გამარჯვებულს შეხვდება. ამავე ჯგუფშია ბელორუსი ვიკტარ კლიავუსაუ, რომელმაც ავსტრიაში გუგავას მოუგო, და რევაზ მესაბლიშვილი უკრაინიდან, ხოლო პორტუგალიის სახელით მოჭიდავე ანრი ეგუტიძე - პირველში.

განთესილი გუგავა პირველ წრეში ისვენებს, მისი მეტოქე კი ტაჯიკი აკმალ მუროდოვისა და გერმანელი ჰენრიკ შრაიბერის პაექრობაში გამოვლინდება. ჩვენებურს ბადის მეორე მხარეს, ანუ მეოთხედფინალში ელოდება ძლიერი მეტოქე, სადაც გასვლის შანსს პორტუგალიელთა ევროპის წლევანდელი მესამეპრიზიორი ჟოაო მარტინო და იაპონელი სოტარო ფუჯივარაც ინარჩუნებენ.

90 კგ
ბექა ღვინიაშვილს ნამდვილად გაუმართლა წილისყრამ - წონის ყველა ძლიერი ფალავანი ბადის მეორე მხარესაა, ჯგუფშიც არავინ ჰყავს ტიტულოვანი, ნახევარფინალში კი ყველაზე სავარაუდო მეტოქედ გერმანელი დევიდ ტეკიჩი ჩანს, ვისაც ევროპის წლევანდელი პირველობის ფინალში პატარა ბავშვივით მოუგო, ლამის დააჭედა ტატამს.

იმავე ჯგუფში აზერბაიჯანელი ფირუდინ დადაშოვიცაა, მაგრამ მას ჩვენებურმა ორჯერვე მოუგო - შარშან ევროპის ჩემპიონატის ფინალში დაამარცხა, მერე კი ბაქოს "მუზარადზეც" აჯობა.

ევროპის წლევანდელი გამარჯვებული ღვინიაშვილი ჩემპიონატში მეორე წრიდან ჩაებმება, სადაც ამერიკელ მეთიუ კოჩსა და უტიტულო კორეელ ტაე-ჰი კიმს შორის მოგებულს შეხვდება. კორეელს ჩვენებური ჯერ არ შეხვედრია, თუმცა ის არც რეიტინგში გამოირჩევა. მესამე წრეში გასვლის შემთხვევაში ქართველს ირანელი ჰამედ რაშიდისა და ბრაზილიელი ანდრე ჰუმბერტოს წყვილში უძლიერესი დაეჭიდება.

ახალგაზრდებში მსოფლიოს შარშანდელი ფინალისტი, ესპანელთა ქართველი ნიკოლოზ შერაზადაშვილი ბადის მეორე მხარესაა და ღვინიაშვილს ფინალამდე არ ხვდება. მასთან ჯგუფშია გერმანელთა ქართველი სანდრო მაქაცარიაც.

100 კგ
ევროპის ჩემპიონატზე ამ წონაში მონაწილე არ გვყავდა, ახლა კი მწვრთნელებმა ჯაბა მუმლაძეს გამოუცხადეს ნდობა, თუმცა ბოლო შეკრებისას მან მუხლი იტკინა და დაახლოებით ერთი კვირა სრული დატვირთვით ვერ ვარჯიშობდა. ის პირველ წრეში გერმანელ იოჰანეს ფრეისთან იჭიდავებს, მერე კი, შესაძლოა, რუსთა ევროპის ვიცე-ჩემპიონ ოლეგ აბაევს შეხვდეს.

+100 კგ
ამ წონაში მწვრთნელებმა ისევ ევროპის წლევანდელი ჩემპიონი გურამ თუშიშვილი დააყენეს, ვისაც წონა არ დააკლებინეს და 100-ში არ დააყენეს. იმედია, ის ახლაც ჩვეულად კარგად იჭიდავებს მძიმეწონოსნებში, როგორც ეს ევროპაზე ან შარშან მსოფლიოს გუნდურზე გააკეთა. თუმცა ამ ტურნირისთვის ჩვენს ნაკრებში ყველაზე ინდივიდუალური გრაფიკით ის ემზადებოდა, რადგან ნაოპერაციები ხელის რეაბილიტაცია ჯერ ბოლომდე კიდევ არ დასრულებულა.

წილისყრამ მას ინტრიგაც დაუტოვა - ჯგუფში მასთან ერთად რუსი რუსლან შახბაზოვიც მოახვედრა, ვისაც ჩვენებურმა წლევანდელი ევროპირველობის ფინალში მოუგო. თუმცა ქართველამდე რუსს ერთი მძიმე ბრძოლაც მოელის იაპონელ გენტა ტანაკასთან, ჩვენებური კი ჯერ ეგვიპტელ აჰმედ ვაჰიდს შეხვდება, ამ ბარიერის გავლის შემთხვევაში კი - ყაზახ იელამან იერგალიევსა და ლიბანელ ჰანა ტუმას შორის უძლიერესს.

ამ ხალხის დამარცხება თუშიშვილს არ უნდა გაუჭირდეს. ნახევარფინალში ჩვენთვის საინტერესო ჯგუფიდან, ანუ ჩვენებურის შესაძლო მეტოქეთაგან გამოვარჩევთ რეიტინგის ერთ-ერთ ლიდერს, უკრაინელ სერგეი ზვერევს, სერბ ევროპის პრიზიორ ჰარუნ სადიკოვიჩს და კორეელ იაეგუ იუნს.

52 კგ
გოგონების ტურნირში ერთადერთი მონაწილე გვეყოლება - 17-წლამდელებში ევროპის ჩემპიონი მარიამ ჯანაშვილი. ჯერჯერობით ისიც სარეაბილიტაციო პერიოდს გადის ორივე მუხლზე გაკეთებული ოპერაციის შემდეგ, საემიროებში წასვლამდე კი რომში ივარჯიშა ერთობლივ კემპზე.

ჯანაშვილი პირველ წრეში ისვენებს, მეორეში კი ავსტრალიელ ტინკა ეშტონს შეხვდება. ამავე ჯგუფშია თურქთა ევროპის მესამეპრიზიორი დამლა ცალისკანი.

ყოველდღიური სპორტული გაზეთი "ლელო"