მსოფლიოს ჩემპიონატზე ქალებს შორის გიგანტური სლალომი პრობლემატური გამოდგა. საქმე ისაა, რომ ორგანიზატორებს რამდენჯერმე მოუწიათ პირველი ცდის გადადება. მიზეზი ტრადიციული იყო - ტრასაზე ნისლი ჩამოწვა და დაშვება შეუძლებელი გახდა. საბედნიეროდ, ყველაფერი კარგად დასრულდა და გუშინ გარმიშში მედლების მერვე კომპლექტი გათამაშდა.პირველი ცდის პირველი ნომერი სლოვენიელ ტინა მაზეს ერგო. მან ისე გაიარა პირველი დაშვება, რომ შემდეგ სტარტზე გასულმა ვერც ერთმა მოთხილამურემ ვერ შეძლო სლოვენიელის დროის გაუმჯობესება. მაზემ ამ ჩემპიონატზე მეორე მედლის მოგების (პირველი პოდიუმი მას სუპერკომბინაციაში ჰქონდა) კარგი შანსი მიიღო, უბრალოდ გასარკვევი
ტინას სერიოზული კონკურენტები ჰყავდა - ამ სეზონში გიგანტურ სლალომში მსოფლიოს თასის სამი ეტაპის მომგები, ფრანგი ტესა ვორლი და ამავე დისციპლინაში ოლიმპიადის მოქმედი ჩემპიონი, გერმანელი ვიქტორია რებენსბურგი. მაგრამ ვორლის პირველი ცდა არ გამოუვიდა და მხოლოდ მე-19 ადგილზე გავიდა. სამაგიეროდ, ბრწყინვალე მეორე დაშვებამ ვორლი გადაარჩინა: ის ერთი მეორის მიყოლებით უსწრებდა მეტოქეებს და ბოლო მოწინაღმდეგე, ვინც სამეულიდან ამოაგდო, ელიზაბეტ გიორგლი იყო. ასე რომ, ტესა დამსახურებულად ავიდა პოდიუმის მესამე საფეხურზე. შეგახსენებთ, რომ ვორლი წინა დღეს მსოფლიოს ჩემპიონი გახდა გუნდურ პირველობაში.
ერთადერთი, რაც არ შეცვლილა, ლიდერთა დუეტი იყო. კარგი, მაგრამ ნერვიული მეორე ცდა ჰქონდა 20 წლის იტალიელ ფედერიკა ბრინიონეს, რომელიც შარშან გაიცნეს ამ სპორტის გულშემატკივრებმა. აპენინელს ეს დრო ეყო ვორლის გასასწრებად, მაგრამ სტარტზე იდგა გამოცდილი მაზე, რომელმაც შესანიშნავად იცის, რა არის საჭირო ამ სახეობაში გამარჯვებისთვის.
ვერ ვიტყვით, რომ ტინა მაზემ უნაკლო მეორე ცდა აჩვენა. ბრინიონეს სლოვენიელმა მხოლოდ ცხრა მეასედი მოუგო, რაც მინიმალური უპირატესობაა. მიუხედავად ამისა, ეს სრულიად დამსახურებული ტიტულია მაზესთვის, რომელიც ვანკუვერის ოლიმპიადის პრიზიორიცაა, მაგრამ ასეთი დონის გამარჯვება აქამდე არ ჰქონია.
გერმანულ პუბლიკას კი გუშინ დიდი იმედგაცრუება ელოდა: ვიქტორია რებენსბურგმა ტესა ვორლის ვერაფერი მოუხერხა და საბოლოოდ მეხუთე ადგილზე გავიდა. მარია რიშს ბრწყინვალე შანსები ჰქონდა, მეორე ცდაზე კარგად აიღო სტარტი, მაგრამ დაეცა და მისმა მშობლიურმა ქალაქმა მძიმედ ამოიოხრა.
სუსტად გამოვიდნენ ავსტრიელები - პრაქტიკულად ყველამ ჩააგდო მეორე ცდა. ავსტრიის ნაკრებმა ზედიზედ სამი სტარტი მოიგო ქალებს შორის, მაგრამ გიგანტურ სლალომში უმედლოდ დარჩა.
გიგანტური სლალომი
ქალები
1. ტინა მაზე (სლოვენ) 2:20.54
2. ფედერიკა ბრინიონე (იტა) +0.09
3. ტესა ვორლი (საფ) +0.48
4. დენიზ კარბონე (იტა) +0.74
5. ვიქტორია რებენსბურგი (გერ) +0.88
6. მანუელა მოელგი (იტა) +0.89
