დრაფტი NHL-ში: პირველად პირველი ნომერი შვეიცარიელი იყო

ეროვნული საკალათბურთო ასოციაციის გარდა, გასულ უქმეებზე დრაფტი შედგა ჰოკეის ეროვნულ ლიგაშიც. და პირველად NHL-ის ისტორიაში, პირველ ნომრად აირჩიეს შვეიცარიელი ჰოკეისტი, კერძოდ, "ჰალიფაქსის" ფორვარდზე ნიკო ჰიშირზე შეაჩერა არჩევანი "ნიუ ჯერსი დევილზმა".

მეორე ნომრად აირჩიეს კანადელი ფორვარდი ნოლან პატრიკი ("ფილადელფია"), რომელიც დრაფტის მთავარ ფავორიტად მიიჩნეოდა. მესამე ნომერი გახდა ფინელი მირო ჰეისკანენი ("დალასი").

ჰიშირი ისტორიაში მეშვიდე ევროპელია, ვინც დრაფტზე პირველ ნომრად აიყვანეს. ნიკო გახდა კვებეკის იუნიორთა ჰოკეის მთავარი ლიგის (QMJHL) საუკეთესო ახალბედა. თამაშის სტილის გამო, მას შვეიცარიელი მაკდევიდი უწოდეს.
* * *
2017 წლის დრაფტზე დამყარდა ფინური რეკორდი. ამ ქვეყნის 6 მოთამაშე - მცველები მირო ჰეისკანენი, იუსო ვიალიმიაკი, ურჰო ვააკაინენი, ჰენრი იოკიჰარიუ, ფორვარდები კრისტიან ვესალაინენი და იელი ტოლვანენი პირველ რაუნდში აირჩიეს, რაც აქამდე არასოდეს მომხდარა. რეკორდი იყო 2002 წლის დრაფტის პირველ რაუნდში 5 ფინელი მოთამაშის არჩევა.

სულ 2017 წლის დრაფტზე 217 ჰოკეისტი აირჩიეს. აქედან ყველაზე მეტი - 80 მოთამაშე ჰყავდა კანადას, 47 - აშშ-ს, 27 - შვედეთს, 23 - ფინეთს, 18 - რუსეთს, 9 - ჩეხეთს, 3 - შვეიცარიას, 2 - დანიასა და სლოვაკეთს, თითო - ბელარუსს, გერმანიას, სლოვენიას, ნორვეგიასა და საფრანგეთს.

ყოველდღიური სპორტული გაზეთი "ლელო"