ძიუდო - "გოლდენ გორმა" ევროპის ჩემპიონთა ლიგაზე ბრინჯაოს მედალი მოიპოვა

დღეს, 21 დეკემბერს, საფრანგეთის ქალაქ მონპელიეში ევროპის საკლუბო ჩემპიონთა ლიგა გაიმართა, სადაც საქართველოდან მონაწილეობა "გოლდენ გორმა" მიიღო და ბრინჯაოს მედალი მოიპოვა.

ბოლო წლებში ევროპის საკლუბო ტურნირებზე ყოველთვის ორი წარმომადგენელი გვყავდა - გორის კლუბი და შინაგან საქმეთა სამინისტროს "მებრძოლი", რომელიც უმეტესად ეროვნული ნაკრების ბაზაზე იყო დაკომპლექტებული. თუმცა 2022 წელს, როცა ამ ტურნირს გორმა უმასპინძლა, ჩვენგან მესამე კლუბი - თბილისის "არეაც" გამოვიდა, ამჯერად კი მხოლოდ გორელთა ამარა დავრჩით.

გორელების შემადგენლობა ასე გამოიყურებოდა:

- 73 კგ - ვაჟა მარგველაშვილი, გიორგი ტერაშვილი
- 90 კგ - ლუკა მაისურაძე
+ 90 კგ - ირაკლი დემეტრაშვილი, უშანგი კოკაური, თამაზ ბიგანაშვილი
- 57 კგ - ეთერ ლიპარტელიანი
- 70 კგ - ეთერ ასკილაშვილი
+70 კგ - სოფიო სომხიშვილი

"გოლდენ გორი" მეოთხედფინალში ფრანგულ "ნიცასთან" 3:4 დამარცხდა და რეპეშაჟში გადაერთო, სადაც "მონპელიეს" 4:1 აჯობეს, ბრინჯაოს მედლისთვის ბრძოლაში კი "გოლდენ გორმა" Judo Ukraine 4:0 დაამარცხა.

ტურნირის გამარჯვებული ტედი რინერის "პარი სენ ჟერმენი" გახდა, პარიზულმა კლუბმა ფინალში სერბული "რედ სტარი" უშანსოდ 4:0 დაამარცხა. აღსანიშნავია, რომ 5-გზის ოლიმპიური ჩემპიონი რინერი ტატამზე 5-თვიანი პაუზის შემდეგ დაბრუნდა და ფინალში პსჟ-ს ბოლო გამარჯვება სწორედ მან მოუტანა. ლეგენდარულ ძიუდოისტს გამარჯვება გაუჭირდა და მისი ბრძოლა დაახლოებით 8 წუთის განმავლობაში გაგრძელდა, თუმცა არასანახაობრივ ბრძოლაში მაინც გაიმარჯვა.