თუშიშვილი ვერცხლს დასჯერდა - ჯაბნიაშვილმა და დემეტრაშვილმა ბრინჯაოს მედლები მოიგეს [VIDEO]

თბილისის გრანდ სლემის ბოლო საშეჯიბრო დღეს +100 კილოგრამ წონით კატეგორიაში გურამ თუშიშვილი ფინალში ინალ ტასოევთან დამარცხდა და ვერცხლის მედალი მოიპოვა. ამავე წონით კატეგორიაში ირაკლი დემეტრაშვილმა მონღოლი ბახტიაარი დაამარცხა და ბრინჯაოს მედალი მოიპოვა, ხოლო - 90 კილოგრამ წონით კატეგორიაში ბრინჯაოს მედლისთვის ბრძოლაში გიორგი ჯაბნიაშვილმა სლოვაკი პეტერ ზილკა დაამარცხა.

+100 კილოგრამ წონით კატეგორიაში გურამი ასპარეზობაში მერვედფინალიდან ჩაერთო, სადაც ნეიტრალური დროშით მოასპარეზე იბრაგიმ მარგიევს აჯობა, მეოთხედფინალში კი კვიპროსელ იანის ანტონიუსს სძლია. თუშიშვილმა ნახევარფინალში მონღოლი ბახტიარი დაამარცხა და ფინალში ინალ ტასოევს შეხვდა. ამავე წონით ირაკლი დემეტრაშვილმა მერვედფინალში ნიდერლანდელი იელე სნიპე დაამარცხა, მეოთხედფინალში უკრაინელ ევგენი ბალევსკის აჯობა, ნახევარფინალში კი სამწუხაროდ, ინალ ტასოევთან დამარცხდა.


ცნობისთვის, ევროპისა და მსოფლიოს ჩემპიონი ლუკა მაისურაძე (- 90 კილოგრამი) ასპარეზობას პირველივე ბრძოლაში გამოეთიშა, პარიზის ოლიმპიური თამაშების ვერცხლის მფლობელი ილია სულამანიძე (-100 კილოგრამი) კი მისთვის ამ ტურნირზე მეორე ბრძოლაში, მერვედფინალში დამარცხდა.