რა ელის ქართველ სუმოისტს?! - გაგამარუს ჯიუროში დასარჩენად ყველა ბრძოლის მოგება სჭირდება

19 ნოემბერს ქართველმა სუმოისტმა თეიმურაზ ჯუღელმა, იგივე გაგამარუმ, კიუშუ ბაშოს მე-10 საშეჯიბრო დღეს მე-9 მარცხი კიოკუშუჰოასთან განიცადა და ჯიუროს დივიზიონიდან გავარდნის რეალური საფრთხის წინაშე დადგა.

გაგამარუ კიუშუ ბაშოს ჯიუროს მე-12 ნომრად შეხვდა, რაც იმას ნიშნავს, რომ წაგებათა და მოგებათა შორის სხვაობა 3-ზე მეტი თუ იქნება, ჯიუროში ადგილს ვერ შეინარჩუნებს.

სუმოში, როგორც წესი, ასე ხდება, რა სხვაობითაც ამთავრებ ბაშოს, იმდენი საფეხურით ან დაქვეითდები (უარყოფითი ბალანსის შემთხვევაში), ან დაწინაურდები (დადებითი ბალანსის შემთხვევაში).

გაგა მე-12 ნომერი არის, ჯიუროში კი სულ 30 რიკიში (სუმოისტი) გახლავთ, 15 - დასავლეთის დივიზიონში, 15 - აღმოსავლეთის. თუ გაგამარუ 20 ნოემბერს წააგებს, დანარჩენი ბრძოლებიც რომ მოიგოს, მაინც -5 სხვაობით დაასრულებს ბაშოს და ავტომატურად დატოვებს ჯიუროს დივიზიონს.

ჯიუროს დივიზიონის ქვევით კი მაკუშიტას დივიზიონია. სხვაობა ჯიუროსა და მაკუშიტას დივიზიონებს შორის ისეთივეა, როგორც ჯოჯოხეთსა და სამოთხეს შორის.

მაკუშიტას დივიზიონის მოჭიდავეს არ აქვს სეკიტორის სტატუსი, რომელსაც პროფესიონალი სუმოისტები ატარებენ და ეს წოდება მხოლოდ ჯიუროსა და მაკუუჩის დივიზიონის წევრებისთვისაა განკუთვნილი.

ასევე, მაკუშიტას ლიგაში მოჭიდავე რიკიშსაც უწევს თავისი სკოლისთვის მუშაობა და თუ საჭირო გახდა, სეკიტორსაც უნდა ემსახუროს (ნუ, ეს ნაწილი, გაგასთვის გამორიცხულია, მას ამას ვერ აკადრებენ). ასევე, უდიდესი სხვაობაა ხელფასებს შორის. ჯიუროს დივიზიონში საკმაოდ კარგი ხელფასები აქვთ რიკიშებს, ხოლო მაკუშიტას მონაწილე სუმოისტი იმდენს იღებს, რომ თვიდან-თვემდე თავი გაიტანოს.

სამწუხაროდ, ჯუღელის, ფიზიკური მდგომარეობიდან გამომდინარე, მაკუშიტას დივიზიონში დაქვეითება ძალიან რეალურია. თეიმურაზი გარკვეული ხნის წინ აპირებდა სუმოდან წასვლას და ამისი მიზეზი ქრონიკული ტრავმა გახლდათ. თუმცა, ის არ დანებდა და ბოლომდე აგრძელებს ბრძოლას. მაგრამ არ ვიცით, დაქვეითების შემთხვევაში, შესაძლოა, 32 წლის ქართველმა სუმოისტმა კარიერაც დაასრულოს.

გაგამარუ იაპონელ გულშემატკივრებს საქართველოში იწვევს