თბილისის "ლოკომოტივი" უმაღლეს ლიგას დაუბრუნდა

ვასილ მაისურაძის შეგირდებმა პლეი ოფის მატჩში რუსთავურ გუნდს ხუთი უპასუხო გოლი გაუტანეს
საქართველოს ეროვნული ჩემპიონატის უმაღლეს ლიგას თბილისის "ლოკომოტივი" დაუბრუნდა, რომელმაც ელიტაში გადასასველ პლეი ოფის გადამწყვეტ შეხვედრაში რუსთავის "მეტალურგი" ანგარიშით 5:0 დაამარცხა. შესაბამისად, რუსთავური კლუბი 2015/16 წლების სეზონს პირველ ლიგაში გაატარებს.

27 მაისს, მიხეილ მესხის სახელობის სტადიონის სათადარიგო მოედანზე გამართულ მატჩში ანგარიში მე-16 წუთზე, გიორგი ნარიმანიძის ავტოგოლის შედეგად გაიხსნა.

ვასილ მაისურაძის შეგირდებმა სხვაობა ორბურთიანი პირველ ტაიმშივე გახადეს - 29-ე წუთზე თავი მამია გავაშელიშვილმა გამოიჩინა.

შესვენების შემდეგ დუბლი გიორგი გაგნიძემ შეასრულა, რომელმაც "მეტალურგის" კარი 49-ე და 53-ე წუთებზე აიღო, რასაც 71-ზე დემურ ჩიხლაძის გოლი მოჰყვა - საბოლოოდ 5:0 "ლოკომოტივის" სასარგებლოდ.

თბილისის "ლოკომოტივი" უმაღლეს ლიგაში 1997 წლიდან მოყოლებული, 13 სეზონის განმავლობაში გამოდიოდა, 2009/10 წლების სეზონის შედეგების მიხედვით კი, პირველ ლიგაში დაქვეითდა.

შეგახსენებთ, რომ 2015/16 წლების სეზონისთვის უმაღლესი ლიგის საგზურები მანამდე მოიპოვეს "საბურთალომ" და თერჯოლის "საპოვნელამ", ხოლო პირველ ლიგაში დაქვეითდნენ "ზესტაფონი" და "ვიტ ჯორჯია".

თეგები:

თბილისის ლოკომოტივი

რუსთავის მეტალურგი

მამია გავაშელიშვილი

გიორგი გაგნიძე

გიორგი ნარიმანიძე

(0)