ევრო 2016. VIII ტური. E ჯგუფი: რუნი ინგლისის გოლეადორია [VIDEO]

ინგლისის ნაკრებისთვის შვეიცარიასთან მატჩი არც ისე კარგად დაიწყო, რადგან როი ჰოჯსონს დებიუტშივე იძულებითი ცვლილების გაკეთება მოუხდა - ფაბიან დელფი დაშავდა და მის მაგივრად მინდორზე როს ბარკლი გამოვიდა. თუმცა მეორეს მხრივ ძნელია თქვა ამით ნაკრები დასუსტდაო, ალბათ უფრო პირიქით, რადგან ბარკლი ფორმაშია, ხოლო დელფი ცოტა ხნის წინ მომჯობინდა.

"უემბლიზე" დიდი მოლოდინი იყო. შედეგზე უფრო მნიშვნელოვანი ბევრისთვის ის გახლდათ გაიტანდა თუ არა უეინ რუნი გოლს, რადგან შედეგი ინგლისელთათვის არც ისე აქტუალური გახლდათ, გუნდმა გასვლა სან მარინოსთან მოგებით გაინაღდა.

დიახ, ნახსენები ბარკლის აქტიურობისა და ლუკ შოუს მშვენიერი პასის მერე, შეცვლაზე შემოსულმა ჰარი კეინმა თავისი ცაციათი გარდამტეხი გოლი კი გაიტანა, ჭკვიანური დარტყმით ახლო კუთხეში და ესეც მნიშვნელოვანი გახლდათ, რადგან ახალგაზრდა მოთამაშეს ხასიათზე მოიყვანს, რაც ინგლისის ნაკრებს სჭირდება, მაგრამ... ცხადია, შოუს მხოლოდ ერთი გმირი ჰყავდა, რუნიმ გაიტანა!

მერე რა, რომ ისევ პენალტით, მთავარია გაიტანა, 50-ე საიუბილეო გოლი და ისტორიაში კიდევ ერთხელ ჩაეწერა, ტახტიდან თვით სერ ბობი ჩარლტონი ჩამოაგდო და ნაკრების ყველა დროის საუკეთესო ბომბარდირი გახდა.

შვეიცარიას დაცვის ხარვეზებზე აქვს სამუშაო. კიდევ კარგი ვლადიმირ პეტკოვიჩის ბიჭებისთვის, რომ მათ სლოვენიასთან 0:2 სასწაულებრივად მოაბრუნეს, თორემ ახლა საქმე საგანგაშოდ ექნებოდათ, რადგან სლოვენიელებმა 6-ქულიან მატჩში დაამარცხეს ესტონეთი და მესამე ადგილზე აინაცვლეს.

ლიტვამ კი კინაღამ ქულა უსახსოვრა სან მარინოს, როდესაც ათი კაცით დარჩა, მეტოქეს ანგარიში გაათანაბრებინა, მაგრამ უკვე თავადაც კაცნაკლულ სანმარინოელებს საფინალო სასტვენმა ვერ მოუსწრო.

ინგლისი-შვეიცარია 2:0
გოლები: 1:0 კეინი (67), 2:0 რუნი (84-პენ.)
ინგლისი (4-3-3): ჰარტი - კლაინი (68. სტოუნსი), კეჰილი, სმოლინგი, შოუ - მილნერი, შელვი (57. კეინი), დელფი (3. ბარკლი) - ოქსლეიდ-ჩემბერლენი, სტერლინგი, რუნი
შვეიცარია (4-3-3): სომერი - ლიხტშტაინერი, კლოზე, შერი, როდრიგესი - ბეჰრამი (79. ჯემაილი), გ. ჯაკა, ინლერი - შაქირი, შტოკერი (72. სეფეროვიჩი), დრმიჩი (63. ემბოლო)
გაფრთხილება: მილნერი, სმოლინგი -
კუთხური: 3-8; ჯარიმა: 14-11; თამაშგარე: 0-6; კარში დარტყმა: 14(7) -8(1); ბურთის ფლობა: 49%-51%.
მაყურებელი: 75 775

ლიტვა-სან მარინო 2:1
გოლები: 1:0 ჩერნიხი (7), 1:1 მ. ვიტაიოლი (55), 2:1 სპალვისი (90+2)
ლიტვა (4-4-2): არლაუსკისი - ფრეიდგეიმასი, ჟალიუკასი, კლიმავიჩიუსი, სლავიცკასი (73. მატულევიჩიუსი) - ჩერნიხი, პილიბაიტისი (82. ჩვედუკასი), ჟულპა, ნოვიკოვასი - სპალვისი, სლივკა (53. ჩერნიაუსკასი)
სან მარინო (5-4-1): ბენედეტინი - ბატისტინი, ფ. ვიტაიოლი, დელა ვალე, ბროლი, პალაცი - მ. ვიტაიოლი (80. სელვა), გასპერონი (68. ბერეტი), რინალდი, კიარუცი - სტეფანელი (73. ჰირში)
გაფრთხილება: ნოვიკოვასი, სპალვისი - ბატისტინი, სტეფანელი, ბროლი, კიარუცი
გაძევება: არლაუსკისი (50), კიარუცი (88)
კუთხური: 7-0; ჯარიმა: 17-19; თამაშგარე: 2-1; კარში დარტყმა: 20(8)-1(1); ბურთის ფლობა: 65%-35%.
მაყურებელი: 1 200

სლოვენია-ესტონეთი 1:0
გოლები: 1:0 ბერიჩი (63)
სლოვენია (4-2-3-1): ჰანდანოვიჩი - სტრუნა, ილიჩი, ცესარი, იოკიჩი - კრხინი (88. როტმანი), კურტიჩი - ბირსა, ილიჩიჩი (55. ლიუბიიანკიჩი), კამპლი - ბერიჩი (77. ლაზარევიჩი)
ესტონეთი (4-5-1): აკსალუ - ტენისტე, იაგერი, კლავანი, პიკი - ზენევი (46. პური), ლინდპერე (84. ტეევერი), მეტსი, ვასილიევი, კალასტე (88. ლუტსი) - პურიე
გაფრთხილება: კამპლი - ლინდპერე, მეტსი
კუთხური: 3-3; ჯარიმა: 14-20; თამაშგარე: 1-0; კარში დარტყმა: 11(4)-7(3); ბურთის ფლობა: 64%-36%.
მაყურებელი: 6 068

თ მ ფ წ ბ ქ
1. ინგლისი 8 8 0 0 26-3 24
2. შვეიცარია 8 5 0 3 16-8 15
3. სლოვენია 8 4 0 4 15-10 12
4. ესტონეთი 8 3 1 4 4-6 10
5. ლიტვა 8 3 0 5 6-14 9
6. სან მარინო 8 0 1 7 1-27 1

მომდევნო ტური
9 ოქტომბერი:
ინგლისი-ესტონეთი, სლოვენია-ლიტვა, შვეიცარია-სან მარინო.

ყოველდღიური სპორტული გაზეთი "ლელო"