ეროვნული ლიგა. XXVII ტურის წინ: ვამთავრებთ "კლასიკოთი"!

ამ ტურის მატჩებით ეროვნულ ლიგაში III წრე დასრულდება, თუმცა ეროვნულ ლიგაში მხოლოდ მომდევნო ტურის შემდეგ იქნება ორკვირიანი შესვენება. წინდაწინ უნდა ვთქვათ, რომ ისევე, როგორც პირველ და მეორე წრეში, ამ "საშუალედო ფინიშის" გამარჯვებულიც (თანაც - ვადაზე ადრე) თბილისის "დინამოა".

თუმცა მხოლოდ ამ ტურის შედეგების შემდეგ შეგვეძლება იმის თქმა, თუ რამდენად კომფორტული სხვაობა ექნება ლიდერს უახლოეს კონკურენტებთან. მით უფრო, რომ ერთ-ერთ უშუალო მდევარს სწორედ ამ ტურში უნდა დაუპირისპირდეს: კვირას, 24 სექტემბერს ხომ "ქართული კლასიკოა".

III წრის ბოლო ტურის დასკვნითი მატჩი ("ტორპედო"-"დინამო") როგორი საინტრიგო თემაა, ამაზე, ალბათ, აღარც ღირს ბევრი ლაპარაკი. ამას გარდა, მოახლოებულ ტურში სხვაც ბევრი საინტერესო მატჩია და იმის ალბათობაც დიდია, რომ სატურნირო ცხრილში გარკვეული გადაადგილებებიც მოხდეს.


მართლაც უსიამოვნო სტატისტიკური მაჩვენებლით ამთავრებენ III წრეს ეს დიდი ტრადიციის მქონე გუნდები: "კოლხეთს" ზედიზედ 5 წაგება აქვს, ბათუმის "დინამოს" კი - სამი! ეგ კი არა, "კოლხეთს" უკვე 12-მატჩიანი მოუგებელი სერია აქვს - ამ გუნდმა უკანასკნელად... 4 (ოთხი!) თვის წინ გაიმარჯვა.

ჰოდა, ამიტომაცაა, რომ "კოლხეთი" ვერაფრით ახერხებს პლეი-აუტის ზონიდან თავის დაღწევას, სადაც წინა ტურის შემდეგ ბათუმის "დინამოც" აღმოჩნდა, ასევე არასახარბიელოდ რომ ასპარეზობს ბოლო პერიოდში: უკანასკნელ ექვს მატჩში მხოლოდ ერთადერთი გამარჯვება აშკარად წარუმატებელი შედეგია იმ გუნდისთვის, წინა სეზონი ჩემპიონატში მესამე ადგილზე რომ დაასრულა.

სატურნირო სიტუაციიდან გამომდინარე, ეს "შავისზღვისპირული დერბი" დაძაბული უნდა გამოდგეს; თუმცა, ემოციური მომენტები ამ გუნდების დაპირისპირებას მუდამ თან ახლავს და ამის დასტურად მიმდინარე სეზონის II წრის მატჩიც გამოდგება, როცა ორივე გუნდის სამმა ფეხბურთელმა მიიღო წითელი ბარათი.

და კიდევ ერთი საინტრიგო დაპირისპირებაც: ორივე გუნდს ხომ უკრაინელი სპეციალისტები წვრთნიან - ალექსანდრ შტელინი ("კოლხეთი") და კონსტანტინ ფროლოვი ("დინამო").


კიდევ ერთი წარმატებული მატჩი და გიორგი ჭიაბრიშვილის დამოძღვრილი "საბურთალო" კლუბის ხანმოკლე ისტორიაში საუკეთესო შედეგს გაიმეორებს: 2015/16 წლების სეზონის მეორე ნახევარში ამ ახალგაზრდულ გუნდს 8-მატჩიანი წაუგებელი სერია ჰქონდა!

დღევანდელი ფორმაციის "საბურთალო" მართლაც მშვენიერ ფორმაში ხვდება ჩემპიონატის ერთ-ერთ ყველაზე გადამწყვეტ ეტაპს და თუ ასე გაგრძელდა, მაშინ ევროპალიგის საგზურის მოპოვებაც არავის უნდა გაუკვირდეს.

"საბურთალოს" ბოლოდროინდელი წარმატებული თამაშის ერთ-ერთი მთავარი მიზეზი, რაღა თქმა უნდა, სტაბილურობაც არის, რომ აღარაფერი ვთქვათ შეტევაზე ორიენტირებულ თამაშზეც: ბოლო ორ მატჩში გუნდმა 9 გოლი გაიტანა მეტოქეთა კარში!

ერთი შეხედვით, ასეთ ფორმაში მყოფი "საბურთალო" აშკარა ფავორიტად უნდა მივიჩნიოთ სატურნირო ცხრილში ბოლო ადგილზე მყოფ გუნდთან. თუმცა, "შუქურა" რომ არაფრით ეგუება თავის არასახარბიელო სატურნირო მდგომარეობას, ქობულეთელთა გუნდმა მიმდინარე სეზონში უკვე რამდენჯერმე დაამტკიცა.

არც ის დაავიწყდებოდა "საბურთალოს", რომ გიორგი შაშიაშვილის დამოძღვრილმა გუნდმა გასვლაზე ერთ დედაქალაქურ გუნდს ("ლოკომოტივი") მოუგო, მეორესთან ("დინამო") კი ფრედ ითამაშა.

ამ სეზონამდე "ლოკომოტივი" ვერაფრით ახერხებდა თავისი ერთ-ერთი ყველაზე უხერხული მეტოქის დამარცხებას. როგორც იქნა, ნავსი გატყდა! ეგ კი არა, "ლოკომოტივმა" უკვე ორჯერ შეძლო (თანაც, ორივეჯერ - დიდი ანგარიშით) ბოლო წლების ერთ-ერთი ყველაზე სტაბილური ქართული გუნდის დამარცხება.

ისიც უნდა აღვნიშნოთ, რომ საჩხერელთა გუნდის კარში გატანილი 8 გოლიდან ზუსტად ნახევარი ირაკლი სიხარულიძის ანგარიშზეა: ეროვნული ლიგის საუკეთესო ბომბარდირმა პირველი წრის მატჩშიც შეასრულა "დუბლი" და მეორე წრის დაპირისპირებაშიც.

მიუხედავად იმისა, რომ "ლოკომოტივმა" წინა ტურში მეტად დასანანი მარცხი (მატჩის ბოლო წამებზე) იწვნია, გიორგი დევდარიანის გუნდს ჯერ კიდევ არ დაუკარგავს ევროტურნირების საგზურის მოპოვების შანსი.

რაც შეეხება "ჩიხურას", საჩხერელთა გუნდმა, როგორც იქნა, სტაბილურად დაიწყო ასპარეზობა და ამის გამოც არის, სოსო ფრუიძის შეგირდებს სავსებით კანონზომიერი ამბიცია რომ გაუჩნდათ ევროტურნირებზე მოსახვედრად. მით უფრო, რომ "ჩიხურა" საქართველოს თასის ნახევარფინალშიც არის გასული...


ბოლო სამ მატჩში "დილამ" 2 უმნიშვნელოვანესი თამაში მოიგო და გარკვეული პაუზის შემდეგ, როგორც იქნა, პლეი აუტის ზონას თავი დააღწია. არანაკლებ მნიშვნელოვანი იყო ის ფაქტიც, რომ ქულებს გორელთა კონკურენტებიც კარგავდნენ.

თუმცა, გიორგი დარასელიას ხელმძღვანელობით მოასპარეზე "დილას" ამჯერად ერთობ ძლიერი მეტოქე ჰყავს - მოქმედ ჩემპიონ "სამტრედიას" მიმდინარე სეზონშიც ამბიციური მიზნები აქვს და ალბათ, სასწაული უნდა მოხდეს, ამ გუნდმა მიმდინარე სეზონი საპრიზო ადგილების გარეშე რომ დაასრულოს.

ეგ კი არა, გია ცეცაძის გუნდი ისეთ ფორმაშია, შარშანდელი შედეგი რომ გაიმეოროს, არც ეს უნდა იყოს ვინმესთვის გასაკვირი.

შეგახსენებთ, რომ "სამტრედიას" ეროვნული ლიგის გუნდებიდან ყველაზე ხანგრძლივი წარმატებული სერია აქვს: 11 მატჩია, არ დამარცხებულა, მათ შორის - მთელ III წრეში.


ამ მატჩმა ძალიან ბევრ კითხვას უნდა გასცეს პასუხი. "ქართულ კლასიკოში" გამარჯვების შემთხვევაში თბილისის "დინამო", ფაქტობრივად, საბოლოოდ ჩამოიცილებს ორი მდევრიდან ერთ-ერთს. წესით და რიგით, არც ფრე უნდა იყოს ურიგო "დინამოსთვის", მით უფრო, ბოლოდროინდელი საკადრო პრობლემების გათვალისწინებით.

აი, "ტორპედოს" გამარჯვების შემთხვევაში კი, ჩემპიონობისთვის ბრძოლა უკიდურესად გამძაფრდება - ამ შემთხვევაში ხომ ქუთაისელთა გუნდი სამ ქულამდე შეამცირებს სხვაობას თავის უპრინციპულეს მეტოქესთან!

საკადრო პრობლემები ვახსენეთ და უკვე არახალი ამბავია, თუ როგორი მოკლე სათადარიგოთა სკამით ხვდება კახა კაჭარავას დამოძღვრილი თბილისის "დინამო" III წრის ფინიშს. თუმცა, მთლად ოპტიმალური შემადგენლობით ვერც მასპინძლები იასპარეზებენ: "ტორპედოს" მთავარი მწვრთნელი კახა ჩხეტიანი დისკვალიფიკაციის გამო ამ მატჩში ვერ დაიხმარებს წამყვან ფორვარდ თორნიკე კაპანაძესა და ამ ბოლო დროს ძირითად შემადგენლობაში "გაშინაურებულ" ახალგაზრდა ცენტრალურ მცველ ანრი ჭიჭინაძეს.

საქართველოს ჩემპიონატების ისტორიაში თბილისის "დინამოს" არც ერთ გუნდთან არა აქვს ამდენი წაგება, რამდენიც "ტორპედოსთან" და ბარემ ისიც ვთქვათ, რომ სწორედ ქუთაისელთა გუნდმა მოახერხა პირველად (2000 წელს) "დინამოს" ჰეგემონიის დამხობა.

თუმცა, "ტორპედო" ჩემპიონატის მატჩებში უკვე 5 წელიწადია, ვერაფრით ახერხებს თავისი უპრინციპულესი მეტოქის დამარცხებას. ბოლო გამარჯვება "დინამოსთან" 2012 წლის 6 მაისით თარიღდება, როცა გია გეგუჩაძის ხელმძღვანელობით მოასპარეზე "ტორპედომ" გასვლაზე მოუგო "დინამოს".

აი, ქუთაისში კი, უკანასკნელად 2011 წელს მოიგო, როცა დროებითი მწვრთნელის, გიორგი სუხიაშვილის დამოძღვრილმა "ტორპედომ" მატჩის დასაწყისშივე ორი სწრაფი გოლი (გრიგოლ დოლიძე, გიორგი მეგრელაძე) გაუტანა ესპანელი მწვრთნელ-ფეხბურთელებით გადაძეძგილ "დინამოს" და საბოლოოდ, 2:1 გაიმარჯვა.

მიმდინარე სეზონში კი ორივე მატჩი "დინამოს" გამარჯვებით დამთავრდა; აღსანიშნავია, რომ პირველ შემთხვევაში, "დინამო" I წრის გამარჯვებული გახდა. აი, II წრის მატჩი კი, ნაღდად მშვენიერი სანახაობა გამოდგა: პირველ ტაიმში უბერებელმა გრიგოლ დოლიძემ მშვენივრად ისარგებლა "დინამოს" უკრაინელი მეკარის, სერგეი ლიტოვჩენკოს შეცდომით და ანგარიში გახსნა, მეორე ტაიმში კი გიორგი ჩაკვეტაძის გამოჩენამ დინამოელთა თამაში საგრძნობლად შეცვალა...

აღარაფერს ვამბობთ საბა ლობჟანიძის ძალიან გამორჩეულ თამაშსა თუ გიორგი პაპუნაშვილის ოსტატურ გოლზე. საბოლოოდ, "დინამომ" ის თამაში 2:1 მოიგო და "ზაფხულის ჩემპიონიც" გახდა.

თუმცა, დღესდღეობით, გუნდში აღარც ჩაკვეტაძეა, აღარც - საბა ლობჟანიძე, აღარც - გიორგი პაპუნაშვილი და აღარც - ბაჩანა არაბული (ქუთაისურ მატჩში პირველი გოლის ავტორი), ხოლო გიორგი თევზაძე ტრავმირებულია, ისევე, როგორც გუნდის კაპიტანი ოთარ კიტეიშვილი.

ბომბარდირები
ი. სიხარულიძე (ლოკომოტივი) 20
დ. ტატანაშვილი (ჩიხურა) 13
ბ. მიქელთაძე (დინამო თბ) 11.

ყოველდღიური სპორტული გაზეთი "ლელო"