საქართველოს ნაკრების მწვრთნელმა სანიოლმა წინა მატჩისგან განსხვავებული შემადგენლობა გაიყვანა მოედანზე, რომელიც გაცილებით უფრო შემტევი იყო და ზივზივაძესაც მიეცა თავის გამოჩენის შესაძლებლობა. სტუმართა გუნდში ვერ ვიხილეთ საბერძნეთთან შეხვედრაში ტრავმირებული სერხიო რამოსი.
ინიციატივას თავიდანვე ფურია როხა დაეუფლა, უხიფათოდ გვიტევდა, სწრაფი კონტრშეტევისას კი კვარაცხელია ლორენტემ წააქცია და ყვითელი ბარათი მიიღო. პირველი მომენტი მე-11 წუთზე ესპანელებმა შექმნეს, როდესაც ტორესის დარტყმული ბურთი ლორიამ მოიგერია. მე-13 წუთზე კვარაცხელიამ ყვითელი ბარათი პედრო პოროს მიაღებინა. შემდეგ ნაკუთხურალ ბურთზე ყველას კაშიამ დაასწრო და სტუმრები მეკარე სიმონმა გადაარჩინა.
მოკლედ, ბურთის ფლობა სტუმრების იყო, თუმცა ჩვენი გუნდი არაფერს უთმობდა, სახიფათო კონტრიერიშებით პასუხობდა და ტაიმის დასასრულს ხვიჩამ ანგარიში გახსნა.
შესვენებაზე ლუის ენრიკემ „გაყვითლებული“ ლორენტე მარტინესით, ხოლო პასიური ხილი ოლმოთი შეცვალა, შემდეგ რუისის ნაცვლად ალკანტარა შეუშვა მოედანზე და ტორესმა მარცხენა ფლანგიდან განივი გადაცემის შემდეგ საპასუხო გოლი გაიტანა.
სამწუხაროდ, ჩვენს გუნდს უჭირდა ბურთის დაჭერა და მეტოქე ზეწოლა გააძლიერა. საპასუხო ცვლილებები სანიოლმაც განახორციელა. ბოლოს მოწინააღმდეგე შტურმზე გადმოვიდა და კომპენსირებულ დროში ოლმომ კარიდან წინ გამოსულ ლორიას გაუტანა და დავმარცხდით.
წაგება ასეთი ბრძოლის შემდეგ გულდასაწყვეტია, მაგრამ ძნელია დაცვაში ჩადგომით შედეგს მიაღწიო, აუცილებელია ბურთის მეტი კონტროლი და დაცვის მარჯვენა ფლანგის გაძლიერება.
საქართველოს ეროვნული გუნდი შესარჩევი ეტაპის სტარტზე მეორე მატჩშიც დამარცხდა და მესამე ტურში, 31 მარტს, გასვლაზე საბერძნეთს დაუპირისპირდება.
თბილისი. „დინამო არენა“
საქართველო - ესპანეთი 1:2
გოლები: 1:0 კვარაცხელია (43), 1:1 ტორესი (55), 1:2 ოლმო (90+2)
გაძევება: შენგელია (90+4)
საქართველო: ლორია, კაკაბაძე (ჩაბრაძე 79), კაშია, დვალი, გიორბელიძე, გვილია, კანკავა, კვარაცხელია (კვეკვესკირი 79), კიტეიშვილი (ბერიძე 70), ლობჟანიძე (შენგელია 70) , ზივზივაძე (ქვილითაია 62)
ესპანეთი: სიმონი, ალბა, დ. ლორენტე (მარტინესი 46), ერიკ გარსია, პედრო პორო (მ. ლორენტე 65), პედრი, ბუსკეტსი (ოიარსაბალი 73) , რუისი (ალკანტარა 54), ხილი (ოლმო 46), მორატა, ტორესი
რა დაგვანახა შვედეთთან გამართულმა მატჩმა?! - სანიოლის დებიუტის შეფასება
ვერ გავიგე რა არ მოგწონთ სულ რომ
კრიტიკის რეჟიმში ხართ. მიზეზები არ გელევათ. სულ ის ანეგდოტი მახსენდება, კურდღელი რომ მგელს უჩმახებს ლომის ზურგით და მიზეზს რომ ვერ უპოვის, რატომ ყურებიანი ქუდი არ გაფარიაო :)) ხან ბუდუ ზივზივაძეს რატომ არ იხახებო, (გამოიძახა და დააყენა), ხან პარუნაშვილიო (ეგეც გამოიძახა და ეხლა ხარაიშვილზე მიაწვებიან სავარაუდოდ), ხან რატომ უფრო მეტ რისკზე არ მიდიხარო (გეგონება პრემიერლიგის და პრიმერადივიზინის ფეხბურთელები გვყავდეს და შეეძლოთ 90 წუთი მეტოქის კართან მიკაჭვება, ხან კანკავა დაბერდა გაუშვიო (ასეთებსაც ამბობენ ზოგიერთი ჭკვიანი, ოდნავი შეგრძნება რომ არ აქვთ, რამხელა შავ სამუშაოს ასრულებს ჯაბა და როგორი სული და გულია ნაკრების, ფაქტორია როგორც პიროვნება), ხან ტაქტიკა არ მოეწონება ვიღაცას, 4-4-2 ჯობიაო
რას გვერჩით ბოლობოლო. ძლივს ნაკრებმა შემტევი, თამამი ფეხბურთის თამაში დაიწყო ამ არც თუ მდიდარი რესურსების ხელში კადრების თვალსაზრისით. ამაზე უკეთესი რა უნდა ითამაშოს გამაგებინეთ, კაცმა 4 დღეა ჩაიბარა ნაკრები და გულზე ხელის დადებით ვაღიაროთ რომ ამასაც არ ველოდით მისგან პირველ დღეებში. მე პირადად მეგონა ორივე, ესპანეთიც და შვედეთიც 2-3 ბურთით უშანსოდ მიგვიგებდნენ და ჩვენი ბიჭები დავნეულები ირბენდნენ ახალი მწვრთნელის ხელში. არა და შვედეთს თანაბრად ვეთამაშეთ და ესპანეთს ღირსეულად ვებრძოლეთ. თან რაც მომწონს სანიოლის, ეროვნული ლიგის ბიჭებს მისცა შანსი და ამით დადებითი იმპულსი გაუგზავნა რომ შანსი ყველას აქვს. ამდენი დადებითი მკხდა ამ 5 დღეში და შეგვარგეთ რა
შედეგი მოვა ნელ-ნელნა და თუ არ მოვა, სანიოლის ბრალი ყველაზე ნაკლებად იქნება ასე მგონია უკვე