კარში "მამარდა" და შანსი ვოლკოვს - საქართველოს ნაკრების სავარაუდო შემადგენლობა

სამშაბათს, 29 მარტს (20:00 სთ), საქართველოს ეროვნული ნაკრები ამხანაგურად უკვე ალბანეთში ითამაშებს. ეს შეხვედრა "ერთა ლიგაზე" გიბრალტართან მასპინძლობამდე (2 ივნისს) გენერალური რეპეტიციაა. აქედან გამომდინარე, შემადგენლობის გადახალისება ახლა უფრო ნაკლებად მოსალოდნელია, ვიდრე რამდენიმე დღის წინ ბოსნიაში, თუმცა ვილი სანიოლი თამაშის შანსს მეტ-ნაკლებად მაინც ყველას მისცემს. რაც შეეხება სათამაშო სქემას - იკვეთება, რომ 3-მცველიან ტაქტიკასთან მაქსიმალურად ადაპტირება ხდება.

გავიხსენოთ ფეხბურთელები, რომლებსაც ბოსნიაში საერთოდ არ უთამაშიათ - მეკარეები გიორგი მამარდაშვილი და ლაზარე კუპატაძე, ბათუმის "დინამოს" ფეხბურთელები - მამუკა კობახიძე და ლადო მამუჩაშვილი; ასევე - ვაკო ყაზაიშვილი, რომელიც სამხრეთ კორეიდან გუნდს გვიან შეუერთდა და "ზირას" ფორვარდი დავით ვოლკოვი.

გიორგი მამარდაშვილი - ვილი სანიოლმა ადრევე დაგვიანონსა, რომ ერთ-ერთ შეხვედრაში "ვალენსიას" კიპერსაც დაეყრდნობოდა. გიორგის ბულგარეთში (1:4) ცუდი დებიუტი გამოუვიდა და იმედია, ახლა ყველაფერი სხვაგვარად იქნება. "ღამურების" კარის დარაჯს ესპანეთში მშვენიერი პერიოდი აქვს.

ოთარ კაკაბაძე - ჩვენი მცელების საკლუბო მდგომარებისა და ფორმის გათვალისწინებით, "ერთა ლიგის" სასტარტო შეხვედრებში კაკაბაძის სასტარტოში მოსაზრება ლოგიკურად ჩანს. იქამდე გარკვეული დროა, ალბანეთში კი ოთარს ისევ ცენტრალურ მცველად ველით.

გურამ კაშია - ერთხელაც გავიმეორებთ, ამხანაგურ მატჩებში საქართველოს ნაკრების ახლად არჩეული კაპიტნის როტაცია ჩვეულებრივი ამბავი იქნებოდა, თუმცა "ჯვაროსნების" თავკაცი აქცენტს მაინც ბირთვის შეთამაშებასა და განმტკიცებაზე აკეთებს.



საბა კვირკველია - ჩვენი ნაკრების გამოცდილი უკანახაზელის 3-მცველიან ტაქტიკაში, თანაც მარცხნივ, თამაში გარკვეული სიახლეა. წინა მატჩში ლაშა დვალმა შეცვლა ითხოვა და ნაკლებად სავარაუდოა, ის ახლა ძირითადში ვიხილოთ.

საბა ლობჟანიძე - "ჰათაისპორის" ნახევარმცველს ბოსნიასთან დაპირისპირება არ გამოუვიდა, თუმცა ის ჩვენი ნაკრებისთვის კვლავაც უმნიშვნელოვანეს მოთამაშედ რჩება, რომელიც მოედანზე ბევრ სამუშაოს ეწევა და მთავარი მწვრთნელის ტაქტიკურ სქემას ალღოს მშენივრად უღებს.

გურამ გიორბელიძე - წინა შეხვედრის თერთმეტეულის განხილვისას დავწერეთ, რომ მარცხნივ გიორბელიძე უკონკურენტო იყო და ამ პოზიციაზე გიორგი წიტაიშვილის გამოცდა ვივარაუდეთ. ეს ასეც მოხდა, მაგრამ "წიტამ" თავი ვერ გამოიჩინა. ახლა ისევ გიორბელიძეს ველით, რომელსაც ოფიციალური მატჩებისთვის ირაკლი აზაროვთან კონკურენცია მოუწევს.

ნიკა კვეკვესკირი - "ლეხის" შუახაზელი ჩვენს გუნდში უმნიშვნელოვანესი ფიგურაა, რომელიც საქართველოს ნაკრების თამაშის ტემპს განსაზღვრავს. თითქმის გამოვრიცხავთ, ის როტაციაში მოხვდეს და სასტარტოში ვერ ვიხილოთ.

ვაკო გვილია - "რაკუვის" მოთამაშე გასულ შეხვედრაში მშვენივრად ჩაერთო. ამ ეტაპზე მაინც ისე იკვეთება, რომ სამომავლოდ სანიოლი მინდვრის ცენტრში კვეკვესკირი-გვილიას წყვილს დაეყრდნობა.



ვაკო ყაზაიშვილი - სამწუხაროდ, ისე ხდება, რომ შორი გზის გამოვლის გამო პირველი სანაკრებო მატჩისთვის ყაზაიშვილი ძალების სრულად აღდგენას ვერ ახერხებს. ეს რამდენჯერმე გამოჩნდა, თუნდაც ბათუმში კოსოვოსთან (0:1) წაგებულ მატჩში. "ულსანის" შემტევს ალბანეთში პირველივე წუთებიდან ველით.

ხვიჩა კვარაცხელია - "კვარასთან" და მის გარეშე საქართველოს ნაკრები რომ ბევრად სხვადასხვა გუნდია, ამის შესახებ ისედაც ვიცით და ამ მიმართულებით, დამატებითი ექსპერიმენტები საჭირო არაა. ახლა ხვიჩამ უნდა ითამაშოს, თავი კიდევ ერთხელ გამოიჩინოს და მის ირგვლივ არსებული მითქმა-მოთქმა საბოლოოდ უკან მოიტოვოს.

დავით ვოლკოვი - ბუდუ ზივზივაძე ბოსნიაში ძალიან კარგად გამოიყურებოდა. მატჩის ბოლოს მას დაღლილობაც დაეტყო. ვვარაუდობთ, რომ ახლა თავის გამოჩენის შანსი კვლავ დავით ვოლკოვს მიეცემა, რომელსაც წინა დაპირისპირებაში ერთი წამითაც არ უასპარეზია.

ზედიზედ ოთხი გამარჯვების შემდეგ მზადება მეორე ამხანაგური მატჩისთვის - საქართველოს ნაკრებმა ალბანეთში ივარჯიშა

ვინ როგორ ითამაშა და ვინ იყო საუკეთესო? - საქართველოს ნაკრების ფეხბურთელებისა და მთავარი მწვრთნელის შეფასება

რას მოგვცემს ეს გამარჯვება სამომავლოდ? - სანიოლმა ბევრი რამ გამოკვეთა