ოთხი ცვლილებით - საქართველოს ნაკრების სავარაუდო შემადგენლობა

საქართველოს ეროვნულმა ნაკრებმა ძალები აღიდგინა და მომავალი მეტოქისთვის ემზადება. გიბრალტართან დაშავებული გიორგი წიტაიშვილი მომჯობინდა და გუნდთან ერთადაა, თუმცა, სავარაუდოდ, ბულგარეთში მას დასვენების საშუალება მიეცემა და უფრო 9 ივნისს, ჩრდ. მაკედონიაში ველით.

მიუხედავად იმისა, რომ პირველი მეტოქე სუსტი გვყავდა, დატვირთული გრაფიკიდან გამომდინარე, ფიზიკური ძალების აღდგენას დიდი მნიშვნელობა აქვს - თამაშიდან თამაშამდე სხვა ბევრი ვერაფერი ესწრება. გამარჯვებულ შემადგენლობაში ცვლილებები ამ ფაქტორების გამოც იქნება და გიბრალტართან ზოგიერთ ფეხბურთელს შანსი რომ მიეცა, იმიტომაც...



ვვარაუდობთ, რომ ბოლო მატჩისგან განსხვავებით, ბულგარეთში 4 ცვლილებას ვიხილავთ.

გიორგი ლორია - "ანორთსისის" მეკარე "ჯვაროსნებში" პირველის სტატუსითაა და მინიმუმ, "ერთა ლიგის" ჯგუფური ეტაპის ბოლომდე ასე გაგრძელდება, როტაციას კი ამ შეხვედრაში არ ველით.

ოთარ კაკაბაძე, გურამ კაშია, დავით ხოჭოლავა - ვილი სანიოლის გუნდის ბოლო პერიოდის შეხვედრებს თუ განვიხილავთ, ცენტრალური მცველების ამ სამეულს ის ყველაზე მეტად ენდობა და ცვლილებას ნაკლებად ველით.

გარკვეული შანსი მაინც არის, ძირითადში ლაშა დვალი ვიხილოთ, რომელიც უფრო დავით ხოჭოლავას ალტერნატივად უნდა განვიხილოთ.

საბა ლობჟანიძე - დარწმუნებული ვართ, "ჰათაისპორის" ფეხბურთელმა (რომელსაც
შოთა არველაძის "ჰალს" უკავშირებენ) ძალები სრულად აღიდგინა, მიუხედავად იმისა, რომ გიბრალტართან ბევრი ენერგია დახარჯა. საბა ჩვენს გუნდში ყველაზე შეუცვლელი და უკონკურენტო ჩანს და გამორიცხული არაა, ივნისის 10 დღეში 360 წუთი ითამაშოს.



ნიკა კვეკვესკირი (1-ლი ცვლილება) - გიბრალტართან თავის გამოჩენის საშუალება ანზორ მექვაბიშვილს მიეცა, ახლა კი სასტარტოში ნიკა კვეკვესკირი უნდა დაბრუნდეს. "ჯვაროსნების" მთავარი მიზანი მაინც არწაგება უნდა იყოს, ეს ცუდ შედეგად არ ჩაითვლება, გამოცდილ ნახევარმცველზე კი ბევრი რამ იქნება დამოკიდებული - სათამაშო ტემპის კონტროლის, რგოლებს შორის კავშირისა და მისთვის ჩვეული გრძელი გადაცემების გამო.

გიორგი აბურჯანია - "აბუ" გიბრალტართან საკმაოდ კარგად გამოიყურებოდა და მოსალოდნელია, რომ მას სასტარტოში ახლაც ვიხილავთ.

წინა მატჩისგან განსხვავებით, ვაკო გვილიას განაცხადში ველით და შესაძლოა, გამოცდილ შუახაზელს დროც მიეცეს, ოთარ კიტეიშვილი კი მეტად უნდა დაიტვირთოს.

გურამ გიორბელიძე (მე-2 ცვლილება) - წიტაიშვილი გიბრალტართან მართლაც მოგვეწონა, მაგრამ ფრანგი დამრიგებელი მის თამაშს მაინც ნაკლებად გარისკავს.

23 კაცში ალბათ ირაკლი აზაროვი დაბრუნდება, თუმცა სანიოლის არჩევანი
სავარაუდოდ, მაინც გიორბელიძე უნდა იყოს, რომელმაც გასულ შეხვედრაში ტაიმზე მეტი ითამაშა.

ზურიკო დავითაშვილი (მე-3 ცვლილება) - დასვენებულ ზურიკოს ახლა სასტარტოში (ჩაკვეტაძის ნაცვლად) ველით. მარტის ამხანაგურ მატჩებში გამოიკვეთა, რომ
მას ნახევარდაცვაში უამრავი სამუშაოს შესრულება შეუძლია, რაც ბულგარეთში ასე გამოგვადგება. მეტოქის ბანაკში პირველ დაპირისპირებაში  ფრით (ჩრდ. მაკედონიასთან 1:1) უკმაყოფილო არიან და აგრესიულად შემოგვიტევენ.

ხვიჩა კვარაცხელია - გვჯერა, კვარაცხელია ქართველი გულშემატკივრების მოლოდინს გაამართლებს და თავის მაღალ კლასს კიდევ ერთხელ გამოავლენს.

ხვიჩას სამხრეთ იტალიური მედიაც აქტიურად აკვირდება და თითოეულ დეტალს განიხილავენ. მთავარია, ყველაფერმა ამან "კვარაზე" ემოციურად არ იმოქმედოს, თუმცა მისი ხასიათიდან გამომდინარე, ამის ნაკლებად გვეშინია.

ბუდუ ზივზივაძე (მე-4 ცვლილება) - გიორგი მიქაუტაძემ გიბრალტართან ბევრი იშრომა, ბოლოს გაიტანა კიდეც, მაგრამ ბულგარეთში ძირითადში ზივზივაძე უნდა დაუბრუნდეს. მას უნგრეთში ბევრი გააქვს და მოწინააღმდეგის კარი ბოლოს ნაკრების მაისურითაც აიღო.

მთავარია, ბულგარელეთის ნაკრებთან ნავსი გავტეხოთ. თითქოს განსაკუთრებული არაფრით გამორჩეული გუნდი ჩვენთვის საკმაოდ ბევრი გოლის გატანას ახერხებს, ასე იყო ბოლო ამხანაგურ მატჩშიც (1:4 გასულ სექტემბერში). არ დაგვავიწყდეს, რომ ამ ქვეყანის უძლიერესი ნაკრები, ერთ დროს, ხრისტო სტოიჩკოვის მეთაურობით (2:1) დავამარცხეთ.

შეხვედრა რაზგრადში 5 ივნისს, თბილისის დროით 22:45 საათზე დაიწყება და მას 41 წლის იტალიელი (ნეაპოლელი) არბიტრი ფაბიო მარესკა განსჯის.

საუკეთესო გოლის გატანის გარეშე - საქართველოს ნაკრების შეფასებარაც თავიდან გვიკვირდა - საქართველოს ნაკრების შედეგი და მომავლის სამუშაო