საქართველოს საფეხბურთო ეროვნულმა ნაკრებმა გიბრალტართან მატჩის წინა ვარჯიში და პრესკონფერენცია გამართა. "ვიქტორია სთედიუმზე“ ჩვენი გუნდის ვარჯიში ადგილობრივი დროით 18:00 საათზე დაიწყო და ერთ საათს გაგრძელდა. ვარჯიშის დაწყებამდე, ვილი სანიოლმა ჩვენს კითხვებს ნაკრების ვიცე-კაპიტან ნიკა კვეკვესკირთან ერთად უპასუხა.ვილი სანიოლი: "ჩემი გეგმა ის არ არის, ყველა მოთამაშეს თანაბარი სათამაშო დრო მივცე, ჩემი მიზანია, დავაყენო გუნდი, რომელიც კონკრეტულ მატჩში გაიმარჯვებს. "ახალი სისხლი“ ყოველთვის საჭიროა, ბუნებრივია, ცვლილებები ხვალინდელ მატჩშიც იქნება, მაგრამ ნუ ელით, რომ 11 მოთამაშიდან ყველას შევცვლი. რაც შეეხება ხელოვნურსაფარიან მოედანს, ეს
...მიმაჩნია თუ არა ისტორიულ შედეგად ერთა ლიგის ჯგუფში პირველ ადგილზე გასვლა? ამაზე მე ვერ ვილაპარაკებ - ქართველი გულშემატკივარი უკეთ შეაფასებს. ბოლო თვეებია, კარგად ვთამაშობთ და პირველ რიგში, ეს მოთამაშეების დამსახურებაა. ჩემი ფეხბურთელები ყველა შეხვედრაში ბოლომდე იხარჯებიან, ბუნებრივია, ქართველი ქომაგი ჩვენგან ხვალინდელ მატჩშიც 3 ქულას ელის, მაგრამ ფეხბურთში არაფერია გამორიცხული, არავინ იცის, როდის დასრულდება ჩვენი წარმატებული სერია. ამიტომ, საქმეს ძველებურად, პროფესიულად უნდა მივუდგეთ, ყველა შეხვედრაში ვაჩვენოთ რა გვინდა, საით მივდივართ და წინსვლა გავაგრძელოთ.
...ჩემთვისაც, ისევე როგორც გულშემატკივრისთვის, ძალიან მნიშვნელოვანია მუშაობა ფეხბურთელებთან, რომლებიც ძლიერ ჩემპიონატებში თამაშობენ. გარდა იმისა, რომ კვარაცხელიას, დავითაშვილის, მამარდაშვილის, სხვა ფეხბურთელების წარმატებული თამაშის წყალობით, საზღვარგარეთ სულ უფრო მეტ ყურადღებას იჩენენ ქართული ფეხბურთის მიმართ, ეს მოთამაშეები ერთგვარი "ლოკომოტივის“ როლს შეასრულებენ, მეტ მოტივაციას მისცემენ სხვა ქართველ ფეხბურთელებსაც!
...რა შეიცვალა გასული წლის წარუმატებელი მატჩების შემდეგ? ალბათ, გახსოვთ, რომ კოსოვოსთან შეხვედრაში ვითამაშეთ განსხვავებული სისტემით და დაგეგმილი გვქონდა ნაკრებში მისი სამომავლოდ დანერგვა. ბოლო რვა თვის განმავლობაში, გვიმართლებდა იმ მხრივაც, რომ არ გვყავდა ტრავმირებული მოთამაშეები, გვქონდა შესაძლებლობა, გამოგვეცადა და დაგვენერგა ახალი სისტემა.
გასათვალისწინებელია ისიც, რომ სხვადასხვა ფეხბურთელს სხვადასხვა დრო სჭირდება ახალ სისტემასთან, მწვრთნელის ფილოსოფიასთან შესაჩვევად.
... დიახ, თუ ხვალ ითამაშებს, გიბრალტართან შეხვედრა გურამ კაშიასთვის მე-100 სანაკრებო მატჩი იქნება. არაფერთხელ მილაპარაკია მის პროფესიონალიზმზე, საქმისადმი მიდგომაზე. თუ ასე გააგრძელებს, გურამს კიდევ 100 შეხვედრის გამართვა შეუძლია...
... მეკითხებით - შეგვიძლია თუ არა, გიორგი მამარდაშვილი უკვე მივიჩნიოთ ეროვნულ გუნდის პირველ მეკარედ? თქვენ შეგიძლიათ ის თქვათ, რაც გსურთ, მაგრამ ჩემთვის უფრო მნიშვნელივანი ის არის, რომ ამ მომენტისთვის, გვყავს ორი მაღალი დონის მეკარე - ლორია და მამარდაშვილი. ჩრდილოეთ მაკედონიასთან მამარდაშვილმა ითამაშა, მისი თამაშით კმაყოფილი ვარ, მაგრამ არ დაგვავიწყდეს, რომ იქამდე, ივნისის ოთხი მატჩიდან, სამ შეხვედრაში ნაკრების კარს ლორია იცავდა! ვიმეორებ, მამარდაშვილის თამაშით კმაყოფილი ვარ, მაგრამ ხვალ ლორია ითამაშებს!"
რატი შელეგია - სპეციალურად Sportall.ge-სთვის გიბრალტარიდან
სანიოლის ორმაგი ჯეკპოტი, უზარმაზარი ვაკუუმი მოედნის ცენტრში და მეტი "თავისუფლება" კვარაცხელიას
