კვიპროსის ჩემპიონატის 22-ე ტურში "ანორთოსისმა" 2:1 დაამარცხა "კარმიოტისა".
მწვრთნელმა თემურ ქეცბაიამ გუნდი 3-6-1 ტაქტიკური სქემით ათამაშა და გიორგი ლორია, ბუბა დაუშვილი და გიორგი ქვილითაია ძირითად შემადგენლობაში დააყენა. სწორედ ქვილითაიამ დააწინაურა თავისი გუნდი მე-7 წუთზე, როდესაც მცველის შეცდომით ისარგებლა, მეკარესთან პირისპირ გავიდა და ბურთს მეტოქის კარის ბადეში მიუჩინა ადგილი. ეს მიმდინარე ტურნირის 18 მატჩში ქართველი თავდამსხმელის მე-12 გოლია (5 პენალტით გაიტანა) და დიგუინისთან (აპოლონი) და სადიკთან (დოქსა) ერთად ბომბარდირია. ის 78-ე წუთზე შეცვალეს.
მეორე გოლი ნიკოლაოს კალცასმა 28-ე წუთზე გაიტანა, რომელსაც პასი დაუშვილმა გაუკეთა, ხოლო 82-ე წუთზე მეტოქემ ანგარიში პენალტით შეამცირა.
რაც შეეხება თორნიკე ოქრიაშვილს, კვლავ ტრავმირებულია.
"ანორთოსისი" 43 ქულით მესამე ადგილზეა, ლიდერ "აპოლონს" 4 ქულით ჩამორჩება და 6 თებერვალს აეკ-ს შეხვდება.
![alt](/pictures/image50/bfb3964563878ae429e277df9c969329.jpg "ქვილითაიას მე-12 გოლი - "ანორთოსისმა" გაიმარჯვა")
protathlima: ოქრიაშვილმა შეიძლება "ანორთოსისი" დატოვოს
