გიორგი ბერიძე: ბელგიის ჩემპიონატი ქართველებისთვის ცუდია?! ასე არ ვფიქრობ...

24 წლის შემტევ გიორგი ბერიძეს ნაყოფიერი სეზონი გამოუვიდა - მისი გოლით "უიპეშტმა" უნგრეთის თასი მოიპოვა და ევროტურნირებზე გავიდა, ვილი სანიოლმა კი ფეხბურთელს ეროვნული ნაკრების კარი გაუღო.

ბერიძე ახლახან დაუბრუნდა კლუბს და მომავალი სეზონისთვის მზადება დაიწყო.

SPORTALL.GE ფეხბურთელს საკლუბო და სანაკრებო თემებზე სასაუბროდ უნგრეთში დაუკავშირდა.

- საქართველოს ჩემპიონატიდან "გენტში" გადაბარგების შემდეგ, ფაქტობრივად, ბელგიურ კლუბში თავის დამკვიდრების საშუალება არ მოგცემიათ. ამას მაინც რა ფაქტორებს უკავშირებთ?
- როცა ბელგიაში გადავედი, 18 წლის ვიყავი. ერთი წელი 21-წლამდელთა გუნდში ვიასპარეზე. ისე მოხდა, იმ სეზონში "გენტმა" ჟიუპერლიგაში გაიმარჯვა და მომავალ წელს მეორე გუნდიდან მოთამაშეების დამატებაზე არავის უფიქრია - კლუბში ვერდამკვიდრებას, ძირითადად, მაინც ამას ვუკავშირებ. "გენტმა" სლოვაკურ "ტრენჩინში" გამანათხოვრა, მოგვიანებით კი, ორმხრივი შეთანხმებით, კლუბთან კონტრაქტი საერთოდ გავწყვიტე.

- როდესაც ბელგიაში წახვედით, სხვა ვარიანტები ხომ არ განიხილებოდა, კონკრეტული შეთავაზებები თუ არსებობდა და "გენტის" სასარგებლოდ არჩევანი რამ განაპირობა?
- გარკვეული უკრაინული ვარიანტები არსებობდა, თუმცა გადავწყვიტე, რომ ჩემი კარიერისთვის ასე აჯობებდა, ბელგიაში მეთამაშა.

- ამ ქვეყნის "ლოკერენშიც" გამოდიოდით. ამბობენ, რომ ჟიუპერლიგა ქართველებისთვის ნაკლებად წარმატებული და იღბლიანი ჩემპიონატია და ამის დასამტკიცებლად, გიორგი ჩაკვეტაძის მაგალითიც მოჰყავთ, რომელსაც საკმაოდ ბევრი გაუცდა. რამდენად არის ბელგია ტრამპლინი ტოპ-ჩემპიონატებში მოხვედრისთვის?
- ჩემი აზრით, ძალიან კარგი ჩემპიონატია და ზუსტად ერთი ნაბიჯია იქამდე, რომ ევროპის რჩეულ ხუთ ჩემპიონატში ითამაშო. ჩაკვეტაძეს რაც შეეხება, მძიმე ტრავმა შესაძლოა, ნებისმიერ ჩემპიონატში მიიღო. მთავარია, გიორგი დაბრუნდა და მჯერა, ტოპ-კლუბში ითამაშებს.

- "ტრენჩინი", "ლოკერენი", ახლა "უიპეშტი"... რამდენად ფიქრობთ, რომ სწორად დაგეგმეთ თქვენი კარიერა და შესაძლებელი იყო თუ არა უკეთეს ლიგებში გეასპარეზათ ან არის თუ არა ახლა ამის შანსი?
- განვლილმა კარიერამ მართლაც დიდი გამოცდილება მომცა. როცა კლუბის საკუთრება ხარ და განათხოვრებს, ყველაფერს საკუთარი სურვილით ვერ დაგეგმავ. წინ მთელი სატრანსფერო სეზონია და თუკი უფრო მაღალი დონის ჩემპიონატისა და კლუბისგან მივიღებ კონკრეტულ წინადადებას, რა თქმა უნდა, დავთანხმდები.

- საკმაოდ კარგი შედეგები გაქვთ - გასულ სეზონში უნგრეთის ჩემპიონატში 10 გოლი გაიტანეთ, "ლოკერენში" 6 შედეგიანი დარტყმა გქონდათ. განსაკუთრებით რომელ შეხვედრასა და გოლს გაიხსენებდით?
- თასის ფინალში მშვენიერი გოლი გამომივიდა, გავიმარჯვეთ და ევროტურნირზე გასვლის მიზანიც შევასრულეთ - ეს ჯერჯერობით, ჩემს კარიერაში ყველაზე დასამახსოვრებელი ეპიზოდია.

- სხვადასხვა პოზიციაზე გითამაშიათ. რომელი მიგაჩნიათ თქვენთვის საუკეთესოდ და მწვრთნელები გიორგი ბერიძეს უფრო მეტად სად ხედავენ?
- კარიერის დიდი ნაწილი მარცხენა ფლანგზე გავატარე. გასულ სეზონში "უიპეშტი" 3-5-2 სისტემით თამაშობდა და მე ორი თავდამსხმელიდან ერთ-ერთი ვიყავი.  ეს პოზიცია ძალიან მომეწონა, რადგანაც მოწინააღმდეგის კართან ახლოს ვმოქმედებდი და თავს ასე უკეთ ვგრძნობ.

- თქვენი დებიუტი ვლადიმირ ვაისის დროს შედგა, თუმცა სათანადოდ არ მოგეცათ საშუალება, ნაკრების ღირსება დაგეცვათ. შვედეთთან საკმაოდ კარგად ჩაერთეთ. ივნისის შეკრების წინ ვილი სანიოლმა განაცხადა, რომ თქვენი შესაძლებლობები უკვე შეაფასა, ახლა სხვების გამოცდა სურდა და ამის გამო აღარ მიგიწვიათ. საბოლოოდ ნაკრებში მაინც იყავით, თუმცა არ გითამაშიათ... ფრანგი სპეციალისტის სადებიუტო შეხვედრებს როგორ შეაფასებდით?


- ევროპის ჩემპიონატის ერთ-ერთი მასპინძელი ქალაქი ბუდაპეშტია. რას ელოდებით უნგრეთის ნაკრებისგან? თქვენ ბელგიელებს კარგად იცნობთ. ევროპის ჩემპიონატისგან რა მოლოდინი გაქვთ?
- უნგრეთს ძალიან კარგი გუნდი ჰყავს და ეს საფრანგეთის ნაკრებთან ფრითაც დაამტკიცეს. ბელგიის ნაკრებს რაც შეეხება, ისეთი მაღალი დონის ფეხბურთელები ჰყავს, მათგან ყველა ბევრს, მათ შორის, ჩემპიონობასაც ელის. ფავორიტად მაინც საფრანგეთის ნაკრებს მივიჩნევ, მე კი იტალიის გულშემატკივარი ვარ.