"ჩვენი პატარა ჯადოქარია... უკეთეს დღეზე ვერც ვიოცნებებდი" - კიტეიშვილით აღფრთოვანდნენ, ქართველმა მატჩის შემდეგ ემოციები ვერ დამალა

საქართველოს ნაკრების ნახევარმცველმა ოთარ კიტეიშვილმა ევროპის ლიგის ჯგუფურ ეტაპზე თავის კლუბ "შტურმს" "ფეიენოორდთან" უმნიშვნელოვანესი მატჩი მოაგებინა.

ჩვენებურმა როტერდამელებს მსაჯის მიერ დამატებულ წუთებზე გაუტანა, თავის გუნდს 1:0 მოაგებინა და ამით გრაცელებმა ევროპის ლიგის პლეი-ოფისკენ უდიდესი ნაბიჯი გადადგეს. 

მოგეხსენებათ, "კიტე" ბოლო დროს ტრავმებმა ძალიან გააწვალა. ის მატჩის დასრულების შემდეგ ძალიან ბედნიერი იყო. 

"უკეთეს დღეზე ვერც კი ვიოცნებებდი! მოედანზე შევედი, როდესაც ანგარიში 0:0 იყო და ბოლო წუთზე გადამწყვეტი გოლი გავიტანე. ვფიქრობ, ბოლო დროს რაც ტრავმებმა გამაწამა, ყველაფერი სასიკეთოდ დამიბრუნდა და ამ განცდისთვის ამ რთული პერიოდის გადალახვა ღირდა! ეს ჩემთვის ყველაფერს ნიშნავს", - უთხრა მატჩის შემდეგ ქართველმა ავსტრიულ Sky-ს.

შეხვედრის შემდეგ ოთარის გოლზე "შტურმის" მთავარმა მწვრთნელმა კრისტიან ილცერმა თქვა:

"ოთარის გოლის დროს განცდილი ემოცია ჩემს სამწვრთნელო კარიერაში ალბათ, ერთ-ერთი საუკეთესო იყო. მან ძალიან მძიმე პერიოდი გამოიარა, ბევრი იმედგაცრუება და უკან ნაბიჯი... ის არასდროს ნებდება, ბევრს იბრძვის და ამისთვის დაჯილდოვდა". 

კიტეიშვილის მიმართ საქებარი სიტყვები არც მისმა თანაგუნდელებმა დაიშურეს:

"ოთარს ყოველდღე ვეუბნები, რომ ის ჩვენი პატარა ჯადოქარია! დღეს მან კიდევ ერთხელ აჩვენა ყველას, თუ რა შეუძლია", - ამბობს "შტურმის" მცველი დევიდ აფენგრუბერი.

"ოთარმა დღეს მთელი გრაცი გააბედნიერა! მან ეს დაიმსახურა! ყველამ ვიცით, თუ რა შეუძლია მას და ეს ქართველმა კიდევ ერთხელ დაგვანახა", - ეს კი "შტურმის" 26 წლის ავსტრიელი მცველის, ივან ლუბიჩის სიტყვებია.

კიტეიშვილმა საფინალო სასტვენის წინ "შტურმს" "ფეიენოორდთან" გამარჯვება მოუპოვა [VIDEO]