"ქუდი დაიფარა, სათვალე მოირგო, მაინც იცნეს" - ბადრი კვარაცხელია ერთ-ერთ ნეაპოლურ ამბავს იხსენებს

ხვიჩა კვარაცხელიას მამა, ვეტერანი ფეხბურთელი ბადრი კვარაცხელია, გადაცემა "სარბიელის პოდკასტს" ესტუმრა და სხვადასხვა თემაზე ისაუბრა.

"პატარაობიდანვე, ფეხბურთის გარდა, არაფერზე ფიქრობდა. დილით 6 საათზე დგებოდა და თბილისის "დინამოს" ბაზაზე მიდიოდა, ვარჯიშობდა, შემდეგ სახლში ბრუნდებოდა და სკოლაში მიდიოდა. ასე ხდებოდა ზამთრის პერიოდშიც, გაცილებაზე უარს გვეუბნებოდა, რომ არ შევეწუხებინეთ. გაკვეთილებსაც კარგად ამზადებდა.

"ნაპოლიში" ყველა თანაგუნდელთან მეგობრობს, განსაკუთრებით, ვიქტორ ოსიმენთან, ჯოვანი დი ლორენცოსთან, მარიო რუისთან, ფრანკ ზამბო ანგისასთან. შეკრული გუნდია, სადაც დაჯგუფებები არ არსებობს.

ხვიჩა სახლიდან 8 საათზე გადის, 11-ზე ვარჯიში ეწყება, შუადღეს სახლში ბრუნდება და ისვენებს. მისი ერთადერთი გასართობი საღამოს კალათბურთის თამაშია. ახლახან კალათბურთის ფარი იყიდა, მაგრამ სხვაგან გადატანა მოუწევს, რადგან ამ სახლიდან გადავდივართ, ვუთხარი, მაგ სახლში არც დაბრუნდე-მეთქი (რამდენიმე დღის წინ მომხდარი უსიამოვნო ინციდენტის გამო, მოგეხსენებათ, "კვარას" სახლი გაქურდეს), ახლა სასტუმროშია. ხვიჩას სახლიდან სხვაგან გასვლა თითქმის შეუძლებელია. ერთხელ ნეაპოლში ტელევიზორის საყიდლად წავედით. ქუდი დაიფარა, სათვალეები მოირგო, პირბადე გაიკეთა, მაინც იცნეს, ტელევიზორი თავად ვერ აარჩია, რადგან იქამდე ვერ მივიდა.

დამერწმუნეთ, საქართველოს ჩემპიონატს უამრავი მენეჯერი და საფეხბურთო აგენტი ადევნებს თვალყურს, გამომდინარე გიორგი მამარდაშვილის, ხვიჩა კვარაცხელიას, ზურიკო დავითაშვილის, გიორგი ჩაკვეტაძის, ირაკლი აზაროვის, ოთარ კიტეიშვილის წარმატებიდან. არ მინდა, ვინმე გამომრჩეს.