კვარაცხელიასა და მამარდაშვილზე ბევრ ჭორ-მართალს წავიკითხავთ - სატრანსფერო ფანჯრის ამბები

სატრანსფერო ფანჯარა ის პერიოდია, რომელიც გულშემატკივრებსა თუ მედიას ასე აინტერესებს, თუმცა ბევრი ფეხბურთელისთვის დამთრგუნველია - გაუთავებელი ჭორები, ამ თემის წამოწევა, სიფრთხილე, ისეთი არ წამოგცდეს, ვინმე გაანაწყენო. ამის "მსხვერპლნი" უფრო მეტად ვარსკვლავები არიან. ჩვენი ფეხბურთელები, გიორგი მამარდაშვილი და ხვიჩა კვარაცხელია, სწორედ ამ გზაზე დგანან. მათი სატრანსფერო ამბების მიმართ უკვე სერიოზული საუბრებია. მართალია, ზამთარში ყველაფერი ეს იმ მასშტაბით არ ხდება, როგორც ზაფხულში, თუმცა მაინც...

ხვიჩა კვარაცხელიას ირგვლივ ადრე გავრცელებულ მხოლოდ შესაძლო ტრანსფერებზე რომ ვისაუბროთ და სხვა ამბებს შევეშვათ, იმდენი ჭორ-მართალი თქმულა, ეს რომ "ნაპოლის" ერთ-ერთ ლიდერზე ნეგატიურად მოქმედებდეს, ის გასულ წლებში ძალიან უნდა დაძაბულიყო. ხვიჩას ყველაფერი გავლილი და ნანახი აქვს. ისიც, ჭიქაში ქარიშხალი როგორ ჩნდება.



"კეთილი მრჩეველი" "კვარას" ახლაც ბევრი ეყოლება, რომლებიც მადრიდის "რეალისა" თუ სხვა მსგავსი კლუბების შეთავაზებაზე დაუფიქრებლად დათანხმებისკენ მოუწოდებენ. ის ნამდვილად ვიცით, რომ "კვარადონა", ისევე, როგორც მისი გარემოცვა და კლუბი, აჩქარებულად არ მოიქცევიან და ეს მხოლოდ უახლოეს პერიოდს არ ეხება...

გიორგი მამარდაშვილი ეროვნული ლიგიდან "ვალენსიას" სასტარტო კიპერობამდე ისე მივიდა, თვალი ვერ მოვკარით და არც იმაზე ვნერვიულობთ, რომ საკლუბო პროგრესს სათანადოდ ვერ გააგრძელებს და ამაში ხელს თუნდაც ჭორ-მართალი შეუშლის. ცოტა ხანში უფრო მეტს დაწერენ "მანჩესტერ იუნაიტედზე", "იუვენტუსზე", თუმცა ეს მხოლოდ სასარგებლოდ უნდა გამოვიყენოთ...