"ნაპოლის" სავარაუდო მწვრთნელის გაცნობა - გენიალური "ბარსა", თასი თბილისში, გოლი ხვიჩასგან და ტრაგედია...

ენრიკემ შთამბეჭდავი "ბარსელონა" შექმნა. თუკი გვარდიოლას გუნდი ტიკი-ტაკას ეფუძნებოდა, ახლა ისინი მინდვრის შუაში ბურთს უფრო ნაკლებად ათამაშებდნენ და მისით სამი სუპერშემტევის სწრაფად მომარაგებას ცდილობდნენ. მესი-ნეიმარი-სუარესის ტრიო ძალიან ლამაზ სანახაობას გვთავაზობდა და ყველაფერი ეს შედეგებით მყარდებოდა. ჩემპიონთა ლიგაზე დამაჯერებელი გამარჯვება და განცდა, რომ ამ უძვეველ გუნდს ვერავინ აჯობებდა. ყველაფერი ასე არ განვითარდა, რასაც ნეიმარის წასვლა და "ბარსელონას" ისევ კრიზისში გადაშვება მოჰყვა. ლუის ენრიკემ ევროპის სუპერთასი თბილისში, "დინამო არენაზე" აღმართა.



ლუის ენრიკე "დინამო არენაზე"

53 წლის სპეციალისტს მალე ესპანეთის ნაკრები ჩააბარეს, რომელსაც ასევე დიდების შემდეგ, ჩავარდნა ჰქონდა. ლუისის თავს საშინელება დატრიალდა, მის 9 წლის ქალიშვილ ხანას სიმსივნე დაუდგინდა და "ფურია როხა" 7 მატჩის შემდეგ დატოვა. "ხანია, შენ იქნები ვარსკვლავი, რომელიც ჩვენს ოჯახს გზას გაუნათებს" - დაწერა ენრიკემ მას შემდეგ, რაც სიმსივნესთან 5-თვიანი ბრძოლა უშედეგოდ დასრულდა...

"ნაპოლის" მომავალმა სავარაუდო თავკაცმა ძალები მოიკრიბა და ესპანეთის ნაკრებს დაუბრუნდა. მათ ევროპის ჩემპიონატის ნახევარფინალში გააღწიეს, რასაც მუნდიალი მოჰყვა. გასაკვირი ის იყო, რომ ლუჩოს 4-3-3 უფრო სწორხაზოვანი გახდა, "ფურია როხა" ჯიუტად ცდილობდა ეთამაშა ის, რისი განხორციელება ხავი-ინიესტას გარეშე იოლად გასაშიფრი იყო და თუკი წინა მუნდიალზე იეროს გუნდი რუსებმა შეაჩერეს, კატარში ესპანელთა გზა მაროკოს ნაკრებმა გადაჭრა.



კვარაცხელია ესპანეთის ნაკრების კარის აღებისას

ხვიჩა კვარაცხელიას შესაძლებლობები ენრიკემ პირადად მაშინ ნახა, როცა "კვარას" გოლით თბილისში ესპანეთის ნაკრებს ვამარცხებდით, თუმცა საბოლოოდ (1:2) წავაგეთ. ახლა ყველაზე საინტერესო ისაა, ლუჩოს "ნაპოლი" გარემარბებზე მეტად აქცენტირებული იქნება, როგორც ეს "ბარსაში" იყო და ქართველი ფეხურთელის სახით მას ამის ფუფუნება გააჩნია, თუ აქცენტს შუა ხაზში ბურთის კონტროლზე გააკეთებს. დიდი შანსია, ხვიჩას ბურთით სწრაფად მომარაგებაზე დიდი ძალისხმევა ჩაიდოს, კარგად ჩანს, ასეთ დროს ჩვენებური როგორი სახიფათოა და არა მაშინ, როცა რამდენიმე მეტოქის გარემოცვაში ბურთს კარიდან ზურგით მყოფს ერთგვარად მოვალეობის მოხდის მიზნით აწვდიან.

კვარაცხელიას თამაშს თუ ახალი ელემენტები სჭირდება, ლუის ენრიკე ამისთვის იქნებ იდეალური ვარიანტია, ოღონდ არა ისეთი, მსოფლიოს ბოლო ჩემპიონატზე რომ ვიხილეთ!..

Corriere dello sport: ლუის ენრიკემ "ნაპოლიში" კვარაცხელიას და ოსიმენის დატოვების გარანტიები მოითხოვა

კვარაცხელიას მწვრთნელი ლუის ენრიკე ხდება - "ნაპოლის" მფლობელი ესპანელის მოთხოვნას დათანხმდა