დღეს - კვარაცხელიასა და კვერნაძის მატჩები, მამარდაშვილი "სევილიას" წინააღმდეგ და "სიტის" სტარტი...

დღეს, 11 აგვისტოს, ევროპის მოწინავე ჩემპიონატებიდან ესპანეთის, ინგლისისა და საფრანგეთის პირველობები დაიწყება, ერთი კვირის შემდეგ კი საქმეში იტალიასა და გერმანიას ვნახავთ. ვაღიაროთ, ყველაზე დიდი ინტერესი "ნაპოლისა" და ხვიჩა კვარაცხელიას მიმართ არსებობს. სერია "ა"-ში გიორგი კვერნაძეც ითამაშებს; ამავდროულად, არაერთი საუბრის მიუხედავად, გიორგი მამარდაშვილი "ვალენსიაში" რჩება და ისინი "ლა ლიგის" პირველივე სათამაშო დღეს იასპარეზებენ; საფრანგეთშია გიორგი მიქაუტაძე.

"ნაპოლის" ბოლო მატჩი

19 აგვისტოს იტალიის მოქმედი ჩემპიონი "ნაპოლი" გიორგი კვერნაძის "ფროზინონეს" ესტუმრება. ქართველი გარემარბი წინა ამხანაგურ შეხვედრაში დაასვენეს, დღეს, 11 აგვისტოს, თბილისის დროით 20:30 საათზე კი, კვიპროსულ "აპოლონთან" გარკვეული დრო მაინც უნდა მიეცეს. ბრაზილიელი მცველის, ნატანის შემდეგ რუდი გარსიამ დაცვითი ტიპის ნახევარმცველი კაიუსტე შეიძინა. გასულ სეზონში გუნდს ამ ტიპის შუახაზელი ტანგი ნდომბელე ჰყავდა, რომელიც საკუთარ ფუნქციებს იდეალურად ნამდვილად ვერ ასრულებდა.

ნეაპოლელთა რიგებში არიან ფეხბურთელები, რომლებსაც მცირე ტრავმები აწუხებთ და იმედია, ჩემპიონატის საწყის მატჩამდე ყველაფერი მოგვარდება.


გიორგი მამარდაშვილის "ვალენსია" "სევილიას" მაშინ ესტუმრება, როცა თბილისის დროით (00:00 სთ) უკვე 12 აგვისტო იქნება (პირდაპირი რეპორტაჟი "სილქ უნივერსალზე"). "სანჩეს პისხუანზე" თამაში რთულია და "ღამურებს" აქ 2019 წლის შემდეგ არ მოუგია.

გასულ სეზონში არცერთი გუნდი არ ბრწყინავდა, სევილიელებმა კი, ტრადიციულად, წარმატებას ევროპა ლიგაზე მიაღწიეს. იმედია, რუბენ ბარახა ამბიციურ გუნდს შექმნის და მამარდაშვილს იმდენი ჯაფა არ დაადგება, როგორც გასულ სეზონში - ქართველი მეკარე ხომ ერთ-ერთი საუკეთესო იყო.



პრემიერლიგის ახალ სეზონს ჩემპიონი, პეპ გვარდიოლას "მანჩესტერ სიტი", ასევე დღეს, 11 აგვისტოს, ჩვენი დროით 23:00 საათზე გახსნის და ჩემპიონშიპის გამარჯვებულ "ბარნლის" ესტუმრება, რომელსაც გიორგი მიქაუტაძეს ახლაც უკავშირებენ.

დღესვე, 19:45 საათზე, გიორგი კვერნაძეს პირველი ოფიციალური მატჩის ჩატარების შესაძლებლობა აქვს, მისი "ფროზინონე" კი იტალიის თასზე "პიზას" უმასპინძლებს.

რაც შეეხება გიორგი მიქაუტაძის პირველ შეხვედრას ახალ სეზონში, "მეცი" "რენს" 13 აგვისტოს, ჩვენი დროით 19:05 საათზე ესტუმრება (საფრანგეთის ლიგა 1-ს "სეტანტა სპორტი" გვთავაზობს).

წარმატება ქართველ ლეგიონერებს!..

"ნაპოლიმ" შვედეთის ნაკრების ფეხბურთელი შეიძინა

პსჟ-მა ნეიმარსა და კიდევ 4 ფეხბურთელს შეატყობინა, რომ ტრანსფერზე არიან