ლუის ენრიკე: ეს მხოლოდ დასაწყისია - ცვლილებები ფეხბურთელების დაღლილობის გამო გავაკეთე

„ლივერპულის“ სტუმრად დამარცხების და ჩემპიონთა ლიგის მეოთხედფინალში გასვლის შემდეგ, კომენტარი პსჟ-ის მწვრთნელმა ლუის ენრიკემ გააკეთა:

„მომხდარის გაანალიზება მიჭირს, რადგან ჯერ კიდევ ემოციებში ვიმყოფები. მე ძალიან კმაყოფილი ვარ, ვაჩვენეთ, რომ ნამდვილი გუნდი ვართ. დღეს, ჩვენს 3 ათას გულშემატკივართან ერთად, რომლებიც „ენფილდზე“ იყვნენ, შესანიშნავი მატჩი ჩავატარეთ და გამარჯვებით ამაყები ვართ. მინდა დონარუმა გამოვყო. ეს მხოლოდ დასაწყისია! ჩენი მენტალობა იმაში მდგომარეობს, რომ უკეთესი გავხდეთ. ძალიან რთული თამაში იყო, ბურთის შენარჩუნება გვიჭირდა, რადგან ძლიერი მეტოქე გვყავდა. ეს გამარჯვება ყველა ჩვენი გულშემატკივრისთვისაა.

ახლა აღდგენაზე და მოგების აღნიშვნაზე უნდა ვიფიქროთ. ვაჩვენეთ, რომ მიუხედავად სტადიონზე ატმოსფეროსი, ფეხბურთის თამაში გვიყვარს. გმირობა? ჟურნალისტების საქმეში არ ვერევი, ამას რაც გინდათ, ის დაარქვით. მოგება პროგრესირებაში დაგვეხმარება. შესანიშნავ ფორმაში ვართ. ვართ თუ არა ფავორიტები? ისეთივე შანსი გვაქვს, როგორიც მეოთხედფინალში გასულ დანარჩენ შვიდ გუნდს. გასახდელში ზეიმი გვქონდა, თუმცა გვესმის, ჯერ არაფრისთვის არ მიგვიღწევია.