"პირველ არხზე" გადაცემა "ტაიმაუტის" სტუმარი სფფ-ის ყოფილი გენერალური მდივანი გახლდათ, რომელმაც France Football-ის მიერ გამოქვეყნებულ "ოცნების გუნდზე" ისაუბრა.
ყოფილმა ფეხბურთელმა საუბარში საქართველოს ნაკრებიც ახსენა.
"თანამედროვე ფეხბურთი ყოველდღიურად იცვლება. გუშინ სხვა რაღაც ხდებოდა, დღეს უკვე სხვა არის და ამაზე ყველა თანხმდება.
არ მესმის, როდესაც ამბობენ, რომ საქართველოს ნაკრებმა აუცილებლად შემტევი ფეხბურთი უნდა ითამაშოსო...
რატომ? - ეჭიროს მეტოქეს ბურთი 60% და ჩვენ ვიყოთ მეორე ნომრები. ჩამოაწოდოს იმან 15 კუთხური და შენ გაცილებით ნაკლები.
შეხედეთ მოურინიოს, რას აკეთებს დღეს ის და ინგლისში ყველაზე
ტიტულოვანი მწვრთნელია. მან 300 მილიონი გამოიმუშავა და ყველა შესაძლო ტიტული მოიგო.
ლა ლიგას ჩახედეთ და ნახავთ, რომ 38 გოლის გამტანი "ბარსელონა" მესამეზეა, 31 გოლის შემგდები "ატლეტიკო" კი - პირველზე. ამიტომ, ჩემთვის გაუგებარია, რატომ უნდა ვითამაშოთ აუცილებლად შემტევი ფეხბურთი", - ამბობს არველაძე.
ჩემი აზრით, ეს უნდა იყოს კონცეფცია, რასაც უნდა ემყარებოდეს ჩვენი საფეხბურთო ფილოსოფია ( რა თქმა უნდა თანამედროვე მოთხოვნების გათვალისწინებით სისწრაფე სათანადო ფიზიკური მომზადება, ვარჯიშის და აღდგენის დღევანდელი მეთოდოლოგია და ა.შ. ).
ეს უნდა იყოს გენერალური ხაზი, რითიც უნდა ხელმძღვანელობდეს ყველა საფეხბურთო სკოლა. ასე უნდა ხდებოდეს ჯერ მწვრთნელების მომზადება და მერე ფეხბურთელების აღზრდა ბავშვთა საფეხბურთო სკოლებში და მათი მაღალი სათამაშო კლასის ფორმირება.
მხოლოდ ტექნიკურ, მაღალ სათამაშო კლასზე ორიენტირებული, თანამედროვე სტანდარტებისა და პრაგმატულობის ელემენტებით შევსებული თვითმყოფადი საფეხბურთო ფილოსოფია შეიძლება გახდეს წარმატების მომტანი.
რაც შეეხება, შემტევი იქნება ჩვენი ფეხბურთი თუ სწრაფ, აგრესიულ კონტრშეტევებზე დაფუძნებული ( ყრუ დაცვას არასდროს, არავისთვის დიდი შედეგი არ მოუტანია )... ეს გახლავთ კონკრეტული ამოცანები, რომელსაც უკვე კონკრეტული მთავარი მწვრთნელები წყვეტენ არსებული რესურსებიდან გამომდინარე.
ჩემი აზრით, განაცხადი რომ ჩვენ აუცილებლად შემტევი ფეხბურთი უნდა ვითამაშოთ არ არის აბსოლუტური ჭეშმარიტება.